Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, өтән ҝүн Ширван Шәһәр Апеллјасија Мәһкәмәсиндә Масаллы рајонунда һәбс олунан 8 диндара Ләнкәран Ағыр Ҹинајәтләр Мәһкәмәсинин апрелин 5-дә чыхардығы һөкмдән апеллјасија шикајәтинә бахылыб.
Мәһкәмә просеси Ширван Шәһәр Апеллјасија Мәһкәмәсиндә һаким Камран Әкбәровун сәдрлији илә саат 10:50 дә башланылды.
Мәһкәмә залына баш редактор Араз Гулијев, Халид Казымов, Зија Таһиров вә Рза Ағалы ҝәтирилиб. Просесдә Масаллы диндарларынын вәкилләри иштирак етмәјиб.
Илк өнҹә һаким билдириб ки, апеллјасија шикајәти верилән Сураҹ Ағајев Күрдәханы Истинтаг Тәҹридханасындан ҝәтирилмәјиб. Сонра Исламчы журналист Араз Гулијев билдирди ки, биз тәләб едирик ки,бизи шәрләјиб һәбс едәнләр јенидән мәһкәмә гаршысында ҹаваб версинләр вә әсасәндә бу ишин башында дајанан кечмиш Масаллы Рајон Полис Шөбәсинин рәис мүавини Әлифаға Казымов мәһкәмә залына мәҹбури ҝәтирилсин. Чүнки Ләнкәран Ағыр Ҹинајәтләр Мәһкәмәсиндә кечирилән просесләрдә дә ачыг ашкар бизим үзүмүзә дуран јаланчы шаһидләрин јалан ифадәләри вә ики зәрәрчәкмишин мәһкәмә залына ҝәтирилмәмәси буну там субута јетирди. Лакин Ләнкәран Ағыр Ҹинајәтләр Мәһкәмәсинин һакимләри бунлары нәзәрә алмајараг бизи там сифаришли һәбслә тәгсирләндирәрәк һәбс етдиләр. Сонра Халид Казымов, Зија Таһиров вә Рза Ағалы баш редакторун дедикләри илә разы олдугларыны вә онларын да бу тәләбини јеринә јетирилмәсини һаким Камран Әкбәровдан хаһиш етдиләр.
Һаким Камран Әкбәров бу сәбәбдән билдирди ки, ҝәлән просесләрдә диҝәр тәгсирләндирилән вә апеллјасија шикајәти вермәјән шәхсләр Намиг Кишијев, Ниҹат Әлијев вә Вүсал Гулијев дә ҝәлән просесләрдә мәһкәмә залына ҝәтирилсин вә гисмән истинтаг апарылараг әсас шаһидләр ҝәлән просесләрдә мәһкәмәјә чағрылсын.
Сонра һаким Камран Әкбәров нөвбәти мәһкәмә просесини август ајынын 22-и саат 11:00 а гәдәр тәхирә салыныб.
Бу ҝүн баш редактор Араз Гулијев вә Масаллы диндарлары Бакы Шәһәр Күрдәханы гәсәбәси 1 сајлы Истинтаг Тәҹридханасындан Шүвәландакы истинтаг тәҹридханасына көчүрүләҹәк.
Хатырладаг ки,өтән просесләрдә Масаллы диндарлары мәһкәмә залына ҝәтирилмәмишдир.
Гејд едәк ки,Масаллы диндарлары вә Исламчы Журналист, Баш Редактор Араз Гулијев өтән ил сентјабр ајында Масаллы рајонунда шәрләнәрәк һәбс олублар.Онлар бејнәлхалг фолклор фестивалы илә әлагәли тәдбирин позулмасына ҹәһд ҝөстәрмәк, динҹ сакинләрә вә полис әмәкдашына хәсарәт јетирмәк иттиһамы илә тутулублар. Журналист Араз Гулијев 8, Халид Казымов 8, Зија Таһиров 7, Рза Ағалы 7, Сураҹ Ағајев 5, Ниҹат Әлијев вә Намиг Кишијев 4 ил 6 ај мүддәтинә азадлыгдан мәһрум едилиб. Вүсал Гулијевә исә 3 ил 6 ҝүн шәрти ҹәза верилиб.
Диггәт: Хәбәрдән истифадә етдикдә мәнбәјә истинад лазымдыр
