Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Октjабрын 9-да кечирилән президент сечкисиндән сонра Азәрбаjҹан һакимиjjәтилә Гәрб арасында гаршыдурма давам едир. АБШ вә Авропанын нүфузлу демократик өлкәләринин сечкинин нәтиҹәләрини танымамасына Азәрбаjҹан һакимиjjәти шантажла ҹаваб верир. Президент Администрасиjасынын (ПА) рәһбәри Рамиз Меһдиjевин АБШ-ын сечки илә бағлы “тәклифи” (Милли Шуранын намизәдинә 22-25 фаиз, Илһам Әлиjевә исә 74-75 фаиз сәс jазылмасы) барәдә сенсасион ачыгламасындан сонра ПА-нын шөбә мүдири Елнур Асланов аналожи фикирләр сәсләндириб.
Һәр ики шәхсин фикирләри АБШ тәрәфиндән тәкзиб едилсә дә, һакимиjjәт шантаж кампаниjасыны давам етдирир. Дүнән Милли Мәҹлисин Һүгуг сиjасәти вә дөвләт гуруҹулуғу комитәсинин сәдри Әли Һүсеjнов да бу барәдә данышыб. О, АПА-jа билдириб ки, тәкҹә АБШ jох, диҝәр беjнәлхалг тәшкилатлар вә jахуд онларын Бакыдакы нүмаjәндәликләри, һәтта мүшаһидәчиләр дә Азәрбаjҹан һакимиjjәтинин тәмсилчиләри илә сөһбәтләрдә еjни тәклифи ирәли сүрүбләр: “Бу ҝөрүшләрин бир чохунун иштиракчысы да олмушуг. Онлар бизә билдирирдиләр ки, әҝәр сечкинин нәтиҹәсиндә Илһам Әлиjев 80 фаиздән чох сәс топлаjарса, бу, беjнәлхалг иҹтимаиjjәт тәрәфиндән гәбул олунмаз, даһа ашағы олса, даһа jахшы олар вә саир... Сечкидән әввәл кечирилән сорғулар Илһам Әлиjевин 80-85 фаиздән дә jүксәк сәс чохлуғуна малик олдуғуну ҝөстәрирди. Сечкидә дә бу нәтиҹә ортаjа чыхды. О заман неҹә сечкинин нәтиҹәсинә мүдахилә етмәк олар? Ахы сечкинин илк нөвбәдә сахтакарлығы бундан ибарәт оларды. Ҝөрүнүр, беjнәлхалг иҹтимаиjjәт үчүн, о ҹүмләдән дә АБШ үчүн белә бөjүк фәрглә сечкидә гәләбә газанмаг тәәҹҹүблү ҝәлир. О өлкәләрдә бу ҹүр jүксәк сәс чохлуғу илә галиб ҝәлән лидер jохдур вә дүнjада үмумиjjәтлә, белә лидерә надир һалларда раст ҝәлинир. Амма бу, Азәрбаjҹан иҹтимаиjjәти үчүн чох нормалдыр вә реаллыгдыр ки, халг өз милли һиссинә даһа чох сөjкәнәрәк лидерләрини дәстәкләjир. Илһам Әлиjевин һәjата кечирдиjи програмлар, ишләр артан темпдәдир вә онун реjтинги jүксәкдир”.
Бу арада башга бир галмагалла бағлы jени мәлумат jаjылыб. Сөһбәт мүдафиә назири Сәфәр Әбиjевлә АБШ-ын Азәрбаjҹандакы сәфири Ричард Морнингстар арасында олан ҝөрүшдә сәфирин фикирләринин тәһриф олунмасындан ҝедир. Мүдафиә Назирлиjи һәмин ҝөрүшдән jаjдығы мәлуматда иддиа едир ки, Ричард Морнингстар сечкинин архада галдығыны, Илһам Әлиjевин галиб ҝәлдиjини деjиб. Лакин бу мәлуматдан дәрһал сонра АБШ сәфирлиjи ачыглама jаjды ки, сәфирин фикирләриндә геjри-дәгиглиjә jол верилиб. Мүдафиә Назирлиjи исә сәфирин сәс jазысыны jаjа биләҹәjини бәjан етди. Дүнән дә Мүдафиә Назирлиjинин НАТО вә Беjнәлхалг Һәрби Әмәкдашлыг Идарәсинин рәиси, ҝенерал-маjор Рамиз Нәҹәфов да сөзүҝедән мәсәләjә мүнасибәт билдириб. О, публика.аз-а ачыгламасында деjиб ки, мүдафиә назири илә АБШ сәфири арасында кечирилән ҝөрүш өзәл олмаjыб. Онун сөзләринә ҝөрә, һәмин ҝөрүшдә һәм АБШ, һәм дә Азәрбаjҹан тәрәфиндән бир нечә шәхс, о ҹүмләдән КИВ үзрә мәсул шәхсләр иштирак едиб: “Бу ҝөрүш дә бүтүн ҝөрүшләр кими протокол гаjдаларына уjғун олараг jазылыб, видео вә фото чәкилиш апарылыб. Сәфирин ҝөрүшү ҝизли jазылмаjыб, буну сәфир өзү дә әввәлҹәдән билиб. Һәтта, сәфирлиjин әмәкдашы да өз геjдләрини апарыб. Сәфир чох jахшы билирди ки, о, тәкбәтәк ҝөрүш кечирмир. Диҝәр тәрәфдән исә АБШ сәфири илә кечирилән ҝөрүш Мүдафиә Назирлиjинин ҝөрүш залында тәшкил олунуб. Биз ил әрзиндә jүзләрлә бу ҹүр ҝөрүш кечиририк вә һәр бир ҝөрүш дә протокол гаjдаларына уjғун олараг геjдә алыныр вә архивләшдирилир. Бу бахымдан да һесаб едирәм ки, АБШ сәфирлиjинин Мүдафиә Назирлиjини ”jаланчы" чыхармасы доғру деjил".
Мүдафиә Назирлиjинин идарә рәиси ҝөрүш заманы сәфир Ричард Морнингстарын сөjләдиjи фикирләрин тәһриф олунуб-олунмамасы мәсәләсинә дә тохунуб. Рамиз Нәҹәфов деjиб: “Әҝәр һәмин ҝөрүш 1 саат чәкибсә, ҹәми онун 2 дәгигәсиндә сечкиләрдән данышылыб. Диҝәр вахтлары исә анҹаг икитәрәфли вә беjнәлхалг әмәкдашлыг, 907-ҹи дүзәлиш вә саирә мәсәләләр мүзакирә олунуб. Һәтта, ҝөрүш заманы АБШ сәфири 907-ҹи дүзәлишин ики өлкә әмәкдашлығына мәнфи тәсир ҝөстәрдиjини вә тезликлә бунун ләғвинә тәрәфдар олдуғуну сөjләjиб. Бундан әлавә, АБШ сәфири ҝөрүш заманы Азәрбаjҹанда кечирилән Президент сечкиләриндән дә данышыб вә деjиб ки, артыг сечкиләр архада галды вә АТӘТ-ин бәзи ирадларына бахмаjараг Илһам Әлиjев галибдир. Бу фикри АБШ сәфири сөjләjиб вә електрон jазысы архивдә дә галыр".
Дүнән һакимиjjәт дүшәрҝәсиндән даһа бир галмагаллы ачыглама ҝәлиб. Ачыгламанын мүәллифи парламентин витсе-спикери Баһар Мурадовадыр. О, һаким Јени Азәрбаjҹан Партиjасынын (ЈАП) саjтына вердиjи мүсаһибәдә долаjысы илә АБШ-да кечирилән президент сечкисинә көлҝә салыб вә Барак Обаманын ганун позунтулары илә сечилдиjини иддиа едиб.
Беләликлә, ҝөрүнән одур ки, Азәрбаjҹан һакимиjjәти сечки сахтакарлығыны етираф етмәк әвәзинә Гәрблә гаршыдурманы дәринләшдкирмәк jолуну тутуб. Бу исә илк нөвбәдә һакимиjjәтин өзү мәнфи нәтиҹәләрә сәбәб ола биләр.
Диггәт: Хәбәрдән истифадә етдикдә мәнбәjә истинад лазымдыр
