Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән һәзрәт Ајәтуллаһ әл-үзма Мәкарим Ширази базар ертәси ҝүнү Бүтүн Гафгаз Мүсәлманлары Идарәсинин сәдри һаҹы Аллашүкүр Пашазадә илә ҝөрүшүндә Иран Ислам Республикасынын Азәрбајҹан вә Гафгаз реҝиону илә гоншулуғуна ишарә едәрәк вурғулајыб: "Исламда гоншулар вә онларла јахшы мүнасибәт чохлу сифариш олунмушдур. Белә ки, Әмир әл-мөмининин (ә) кәламында ҝәлмишдир ки, Пејғәмбәр (с) гоншулар барәдә о гәдәр төвсијә едирди ки, елә бил гоншулар бир-бирләринә гоһумдурлар".
Тәглид мәрҹәси гоншуларын дүшмән һијләләри гаршысында ајыглыг ҝөстәрмәләринә дә ишарә едәрәк дејиб: "Дүшмәнләрин бизим арамызда ајрылыг салмасына, суи-зәнн вә анлашылмазлыг јаратмаларына иҹазә вермәмәлијик".
О, мүсәлманлар арасында һәр нөв ихтилаф вә тәфригәни дүшмән мејданында һәрәкәт адландырараг дејиб: "Исламын дүшмәнләри мүхтәлиф һијләләрлә мүсәлманлары бир-биринин ҹанына салмаг вә онлар арасында тәфригә јаратмаг истәјирләр. Һал-һазырда бир нечә Ислам өлкәсиндә мүсәлманлар дүшмән һијләләри нәтиҹәсиндә бир-бирини өлдүрүр вә бу дурумдан јалныз дүшмән хејир ҝөтүрүр".
Тәглид мәрҹәси Шејхүл-Ислам Аллашүкүр Пашазадәјә хитаб едәрәк дејиб: "Бизим ешитдикләримизә әсасән, сизин Азәрбајҹан вә Гафгаз реҝионунда нүфузунуз вардыр. Өз нүфуз вә тәсирли олмағыныздан дүшмәнин һијләләрини мәһв етмәк вә мөвҹуд проблемләрин һәлли үчүн истифадә един. Сизин бу сәфәриниз мүтләг бизимлә Азәрбајҹан вә Гафгаз реҝиону арасында достлуғун даһа да дәринләшмәсинә сәбәб олаҹаг".
Ајәтуллаһ Мәкарим Ширази артырыб: "Өз мөвгеиниздән истифадә едәрәк мүсәлман халгын азад олмасына, өз дини мәрасимләрини иҹра едә билмәләринә чалышын. Чүнки онлар өз дини мәрасимләринин кечирилмәсиндә нә гәдәр азад олсалар, һөкумәтлә халгын бағлантысы бир о гәдәр мөһкәм олар".
О даһа сонра дејиб: "Мән Азәрбајҹан Президентинә тәклиф етдим ки, халгла асан рәфтар етсин вә зинданда олан бәзи дини шәхсијјәтләри азад етсин. Бунун һәм өлкә халгы, һәм дә гоншу өлкәләрин халгы арасында јахшы тәсири вардыр".
Тәглид мәрҹәси дејиб: "Лап гәдим дөврләрдән бизим азәрбајҹанлыларла јахшы мүнасибәтләримиз вардыр вә инди дә бу мүнасибәтләр өз гүввәсиндә галыр. Биз онлары гејрәтли, шүҹаәтли, мәһәббәтли инсанлар кими таныјырыг. Арзу едирик ки, јахындан сизин аранызда олмаг вә сизин дәвәтинизи гәбул етмәк үчүн мүвәффәг олаг".
О һәмчинин Азәрбајҹан вә Иран алимләринин даһа артыг мүнасибәт јаратмаларына, елми-мәдәни әлагәләр гурмаларына тәкид едәрәк, достлуг бағлантыларынын даһа да мөһкәмләндирилмәсини истәди вә буну һәр ики өлкәнин хејриндән әлавә бүтүн мүсәлманлаын хејри адландырыб.
Гејд едәк ки, бу ҝөрүшүн әввәлиндә Шејхүл-Ислам Пашазадә Гафгаз вә Азәрбајҹан халгынын сәмими саламларыны һәзрәт Ајәтуллаһ Мәкарим Ширазијә чатдырмыш вә бу тәглид мәрҹәсини Азәрбајҹана вә Гафгаза сәфәр етмәсини дәвәт етмишдир.
Диггәт: Хәбәрдән истифадә етдикдә мәнбәјә истинад лазымдыр
