Әһли Бејт (әлејһимус сәлам) -АБНА- Хәбәр Аҝентлији- Дүнән һөкумәт јөнүмлү АТВ каналынын хәбәрләр бурахылшында јајымланмыш бир сүжет олдугҹа диггәтими ҹәлб етди. Орада сон заманлар игтидарын бир нөмрәли идеоложи дүшмәнинә чеврилмиш Милли Шуранын сәдри Рүстәм Ибраһимбәјов һаггында данышылырды. Онун ҹәми бир дәфә донуз әтини јемәсини етираф етмәси АТВ-нин гәзәб вулканынын пүскүрмәси илә нәтиҹәләнди. Шимали Кореја тәблиғат машынынын ән бөјүк нүмајәндәләринин һәсәдинә сәбәб ола биләҹәк сүжетдә Рүстәм бәјин донуз әтиндән истифадә етмәси шиддәтлә гынанылды, “һакимијјәтә иддиалы бир мүсәлман” үчүн бунун јолверилмәзлији вурғуланды. АТВ-нин илаһијјатчы мүсаһиби дә бу әмәлин “мүсәлман олараг Гурана етигад едән бир шәхс” үчүн бөјүк ҝүнаһ олдуғуну сөјләди.
2003-ҹү илдән бәри игтидардан шүвәнлијин мүхтәлиф нөвләрини ҝөрмүшүк. Вәтәншүвәнлији, бајрагшүвәнлији, дөвләтчиликшүвәнлији, һәтта кечән илдәки мај һадисәләрини јада салсаг ҝеј-парадшүвәнлији дә. Амма диншүвәнлик илк дәфәдир ки, игтидарда мүшаһидә олунур. Бу диншүвәнлик сијасәтинин иҹрачысы кими АТВ каналынын сечилмәси исә ондан да тәәҹҹүблүдүр. Сөһбәт ефириндә әсасән јары-чылпаг гадынлара вә сексуал ориентасијасы шүбһә доғуран кишиләрә үстүнлүк верән бир каналын дин тәәссүбкеши ролунда ҝүлүнҹ ҝөрүнмәсиндән ҝетмир. Иш ондадыр ки, АТВ-нин дин сијасәти дә әзәлдән дүшмәнчи маһијјәт дашыјырды. Јадыныздадырса, 2010-ҹу илин сонунда орта мәктәбләрдә һиҹаб гадағасы гүввәјә минәндә, “дүнјәви дөвләт” башлығы илә ону әсасландырмаг үчүн силсиләви сүжетләр һазырлајан мәһз АТВ иди. АИП сәдри Мөвсүм Сәмәдов бу гадағаја гаршы мәлум чыхышыны етдикдә, ону “хариҹи гүввәләрин дәјирманына су төкән радикал исламчы” кими тәгдим едән дә АТВ иди. Әксәр дүнја мүсәлманлары тәрәфиндән Ислам пејғәмбәринин (с) чағымыздакы хәлифәси кими гәбул едилән Сејјид Әли Хаменеијә чәкилмиш тәһгиредиҹи карикатуранын ҝөрүнтүләрини дә јајымлајан Рүстәм бәјин донуз әтини јемәсини һәзм едә билмәјән АТВ олмушдур.
Дүнјәви дөвләтдән сөз дүшмүшкән... Әҝәр игтидар һәгигәтән дә иддиа етдији кими дүнјәви дәјәрләрә садигдирсә, онда сырф дини гануну поздуғу үчүн Азәрбајҹан вәтәндашынын өлкәнин апарыҹы телеканалларынын бириндә ашағыламасыны неҹә баша дүшәк? Һаны бәс гулагларымызы мозол етдијиниз толерантлыг? Һаны дини дөзүмлүлүк? Һаны демократија ән нәһајәт?! Һәрчәнд профессора “вәтән хаини”, фәлсәфә доктуруна “наркоман”, һүгугшүнаса “хулиган” дејән бир зеһнијјәтин јеҝанә “Оскар” лауреатлы кино хадимимизә “кафир” вә “мүртәд” демәси һеч дә шашырдыҹы дејил.
Әслиндә дүнјанын ән гаты исламофоб игтидарларындан биринин Ислама үз тутуб сијаси рәгибләринә гаршы “ҹиһад”а кечмәси, онун нә гәдәр критик вә аҹынаҹаглы вәзијјәтдә олдуғуну ҝөстәрир. Милли Шуранын јарадылмасы илә игтидарын тәлашы өзүнүн кулминасија нөгтәсинә чатды. “Ибраһимбәјов донуз әтини једи, дин әлдән ҝетди, мүхалифәт кафир олду!” шүары илә кечирилән “ҹиһад”ын мәһз Милли Шуранын сәдринә гаршы јөнәлмәси бу фикири бир даһа тәсдиг едир. Амма Рүстәм бәјә “подложит свинју” ҹәһдинин ифласа уғрадығыны гәтијјәтлә сөјләмәк мүмкүндүр. Чүнки һиҹабы гадаған етмиш, азана, саггала, дини мәрасимләрә сајсыз-һесабсыз мәһдудијјәтләр гојмуш, бүтүн бунлара етираз етдикләри үчүн јүзләрлә алим вә сырави диндары исә зиндана атмыш бир һөкумәтин дин тәәссүбүнә ағылы башында олан һеч кәс инанмаз.
Беләликлә, дин картынын игтидар үчүн мәгсәд јох, васитә олдуғу ҝүн кими ајдын олур. Гурани-Кәримин “Әнкәбут” сурәсиндә дејилдији кими: “Онлар ҝәмијә миндикләри заман, дини јалныз Аллаһа мәхсус едәрәк, Она јалварырлар. Аллаһ онлары хилас едиб гуруја чыхаран кими, јенә дә Она шәрик гошурлар”. Башга ајәдә исә дејилир: “Биз Аллаһа вә гијамәт ҝүнүнә иман ҝәтирдик“, -дејирләр. Онлар елә ҝүман едирләр ки, Аллаһы вә мөминләри алдадырлар. Билмирләр ки, әслиндә анҹаг өзләрини алдадырлар. Онларын үрәјиндә мәрәз вар. Аллаһ онларын мәрәзини даһа да артырар. Јалан дедикләри үчүн онлар шиддәтли бир әзаба дүчар олаҹаглар!”.
Асим Мәммәдов
Диггәт: Хәбәрдән истифадә етдикдә мәнбәјә истинад лазымдыр
