Әлламә Һәсәнзадә Амолинин төвсијәләри (2)

Әһли Бејт (әлејһимус сәлам) -АБНА- Хәбәр Аҝентлији- Дејләми Ҝирами Пејғәмбәрдән (с) нәгл едир ки, уҹа Аллаһ бујурур: "һәр кәсин дәстәмазы позулса, јенидән дәстәмаз алмаса, мәнә ҹәфа едиб. Һәр кәс дәстәмазы позуландан сонра јенидән дәстәмаз алса вә азындан ики рәкәт намаз гылмаса мәнә ҹәфа едиб. Һәр кәс дәстмазы позуландан сонра јенидән дәстәмаз алса вә ики рәкәт намаз гылса вә ондан сонра дуа етмәсә мәнә ҹәфа едиб. Һәр кәс дәстәмазы позуландан сонра јенидән дәстәмаз алса, намаз гылса, дуа етсә, дүнја вә ахирәт истәкләриндән бир шеј истәсә вә мән ону гәбул етмәсәм, бу һалда мән она ҹәфа, зүлм етмиш оларам вә мән зүлм едән Аллаһ дејиләм."


Дәстәмаз нурдур

Бәли еј гардаш! Бил ки, дәстмаз нурдур вә даим дәстәмазлы олмаг мәләкүт, гүдс аләминә јүксәлмәјә сәбәб олаҹаг. Бил ки, бу бәрәкәтли ҝөстәриш елм вә әмәл мејданындакы бөјүк инсанлар тәрәфиндән тәҹрүбә олунуб. Одур ки, еј дост дијарынын јолчусу, сән өнҹә даим ону јеринә јетир вә әзмкар ол, намаздан сонра уҹа Аллаһдан баги, әбәди оланы истә. Ондан, Ондан башгасыны истәмә вә гәлб дили илә де:

"Биз Сәндән Сәндән башгасыны истәмирик, шәкәри она вер ки, мәһәббәти дадмајыб!" (Шеирдән бир парча, фарсҹадан тәрҹүмә)

Аллаһын мәһәббәтини дадан шәхс Ондан башгасыны һеч билир. Һәмчинин Ондан башга истәјәҹәји һәр бир шеј Онун исмләриндән бири олаҹаг. Одур ки, инсан һаггын затынын саһиби олса, онун бөлмәләринә дә саһиб олмуш олаҹаг:


Нә үчүн заһид беһишт һәвәсиндәдир?

Нә үчүн беһишти јарадандан хәбәрсиздир? (фарсҹа шердән тәрҹүмә)

Бөјүк ариф Сәдрәддин Дезфули белә шер јазыр:

Илаһи! Заһид сәндән һури истәјир, гүсуруна бир бах?!
Ја Рәбб гапындан ҹәннәтә гачыр, шүуруна бир бах?! (Шердән бир парча)

Намазы баша чатдырдыгдан сонра алныны сәҹдәјә гој вә де: "Аллаһуммә урзугни һәлавәтә зикрикә вә лигаикә вәл һузурә индикә. (Аллаһым зикринин ширинлијини мәнә дадыздыр, ҝөрүшүнү вә һүзурунда олмағы мәнә рузи ет)


Чох јемәјин зијанлары

Әлламә Һәсәнзадә Амули чох јемәјин зијанларына ишарә едәрәк дејир: Бил ки, чох јемәк һеч бир шүбһәсиз, гәлби өлдүрүр вә нәфси үсјанкар едир.
Аллаһ Гурани-Кәримдә бујурур: "Јејин, ичин вә исраф етмәјин. Һәгигәтән Аллаһ исраф едәнләри севмир."

Еј достлар! Билин ки, чох јемәк һеч бир шүбһәсиз гәлби өлдүрүр вә нәфсин түғјан, үсјан етмәсинә сәбәб олур. Бил ки, аҹлыг мөминин ән үстүн хүсусијјәтидир.
Јәһја ибн Мәаз неҹә дә ҝөзәл дејир: "Әҝәр нәфсинин дүнјаны тәрк етмәкдә сәнә јолдашлыг етмәсинә вә һаггын һөкмүнә бојун әјмәсинә хатир једди ҝөјүн мәләкләрини шәфаәтчи, 124 мин пејғәмбәр, онларын ҹанишинләрини вә бүтүн илаһи китаблары васитә етсән, јенә дә гәбул етмәјәҹәк. Лакин әҝәр аҹлығы васитә етсән вә аҹлыг васитәси илә јанашсан, О буну гәбул едәҹәк вә сәнә итаәткар олаҹаг."


Аллаһ јанында бәндәнин ән ҝөзәл һалы

Һәзрәт имам Садиг (ә) бу барәдә бујурур: "Гарын, чох јемәк нәтиҹәсиндә түғјан едир вә Аллаһ гаршысында бәндәнин ән ҝөзәл һалы онун гарны аҹ олдуғу һалдыр. Аллаһ һүзурунда бәндәнин ән пис һалы исә һәмин вахтдыр ки, онун гарны јемәк илә долудур."


Чох јемәјин зәрәрләри

Һәзрәт устад бу барәдә бујурур: "Чох јејән чох данышар вә мәнасыз, пуч данышар. "Јүз Кәлмә" әсәриндә исә јазыр: "Мадди гидасыны азалдан шәхс анлајар ки, чох јемәк фитнәјә сәбәб олур.

Чох јемәк Аллаһа доғру ҝетмәјә манеәдир

Ахунд молла Һүсејингулу Һәмәдани (һ.г. 1131-1239) бөјүк мәгамлы арифләрдәндир. О, сејид Әли Шүштәринин әсас шаҝирдләриндән олуб вә сон дөврүн бөјүк әхлаг устадларындан, арифләриндән һесаб олунур. Бөјүк ариф мәрһум Мәлики Тәбризи онун барәсиндә бујурур: Ујғун дәрәҹәләрдә (узун сәҹдәләр, ибадәт вә ...) она охшар бирини танымырам. О, дәјәрли әмәли ҝөстәришләриндән бириндә мәрһум сејјид Әли Аға Ирәванијә белә јазыр: Ҹәнаб! Чох данышмаг, чох јемәк, чох јатмагдан чәкин...


Иблисдән бир төвсијә!

Имам Садиг (ә) Һәфз ибн Ријаз үчүн белә бир һекајә нәгл едир: Бир ҝүн Иблис һәзрәт Јәһјанын јанына ҝәлир. Бу заман Иблисин бојнунда бир чох кәндирләр асылмышды.

Һәзрәт Јәһја сорушур: Бу кәндирләр нәдир?

Иблис дејир: Бунлар бәни-адәмин нәфс истәкләри, шәһвәтләридир. Бунлар илә онлары тутурам.
Һәзрәт Јәһја (ә) сорушур: Бу кәндирләрдән мәнә аид оланы да вармы?
Иблис дејир: Бәзи вахтлар чох јејирсән вә бу васитә илә мән сәни намаздан, Аллаһын јадындан узаглашдырырам.

Һәзрәт Јәһја (ә) бујурур: Анд олсун Аллаһа! Бундан сонра һеч заман дојанадәк јемәјәҹәјәм.
Иблис дејир: Анд олсун Аллаһа! Мән дә бундан сонра һеч бир мүсәлмана вә төвһид әһлинә нәсиһәт вермәјәҹәјәм.

Имам Садиг (ә) бу һадисәни ачыглајаркән дејир: Еј Һәфз! Анд олсун Аллаһа Ҹәфәр вә Али Ҹәфәр һеч заман гарныны јемәк илә долдурмамалыдыр. Анд олсун Аллаһа Ҹәфәр вә Али Ҹәфәр һеч заман дүнја үчүн чалышмамалыдыр.


Устадын лүтфү

Бир ҝүн устадын шаҝирдләриндән бири исрарла вә аҹизанә шәкилдә һәзрәт устад Һәсәнзадә Амулидән белә истәјир: Һәзрәт аға лүфт един, бир зикр, дуа јахуд ајры бир шеј дејин ки, бәлкә бу руһи тәнәззүлдән, чәтинликдән ниҹат тапам. Чох сыхынтыдајам.

Һәзрәт устад башыны ашағы салмышды вә мәналы сүкута гәрг олмушду. Башыны галхызды вә бујурду: Ағаҹан! Мән дә мүшкүлдәјәм, мән сиздән дә пис вәзијјәтдәјәм!!!

Сонра бир нечә дәгигә ҝөзләди вә белә бујурду: Сизә ики сөз дејирәм: Һәдсиз тәсири вар. Лакин бир шәртлә ки, азындан бир әрбәин ( 40 ҝүн) давам етдирәсиниз.

1. Дәјәрлији "Ја Һәјју Ја Гәјјум Ја мән ла илаһә илла әнт" зикри барәсиндә дејирләр ки, бу зикр даһа чох һәјат, дирчәлиш вә ағылын чохалмасы сәбәбидир. Ејни заманда гәбул олунан зикрләрдәндир.

2. Вагиә сурәсини охујун ки, әввәл елмдә даһа сонра да диҝәр шејләрдә варлы вә еһтијаҹсыз оласыныз. Чүнки рәвајәтдә бујурулур: Ибн Мәсуд Пејғәмбәрдән (с) нәгл едир: Пејғәмбәр (с) белә бујурду: Һәр кәс һәр ҝеҹә Вагиә сурәсини охуса һеч заман мөһтаҹ олмаз.

Һазырлады: Абдуллаһ


Диггәт: Хәбәрдән истифадә етдикдә мәнбәјә истинад лазымдыр