Терроризмлә мүбаризәдә реҝион халгларынын кәнарындаjыг

Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән,Иран Ислам Республикасы президенти НБҸ  телеканалы илә мүсаһибәдә АБШ дөвләтинин ИШИД вә террорчулар илә мүбаризә истигамәтиндәки сон аддымлары барәдә деjиб: Биз террорчулара гаршы коалисиjада jер аланларын ниjjәти илә бағлы ҹидди шәкк вә шүбһәләрә маликик. Буна бахмаjараг, терроризмлә мүбаризәдә реҝион халгларынын кәнарындаjыг.
Иран Ислам Республикасы президенти Һәсән Руһани АБШ-ын НБҸ телеканалы илә мүсаһибәдә бу телеканалын реҝионал вә беjнәлхалг мәсәләләрлә бағлы мүхтәлиф  суалларыны ҹавабландырыб.
Һәсән Руһани реҝионда терроризм вә террорчу груплашмалар илә мүбаризәнин реҝион халглары вә дөвләтләри тәрәфиндән апарылмалы олдуғуна диггәт чәкәрәк, деjиб: Бөjүк гүдрәтләрин халглар вә дөвләтләрин jеринә гәрар гәбул етмәләри заманы артыг кечмишдә галыб. Бу ҝүн халглар вә дөвләтләрин үмуми фикринә һөрмәтлә jанашмаг лазымдыр.
Иран президенти халгын разылығы олмадан вә дөвләтләр илә разылашдырылмамыш шәкилдә атылан истәнилән аддымын терроризмлә мүбаризә jох, тәҹавүзкарлыг адына малик олдуғуну да хатырладыб.
Һәсән Руһани әлавә едиб: Терроризмлә мүбаризә апармаг үчүн илк өнҹә мәсәләнин көкләринә диггәт ҝөстәрмәк лазымдыр. Әҝәр мәнтәгәмиздә бир проблем варса, бу проблеми реҝион халглары вә дөвләтләри диҝәрләриндән даһа артыг һисс едир, онун көкләрини минләрлә километр узагдан ҝәләнләрлә мүгаjисәдә даjа jахшы таныjырлар. Өтән илләрин тәҹрүбәси сүбут едиб ки, әҹнәбиләр терроризмлә мүбаризәдә һеч бир уғур әлдә едә билмәjибләр.
“Әҝәр башгалары терроризм мәсәләсинин һәлл едилмәсини истәjирләрсә, рәһбәрлик jох, көмәк етмәлидирләр” деjән Иран президенти вурғулаjыб: “Әҝәр реҝион терроризм проблеминдән хилас олмаг истәjирсә, бунун үчүн илк нөвбәдә реҝион халглары өз дөвләтләринин кәнарында jер алмалы, програмлар һазырланмалы вә башгалары да истәсәләр бу jолда онлара көмәк етмәлидирләр.”
Һәсән Руһани АБШ дөвләтинин ИШИД вә террорчуларла мүбаризә истигамәтиндәки сон аддымларына ҝәлинҹә исә деjиб: Бизим мәнтәгәмиз вә дүнjа иҹтимаиjjәти узун илләрдир ки, ифратчылыг, кобудлуг вә терроризм проблеминдән әзиjjәт чәкир. Америкалылар вә диҝәрләри исә узун илләрдир ки, терроризмлә мүбаризә апармаг истәдикләрини иддиа едирләр. Амма, суал jараныр: Бәс нә үчүн индиjә кими һеч бир уғур әлдә едә билмәjибләр? Бәс нә үчүн 2001-ҹи илдән бәри Ираг вә Әфганыстанда һеч бир нәтиҹә әлдә олунмаjыб? Нә үчүн проблемләр даһа да артыб?
Руһани Иран дөвләтинин мәсулиjjәтли бир дөвләт олдуғуну вурғулаjараг, реҝион халглары гаршысында мәсулиjjәт дашыдығыны вә онлара һөрмәтлә jанашдығыны билдириб вә деjиб: jарадылмыш коалисиjа бир гәдәр ҝүлүнҹдүр. Чүнки, бу коалисиjанын тәркибиндә бу террорчу груплашмалары формалашдыран тәрәфләр jер алыр. Бу коалисиjанын тәркибиндә террорчулары малиjjәләшдирән тәрәфләр jер алыр. Бу коалисиjанын тәркибиндә террорчулара сиjаси вә һәрби дәстәк верәнләр jер алыр. Белә олдуғу һалда ким террорчу груплары jарадан, онлары малиjjәләшдирән, сиjаси вә һәрби дәстәк верәнләрин бу ҝүн террорчулара гаршы савашда сәдагәтли олдугларына инана биләр? Биз онларын ниjjәти илә бағлы ҹидди шәкк вә шүбһәләрә маликик. Амма, биз терроризмлә мүбаризәдә Ираг, Суриjа, Фәләстин, Ливан вә Әфганыстан халгларынын кәнарында олаҹағыг.
Диггәт: Хәбәрдән истифадә етдикдә мәнбәjә истинад лазымдыр