Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Исламчыларын Һүгугларыны Мүдафиә Комитәси Сабунчу Раjон Мәһкәмәсиндә илаһиjjатчы Тале Бағыровун мәһкәмәси заманы баш верән инсидентлә бағлы мәтбуат конфрансы кечириб.
Илаһиjjатчы Емил Раһилоғлу билдириб ки, һәмин ҝүн - октjабрын 28-дә мүдафиә комитәсинин үзвү кими мәһкәмә просесини изләмәjә ҝедиб. Орада баш верәнләри тәхрибат адландыран Емил Раһилоғлу деjиб ки, мәһкәмә бинасынын jахынлығында просесдән әввәл автобусларда полисләри ҝөрүбләр. Онун сөзләринә ҝөрә, әввәлҹә Пенитенсиар Хидмәтин әмәкдашлары диндарлары мәһкәмә залындан һәjәтә чыхарыблар. Сонра исә полисләр диндарлары мәһкәмә бинасынын һәjәтиндән дә чыхарыб вә бу заман гаршыдурма jараныб: “Мәһкәмә бинасынын һәjәт гапысы дар олдуғундан чыхышда тыхаҹ, ләнҝлик jаранды вә бу заман полисләр диндарлары вурмаға, тәһгир етмәjә, итәләмәjә башладылар. Диндарлар нараһат олдулар вә “Аллаһу-Әкбәр” демәjә башладылар. Гәфләтән Пост-Патрул Хидмәтинин машынлары пеjда олду вә полис диндарлардан jахаладыгларыны һәбс едәрәк машынлара долдурдулар”.
Инсан Һүгуглары Клубунун әмәкдашы, һәмин һадисәләр заманы сахланылмыш һүгуг мүдафиәчиси Ниҹат Имранлы полис бөлмәсиндә онунла бирликдә олан диндарларын дөjүлдүjүнү, ағыр ишҝәнҹәjә мәруз галдыгларыны билдириб: “Бөлмәдән наркотик експертизасына апарыларкән Аббас Һүсеjнову о гәдәр дөjмүшдүләр ки, нәфәс алмаға чәтинлик чәкирди. Мән бөлмәдә изаһат jазанда дөjәнләрин вә дөjүләнләрин сәсиндән гаршымда әjләшән полис забитинин нә дедиjини ешидә билмирдим. Сахланыларкән бизим елементар һүгугларымыза белә һөрмәт гоjулмады, һәтта евә хәбәр вермәjә вә вәкил дәвәт етмәjимизә иҹазә вермәдиләр”.
“Сиjаси Мәһбусларсыз Азәрбаjҹан” Иҹтимаи Алjансынын әмәкдашы Елшән Һәсәнов мәһкәмә гаршысында баш верәнләрлә бағлы материаллар топландығыны деjиб. О билдириб ки, бунунла бағлы Баш Прокурорлуға мүраҹиәт ҝөндәрәҹәкләр.
Дини Етигад вә Виҹдан Азадлыгларынын Мүдафиәси Мәркәзинин сәдри Илгар Ибраһимоғлу исә иҹтимаиjjәти, геjри-һөкумәт тәшкилатларыны, сиjаси партиjалары баш верән һадисәjә биҝанә галмагда иттиһам едиб.
Сонда тәдбир иштиракчылары адындан етираз бәjанаты гәбул олунуб.
Геjд едәк ки, октjабрын 28-дә Сабунчу раjон Мәһкәмәсиндә илаһиjjатчы Тале Бағыровун иши үзрә кечирилән мәһкәмә просесиндә инсидент jашаныб. Исламчыларын Һүгугларынын Мүдафиә Комитәсинин бу барәдә jаjдығы бәjанатда геjд олунуб ки, мәһкәмә просесинин ачыг кечирилмәсинә бахмаjараг, мәһкәмә залынын вә һәjәтинин тәрк едилмәсини тәләб едән дөвләт мәмурлары илә мәһкәмәjә ҝәлмиш вәтәндашлар арасында проблем jараныб. Һадисә илә әлагәдар бир нечә шәхс сахланылыб.
Диггәт: Хәбәрдән истифадә етдикдә мәнбәjә истинад лазымдыр
