Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Иран Ислам Республикасынын Президенти Һөҹҹәтүл Ислам вәл Мүслимин Доктор Һәсән Руһани Азәрбајҹан президенти Илһам Әлијевлә бирҝә кечирдији мәтбуат конфрансында билдириб: “Азәрбајҹан Республикасы президентинә Иран Ислам Республикасына сәфәр етдијинә ҝөрә миннәтдарлығымы билдирирәм. Илһам Әлијев илә илк ҝөрүшүм Давос форуму чәрчивәсиндә олуб. Һәмин ҝөрүшдә биз мүһүм гәрарлар гәбул етдик. Бу ҝүн һәм ҝениш тәркибдә, һәм дә тәкбәтәк кечирдијимиз ҝөрүшләрдә һәр ики өлкәни марагландыран бүтүн мәсәләләри нәзәрдән кечирдик”.
Иран Ислам Республикасынын президенти дејиб ки, бу ҝүн ики өлкә арасында әлагәләрин инкишафы үчүн һеч бир манеә јохдур: “Азәрбајҹан Республикасы вә Иран Ислам Республикасы ики јахын гоншу, дост, гардаш вә һәммәзһәб бир өлкәдир. Ики өлкә арасындакы сәмими мүнасибәтләр һәм халгларымызын, һәм дә реҝионда сабитлијин вә инкишафын хејринәдир”.
Һөҹҹәтүл Ислам вәл Мүслимин Доктор Һәсән Руһани ики өлкәнин рәсмиләри арасында кечирилән мүзакирәләрә дә тохунуб: “Биз ики өлкә арасында игтисади мәсәләләр, хүсусилә нефт, нефт-кимја, електрик енержиси, су вә диҝәр саһәләрдә әлагәләрин даһа да инкишаф етдирилмәси үчүн фикирләримизи бөлүшдүк. Бу ҝүн имзаланмыш сәнәдләрдән әлавә, буҝүнкү ҝөрүшүмүз вә апардығымыз данышыглар нәтиҹәсиндә ҝәләҹәкдә әлагәләримизин даһа ҝениш вә һәртәрәфли инкишафы үчүн ҝениш мүстәви јаратдыг. Биз ики өлкә халгларынын мәдәни әлагәләринин инкишаф етдирилмәси үчүн ҝедиш-ҝәлишин даһа да јахшылашдырылмасы истигамәтиндә лазыми аддымлар атылмасы барәдә разылыға ҝәлдик. Ејни заманда һәр ики өлкәнин Ислам вә мәзһәбә бахышлары ејнидир вә Исламын васитә кими екстремист һәрәкәтләрдә истифадә олунмасыны реҝион үчүн тәһлүкә һесаб едирик. Она ҝөрә дә реҝионда сабитлијин горунмасы үчүн мөтәдиллик вә терроризмлә мүбаризәдән башга јолумуз јохдур”.
Иран Ислам Республикасынын Президенти вурғулајыб ки, Хәзәр дәнизинин һүгуги статусунун мүәјјәнләшдирилмәси илә бағлы кечирилән мүзакирәләр вә бу саһәдә әмәкдашлыг барәдә дә фикир мүбадиләси апарылыб: “Һәр ики тәрәф һесаб едир ки, бу мәсәләдә јекун гәрарын гәбул олунмасы үчүн бизи узаг јол ҝөзләмир. Бизим глобал мәсәләләр вә бејнәлхалг тәшкилатларда әмәкдашлыгла бағлы фикирләримиз дә ејнидир. Азәрбајҹан президенти Иран Ислам Республикасынын динҹ мәгсәдли нүвә технолоҝијасындан истифадә һүгугуну дәстәкләјир. Биз Дағлыг Гарабағ мүнагишәси дә дахил олмагла, реҝиондакы бүтүн проблемләрин бејнәлхалг сәвијјәдә гәбул едилмиш гәрарлар вә әдаләт чәрчивәсиндә өз һәллини тапмасынын тәрәфдарыјыг. Бөлҝәмиздә ҹоғрафи сәрһәдләрин дәјишдирилмәси бизим нәзәримиздә гәбуледилмәздир. Биз белә охшар мәсәләләрин данышыглар вә сүлһ јолу илә һәлл олунмасына чалышмалыјыг. Мән Илһам Әлијевә Азәрбајҹан Республикасына сәфәрә дәвәт етдијинә ҝөрә тәшәккүрүмү билдирирәм вә чох бөјүк мәмнунијјәтлә гәбул едирәм. Иншаллаһ, мүнасиб вахтда дост вә гардаш олан Азәрбајҹан Республикасыны сәфәр едәҹәјимә үмидварам. Мән һәр ики өлкәнин халгларына - һәм Иран, һәм дә Азәрбајҹан халгына инкишаф, сәадәт вә тәрәгги арзулајырам”.
АБНА- Хәбәр Аҝентлији
Диггәт: Хәбәрдән истифадә етдикдә мәнбәјә истинад лазымдыр
