Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Ичәришәһәр "Ҹүмә" мәсҹиди дини иҹмасы вә ДЕВАММ-ын (Дини Етигад вә Виҹдан Азадлыглары Мүдафиә Мәркәзи) тәшкилатчылығы илә БММ-дә (Беjнәлхалг Мәтбуат Мәркәзи) әзиз Ислам Пеjғәмбәри Һәзрәт Муһәммәдин (с) мөвлудуна һәср олунмуш елми конфранс кечирилиб.
Тәдбирә jүзләрлә инанҹлылар, иҹтимаиjjәт нүмаjәндәләри, партиjа рәһбәрләри гатылыб.
Ичәришәһәр “Ҹүмә” мәсҹиди дини иҹмасынын имам ҹамааты Һаҹы Илгар Ибраһимоғлу тәдбири ачыб вә бүтүн ҝәлән гонаглары саламлаjыб. Даһа сонра Гурани Кәримин тилавәт олунмасы илә тәдбир ачыг елан едилиб.
Даһа сонра Әһли-беjт (ә) ашигләри дини jарадыҹылыг групу дәвәт олунуб вә Дөвләт Һимни, ардынҹа исә Ислам Пеjғәмбәринә (с) һәср олунмуш Илаһи охунуб.
Бунун ардынҹа Әзиз Ислам Пеjғәмбәринин (с) Мөвлуду ҝүнү мүнасибәтилә Бакыда тәшкил едилмиш ФЛАСМОБ тәгдим олунуб.
Даһа сонра Һаҹы Илгар Ибраһимоғлу чыхыш едиб: “Бизләр өзүнәмәхсус мүсәлманларыг. Советләрин дағылмасындан сонра дамҹы-дамҹы, һиссә-һиссә өзүмүзә гаjытмышыг.
Пеjғәмбәримиз (с) инсанлығын jарадылыш фәлсәфәсидир. Јарадан илә jарадылан арасында кечид Пеjғәмбәримизлә (с) башлаjыб.
Савадсыз бир топлума хитаб едәркән Пеjғәмбәримиз (с) онлары елмә jиjәләнмәк үчүн Чинә ҝетмәjи төвсиjә едирдисә, инди елмин-маарифин тәрәгги тапдығы ҝүнләрдә әзиз Пеjғәмбәримиз (с) һансы төвсиjәни едәрди?
Суjун гыт олдуғу бир ҹамеәдә тәмизликлә бағлы елә минимал шәртләр гоjуб ки, индики дөврүн инсанларын бәзән тутуму онлара риаjәт етмәjә чатмыр”.
Даһа сонра сөз гонаглар сырасындан Нардаран ағсаггалы Кәрбәлаjи Натигә верилиб: “Мән бурада иштирак едән вә едә билмәjән бүтүн Азәрбаjҹан халгыны бу баjрам мүнасибәтилә тәбрик едирәм. Бурда таныдығәм вә танымадығым чох мүбариз инсанларымыз иштирак едир. Пеjғәмбәрин (с) илк Мөвлудуну кечирән инсанлар һазырда дүнjада jохдур.
Пеjғәмбәрин (с) һаггында о гәдәр дәjәрли инсанлар данышыблар ки, мән Онун (с) һаггында данышмаға аҹизәм. Һәр кәси онун jолу илә ҝетмәjә чағырырам”.
Даһа сонра Мүсават башганы Иса Гәмбәр чыхыш едиб: “Мән Һаҹы Илгара вә сизләрә тәшәккүр едирәм ки, белә ҝөзәл тәдбир тәшкил етмисиниз. Пеjғәмбәримиз (с) сон пеjғәмбәрдир вә дүнjа тарихинә ән чох тәсир етмиш шәхсдир. Буну тәк биз мүсәлманлар деjил, бүтүн бәшәриjjәтин мүтәфәккирләри, апарылмыш сорғулар деjир.
Бизим һәрәкатымызын лидери Әбүлфәз Елчибәj динә чох бағлы инсан иди. Онун бу мөвзуларда чох сөзләрини хатырлаjырам. Онун сөзләриндән бириндә кечирди ки, Аллаһ Тәала Пеjғәмбәрә (с) jахын инсанлар ҝөндәрәр халглар үчүн. Белә инсанлардан бири Мәһәммәд Әмин Рәсулзадә олуб. Билдиjиниз кими, о да динә чох бағлы инсан олуб.
Мән Һаҹы Әликрамы да хатырламаг истәjирәм. Онун да бу дин jолунда зәһмәтләри сонсуз олуб.
Һәр биринизин баjрамыны бир даһа тәбрик едирәм”.
АХҸП сәдринин мүавини Ҝөзәл Баjрамлы: “Мүсәлман кимлиjимизи өjрәнмәк үчүн Пеjғәмбәримизин (с) кечдиjи jолу дәриндән өjрәнмәлиjик. Бу бир дәрjадыр. Һәр биримиз бу дәрjаjа баш вуруб бир дамла ҝөтүрсәк Исламын һәгигәтләрини анлаjарыг.
Пеjғәмбәримиздән (с) өjрәнәҹәjимиз чох шеjләр вар. Һәр биринизин баjрамы мүбарәк олсун”.
Вүгар Баjрамов: “Бир игтисадчы олараг деjә биләрәм ки, бу ҝүн Ислам Пеjғәмбәринин (с) игтисадиjjата бахышы бүтүн дүнjа үчүн нүмунә ола биләр. Ислам банкчылығы игтисадиjjатын даһа узун мүддәтли, даһа даjаныглы инкишафыны тәмин едир”.
Пәнаһ Һүсеjн: “"Дүнjада чох аз инсан вар ки, онларын дүнjаjа ҝәлдиjи ҝүн биз бир биримизи тәбрик едирик. Ве о инсанлардан ән биринҹиси Муһаммәд (с) пеjғәмбәрдир. Бир ҝүн ҝәләҹәк биз һәр биримиз үрәклә, "Ја Муһаммед (с)" деjәҹәjик!" Ҹәмиjjәтимиздә jахшы нә варса, динимиздән, Пеjғәмбәримиздән (с) ҝәлир. Нә бошлуглар, нә чатышмазлыглар варса да, онлары динимизә садиг галмаг, Пеjғәмбәримиздән (с) өрнәк ҝөтүрмәклә арадан галдырмаг олар”.
Мирвари Гәһрәманлы: “Өлкәмиздә әдаләтсизлик, һарамчылыг баш алыб ҝедир. Бунун биринҹи сәбәби инсанларын үрәjиндә Аллаһ севҝисинин олмамасыдыр. Инсанлар Пеjғәмбәрә (с) севҝиси олса, бунлары һамысы ҹәмиjjәтдән jох олуб ҝедәр”.
Илаһиjjатчы Һаҹы Ҹеjһун: “Бу ҝүн бизим үчүн чох әзиз ҝүндүр. Биз Пеjғәмбәри (с) ҝөрмәдән севәнләрик. Амма Она (с) нә гәдәр мәһәббәт вар ки, инсанлар вахт аjырыб, Онун (с) Мөвлудуна гатылыб”.
АХҸП сәдринин мүавини Нурәддин Мәммәдли: “Һәм өз адымдан, һәм дә АХҸП сәдри Әли Кәримлинин адындан һәр биринизи тәбрик едирәм.
Бу ҝүн чох хошдур ки, инсанларымыз дининә, дини етигадына гаjыдыр. Кимсә Пеjғәмбәрин (с) вида чыхышыны вә беjнәлхалг конвенсиjаларыны арашдырыбса, ҝөрәрик ки, бүтүн конвенсиjаларын көкү һәмин чыхышдадыр.
Бизим ән бөjүк проблемимиз ондадыр ки, бизләр Пеjғәмбәримизин (с) ҝөндәрдиjи дәjәрләри jашатмырыг”.
Ариф Һаҹылы: “Чох шадам ки, бу ҝүн Пеjғәмбәрин (с) мөвлуду белә ҝөзәл шәкилдә кечирилир. Биз дин һаггында jалныз jас мәрасимләриндә ешитмәмәлиjик. Бу ҝүн бурада чох дәjәрли чыхышлар олду. Исламын елми ҹәһәтдән таныдылмасы олдугҹа зәруридир. Бир даһа һәр биринизи Мөвлуд ҝүнү мүнасибәтилә тәбрик едирәм”.
Рөвшән Әһмәдли: “Мән дә өз адымдан, һазырда зиндан һәjаты jашаjан Ислам Партиjасынын сәдри Һаҹы Мөвсүм Сәмәдов адындан һәр биринизи тәбрик едирәм.
Һаҹы Илгар бу ҝүн бир нөв нүмунә гоjур орталыға. Ҝөстәрир ки, Ислам маарифчилиjи үчүн имкан, фүрсәт олмадығы барәдә фикирләр бәһанәләрдир.
Азәрбаjҹан ҹәмиjjәтинин вәһдәтини бу мөвлудда ҝөрүрүк. Бу олдугҹа мүсбәт бир һалдыр. Вәһдәт һәфтәсинин бу формада jашадылмасы индики ҹәмиjjәт үчүн олдугҹа зәруридир”.
Сәрдар Јусифоғлу: “Пеjғәмбәр (с) дүнjаjа чох ҝениш бахан инсан иди. Бунун саjәсиндә иди ки, инсанлары өз әхлагы илә ҹәзб едә билмишди.
Бу ҝүн ән бөjүк арзум будур ки, бизләр Пеjғәмбәримизин (с) чағырды елмә jиjәләнә биләк. Еjни заманда, бир-биримизә гаршы Пеjғәмбәрин (с) төвсиjә етдиjи толерантлыға риаjәт едә биләк”.
Бундан сонра диҝәр гонаглар да чыхышлар едибләр.
Тәдбирин сонунда Һаҹы Илгар Ибраһимоғлу чыхыш едиб вә тәдбирә гатылдығына ҝөрә һәр бир кәсә тәшәккүр едиб: “Сәмими ону билдирмәк истәjирәм ки, иҹтимаиjjәт нүмаjәндәләринә дәвәт ҝөндәрәркән фикирләширдим ки, һәр кәс чыхыш едәркән өз пәнҹәрәсиндән jанашаҹаг. Амма онларын һеч биринә мүдахилә етмәмәк гәрарына ҝәлдик.
Үмид едирәм ки, ҝәлән илләрдә дәвәтләримиз даһа ҝениш олаҹаг. Бир даһа бүтүн гонаглара, чыхышчылара тәшәккүр едирәм. Бурада һәр биримизи бирләшдирән ән мүһүм һадисә Рәсулаллаһын (с) Мөвлудудур. Бу ҝүн бундан даһа мүһүм һадисә ола билмәз ки, инсанлар онун әтрафында топлашыб бу ҝүнү геjд етсин”.
Диггәт: Хәбәрдән истифадә етдикдә мәнбәjә истинад лазымдыр
