Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Илһам Әлијев үчүнҹү дәфә президент күрсүсүнү зәбт едәндән сонра, өзүнә гаршы кими јығылмыш иҹтимаи гәзәби бир нечә мәмуру вәзифәдән ҝөтүрмәклә јумшалтмаг истәди. Мүдафиә назири Сәфәр Әбијеви Дахили Гошунларын команданы Закир Һәсәновла, Әмәк вә Әһалинин Сосиал Мүдафиәси назири Фүзули Әләкбәрову Дөвләт Сосиал Мүдафиә Фондунун рәһбәри Сәлим Мүслүмовла, Тәһсил назири Мисир Мәрданову “Ичәри Шәһәр” Дөвләт Горуг Идарәсинин рәиси Микајыл Ҹаббаровла әвәзләди.
Бу мәмурларын көһнә вәзифәләрини она ҝөрә хатырладырам ки, кимин кими әвәзләдији ајдын олсун. Бу деталлара сонра ајрыҹа јер ајыраҹағыг. Амма мараглы мәгам одур ки, инкишаф вә тәрәгги кими сырынан сон просесләр бизим үчүн һеч дә “гаранлыгдакы гара пишик” һаггында тәсвир дејил. Бизә һәр шеј мәлумдур. Чүнки биз дә бу өлкәдә јашајырыг, амма Илһам Әлијевдән фәргли олараг, биз о назирләрин вә мәмурларын мүдири дејилик. Илһам Әлијев исә Азәрбајҹаны өз ҝәлир конторуна чевириб вә она рәһбәрлик едир. Ишләтдији адамлары да дәјишмәклә инсанларын ҝөзүнә күл үфүрүр, дүшүнүр ки, јаратдығы јаланчы тозанагла нәјәсә наил ола биләр. Амма бу мүмкүндүрмү? Тәбии ки, јох.
Орду өз ганыны ахыдыр
Сәфәр Әбијевин вәзифәдән ҝетмәсинин сәбәбләри сырасында даһа чох әсҝәр өлүмләринин артмасы вә бу фонда һакимијјәтә халгын гәзәбинин бөјүмәси ҝөстәрилир. “Әсҝәр өлүмләринә јох!” етиразлары өлкәдә ҹидди сијаси чахнашма јаратды вә назир өз постуну итирди. Амма вәзијјәт дәјишдими? Әлбәттә, дәјишди. Фәгәт, јахшылыға доғру дејил, писләшмәјә тәрәф. Инди Силаһлы Гүввәләрдә өлүм һаллары Сәфәр Әбијеви һөрмәтлә анмаға имкан верәҹәк гәдәр артыб. Үстәлик, Силаһлы Гүввәләрдә башлајан ҹидди “гисас јохламалары” шәхси һејәтлә марагланмаг үчүн забитләрдә имкан вә вахт гојмур. Индики назир хошу ҝәлмәјән адамлара “көһнә назирин адамлары” дејиб, мәһв едир.
Закир Һәсәнов Сәфәр Әбијевдән фәргли олараг, бир адамдан команда алмыр вә буна ҝөрә дә орду бир нечә ири фигурун дөјүш мејданына чеврилиб. Јаранмыш интизамсызлыг инсан өлүмләри илә нәтиҹәләнир. Артыг интиһар һаллары әсҝәрләрдән забитләрә кечиб. Ади инсанларын өзүнү өлдүрмәси башадүшүләндир. Амма әли силаһлы дөјүшчү өзүнә гәсд едирсә, демәли, онун шәрәфи илә ојнајыблар. Бу тале өнҹә әсҝәрләримизин иди. Амма Закир Һәсәновун сајәсиндә интиһарларын рүтбәси артыб. Азәрбајҹан забитләри дә јашамаг истәмирләр. Һәмишә полис планлары гурмуш Закир Һәсәнов гаршы тәрәф кими, фәал азәрбајҹанлылары дүшүнүб. Инди бири она изаһ етмәлидир ки, Дахили Гошунларын команданындан фәргли олараг, мүдафиә назири халга јох, онун дүшмәнләринә гаршы планлар гурмалыдыр. Бир сөзлә, гардаш сәрһәдин ичи илә чөлүндә ҝөрүләҹәк иши сәһв салыб.
Протез әдаләт
Сәлим Мүслүмов тәхминән јарым илдир ки, назирдир. Амма о садәҹә, рекет гәзетләр кими, анонс вермәклә мәшғул олду. “Гануну позанлары тутаҹағыг” деди, амма тутмады. Сизҹә нијә? Әҝәр ондан әввәл ишләјән назир јахшы ишләјирдисә, ону нијә дәјишдиләр? Јох, доғрудан да бирдәфәлик сосиал јардымларын јарысыны халгдан гамарлајыб алырдыларса, онда һаны бу өлкәнин һәбсханаларындакы назир мүавинләри, рајон сосиал мүдафиә шөбәләринин рәисләри? О адамлара тохунулмајыбса, демәли, јени назир садәҹә, ҝәлдији постун һаггыны чыхартмаг үчүн бу гәдәр сәрт олуб. Бәли, биз буну һәр ҝүн өзүнү јандыран, јандырмаг истәјән Гарабағ ветеранларынын, әлилләринин һәјатындан ҝөрүрүк. Сәлим Мүслүмов алты ај әрзиндә она наил олду ки, Гарабағ дөјүшчүләри налә чәкиб дүзләрә дүшдүләр. Ајағы дизиндән ашағы олмајан әлилләри илдә бир дәфә јохлајыб әлиллик дәрәҹәси верән идарә галырса, демәли, һәлә һеч нә дәјишмәјиб. Дәјишибсә, һөрмәтли охуҹу ҝәлиб етираз еләсин, биз дә биләк. Бәлкә мүавинәтләр, тәгаүдләр артыб? Ола биләр ки, Сәлим Мүслүмов кимләрәсә ҝизли көмәк едир, бизим хәбәримиз јохдур. Мәсәлән, “Азадлыг” гәзетинә, “Азәрбајҹан сааты” програмына шикајәт едәнләрин бөјүк әксәријјәти бу назирлијин јаратдығы сәфаләт бурулғанындан данышырлар. Сәлим Мүслүмов да Фүзули Әләкбәров кими, ишләмәјәнә сосиал јардым вермир. Ишләјәнә јардым верирләр, ишләмәјән исә өлүмә тәрк едилир. Назирлијимиз дарвинист сијасәт һәјата кечирир. Онларын әсас аргументи будур - Иш тапа билмәјән нијә јашамалыдыр ки?! Мәсәлән, Ҝоранбој рајон сакини Әтраф Әлијев доғулуб, бөјүјүб, ермәниләрлә дөјүшүб, евләниб, ушағы да вар. Назирлијимиз дүшүнүр ки, о, инди өлсә јахшыдыр. Һәр шеј едиб, һәтта гәһрәманлыг да...
Сүпүрҝәпулу назири
Азәрбајҹанда тәһсил һеч вахт белә вәзијјәтә дүшмәмишди. Мәсәлән, әввәлки назир Мисир Мәрданов тәһсилдәки бәрбад вәзијјәти шәрһ едәркән белә демишди: “Өзүнә һөрмәт едән адам 200 маната мүәллим ишләмәз”.
Микајыл Ҹаббаров исә садәҹә, пиар ишләрилә мәшғулдур. Һәлә назирлијин әмәкдашлары она изаһ етмәк истәјирләр ки, тәдбирләрдә фотограф зала ондан габаг ҝирмәлидир ки, шәкли өндән чәкә билсин. Дејәҹәксиз ки, бунун нә дәхли вар? Бәли, вар. Аидијјәти одур ки, Микајыл Ҹаббаров Тәһсил Назирлијиндә дә өзүнү горуг мүдири кими апарыр - һеч кими өзүндән габаға бурахмыр. Вә о, Азәрбајҹанда елмин инкишафына дырнагарасы төһфә вермәк үчүн тәјин олунуб. Амма сүпүрҝәпулу һәлә дә дурур. 8 март, мүәллимләрин ад ҝүнү кими “гара бајрамлар” шаҝирдләр тәрәфиндән даһа дәрин һүзнлә гејд едилмәкдәдир. Азәрбајҹанда мүәллимлик јенә дә әлаҹсызлыгдан сечилән пешәдир.
Кимдир ҝүнаһкар?
Әзизләрим, вәтәндашлар, гардашлар, нә гәдәр ки, Илһам Әлијев Азәрбајҹан адлы өлкәни мүхтәлиф сексијалара бөлүнмүш дүкан кими идарә едир, вәзифәдәки мәмурун ким олмасынын һеч бир фәрги јохдур. Илһам Әлијев садәҹә, вахташыры кимисә ҝүнаһкар чыхарыб вәзифәдән атыр ки, өзүнү тәмиз адам кими ҝөстәрсин. Амма бу ојун баш тутмаз, о адамлар ајрылыгда ҝүнаһкар ола билмәзләр, олсалар да, ҝүнаһа шәрик оларлар.
Азадлыг
Диггәт: Хәбәрдән истифадә етдикдә мәнбәјә истинад лазымдыр
