Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Ливан Милли Мәҹлисинин спикери Нәбијјә Бери бу ҝүн Сејјид Сәдруд Дин Сәдр, Сејјид Рәд Шәрәфуд Дин вә Ливан Мәһкәмә системинин әлагәләр шөбәсинин сәдри Һәсән Шами илә бирҝә Либијада ишҝүзар сәфәр заманы јоха чыхмыш Имам Муса Сәдр вә ону мүшајәт едән даһа ики нәфәрин мүәммалы талеји һаггда Либија рәсмиләри илә ҝөрүш кечирәрәк данышыглар апарыблар.
Бејрутда Ливанын рәсми хәбәр аҝентлијинин билдирдијинә ҝөрә, Ливанын Ганунвериҹилик Гүввәсинин (парламент) сәдри билдириб: “Бу ҝөрүш, иткин дүшмүш Имам Муса Сәдр вә ону мүшаијәт едән ики нәфәрин мүәммалы талејинин ахтарышы илә бағлы әлдә олунан сон нәтиҹәләр һаггда баш тутуб.”
О, даһа сонра билдириб: “Ҝөрүш заманы биз хүсуси вурғу илә, Имам Муса Сәдрин иткин дүшмәси илә бағлы Ливан вә Либија һөкүмәтләри арасында әлдә олунан мүвафигнамә үзәриндә данышыглар апардыг. Бу иш бизим үчүн олдугҹа һәјатыдыр. Чүнки, гејд олунан мүвафигнамә онларын сәһиһ вә сағлам сүрәтдә азад олунараг ҝери гајтарылмасы үчүн әсас өнәмдир.”
Нәбијә Бери даһа сонра Ливан вә Либија рәсмиләри арасында гејд олунан мүвафигнамәнин имзаланараг тезликлә онун шәртләринә әмәл олунаҹағына үмүдварлыг едәрәк бу ишдә никбин олдуғуну билдириб.
Һәјаты
Имам Муса Сәдр 1928-ҹи илдә Гум шәһәринин Ешгәли мәһәлләсиндә руһани аиләсиндә дүнјаја ҝөз ачмышдыр.
Атасы мәрһум Ајәтуллаһ-үзма Сејид Сәдрәддин Сәдр олуб. Сејид Муса ушаглыг вә јенијетмәлик дөврүнү һәмин мәһәлләдә кечирдиб.
Муса Сәдр 1942-ҹи илдән башлајараг он ил мүддәтиндә Гум Елми һөвзәсиндә тәһсил алыр. Һөвзәдә тәһсил алмагла јанашы Теһран Университетинә дахил олур вә игтисадчы-һүгугшүнас ихтисасына јијәләнир. 1944-ҹү илдән Нәҹәф Елми һөвзәсиндә тәһсилини давам етдирир.
Ливан сәфәри
Имам Муса Сәдр 1960-ҹы илдә Ливандан чохсајлы мүраҹиәтләр әсасында баба јурдуна 30 ҝүнлүк сәфәрә чыхыр. Амма Ливандакы вәзијјәт ону бу өлкәдә галыб фәалијјәт ҝөстәрмәјә вадар едир.
Имам Мүса Сәдр өз фәалијјәтләринә Сур шәһәриндә имам-ҹамаатлыгла башлајыр. Гыса бир мүддәтдә әмин олур ки, өлкәдәки мәһрумијјәтләрин әсас сәбәби идеоложи вә игтисади јохсуллугдур. Һәфтәдә ики дәфә Бејрута ҝедиб орада чыхышлар едән Муса Сәдр халгын етимадыны газаныр вә Ливанда иримигјаслы ислаһатлара башлајыр. Һәмин вахт Ливан мәктәбләринин дәрс програмлары Франсынын мәнафеләринә хидмәт едән гүввәләр тәрәфиндән һазырланырды. Муса Сәдр бир заман бабасы Сејјид Шәрәфәддин тәрәфиндән Бејрутда тәсис олунмуш мәдрәсәнин фәалијјәтләрини ҝүҹләндирир вә бу мәдрәсә гыса бир заманда университетә чеврилир.
Үзүҹү фәалијјәтләр
Муса Сәдрин ҹидди тәлашлары сајәсиндә Ливанда сәнәт мәктәби, хејријјә ҹәмијјәти, гадын тәшкилаты, тибб баҹылары һазырлајан мәктәб, тибби хидмәт шөбәләри, халчачылыг сехләри ачылыр. Муса Сәдр Ливанда ән ади һаглардан мәһрум едилмиш Шиәләр үчүн мәҹлис тәсис едир, ҹидди мүхалифәтә бахмајараг илк дәфә олараг Шиәләрин парламентдә тәмсил олумасына наил олур. Мәнтәгәдәки јағы сионист дүшмәнлә мүбаризә үчүн "Мәһрумлар һәрәкаты" јарадылыр. Бу иҹтимаи тәшкилатын ардынҹа "Әмәл" һәрби тәшкилаты тәсис едилир. Муса Сәдр мүхтәлиф дини әгидәләрин сәһнәдә олдуғу Ливанда өз сүлһ вә достлуг шүары илә гәлбләрә јол тапыр. Ону тәкҹә Шиәләр јох, Сүнни мәзһәбли Мүсәлманлар вә башга дин ардыҹыллары Ливанын хиласкары сајыр.
Муса Сәдр Ливандакы ијирми иллик фәалијјәти дөврүндә мәнтәгәдәки сијасы дуруму дәјишмәјә мүвәффәг олур.
Онун Авропа, Африка өлкәләринә сәфәрләри Ливана јени мүнасибәтин формалашмасында мүһүм рол ојнајыр...
Мисилсиз ҹинајәт
Амма 1979-ҹу илдә, ағрысы һәлә дә јашанан бир ҝүндә Ливија дөвләти тәрәфиндән рәсми дәвәтлә һәмин өлкәјә сәфәрә чыхмыш Имам Муса Сәдр ики көмәкчиси – Шејх Мәһәммәд Јагуб вә Аббас Бәдрәддинлә бирикдә мүәммалы шәкилдә јоха чыхды. Бир вахтлар өзүнү "јер үзүндә Аллаһын хәлифәси" сајан Ливијанын сабиг диктатору Мүәммәр Гәззафи бу ҝүнә кими Имам Муса Сәдрин оғурланмасында әсас фигур сајылыр. Муса Сәдрин оғурланмасы Ислам дүнјасында, иманлы инсанлар арасында бөјүк тәлатүм јаратса да, бу мүәмма һәлә дә өз һәллини тапмамышдыр.
АБНА- Хәбәр Аҝентлији
Диггәт: Хәбәрдән истифадә етдикдә мәнбәјә истинад лазымдыр
