Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Һиҹаб Мәһбус, Руһани Абҝүл Сүлејманов медианын суалларыны ҹавабландырыб.
2011-ҹи илин август ајында мөвҹуд әлијевләр режими тәрәфиндән ШӘРЛӘНӘРӘК һәбс олунан Абҝүл Сүлејманов Бакы Ағыр Ҹинајәтләр Мәһкәмәсинин чыхардығы һөкмлә 11 ил мүддәтинә азадлыгдан мәһрум едилиб. О, ГОНДАРМА милли, ирги, сосиал вә ја дини нифрәт вә дүшмәнчилијин салынмасы, иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә, наркотик вә одлу силаһ сахлама иттиһамлары илә тәгсирли билиниб. Руһани Бакынын Бута гәсәбәсиндәки 13 сајлы Ҹәзачәкмә Мүәссисәсиндә сахланыр.
- Сәһһәтиниз неҹәдир?
- Аллаһа шүкурләр олсун, сәһһәтим јахшыдыр, шикајәтим јохдур. Амма јахынларымла ҝөрүшмәкдә чәтинлик јарадылыр. Сахландығым ҹәзачәкмә мүәссисәсинә ҝәлән јолун нә вәзијјәтдә олдуғуну чохлары билир. Апрелин 28-нә ҝөрүш тәјин едилмишди, јахынларым һәмин ҝүн ҝәлди, амма рәис јохдур бәһанәси илә ҝөрүш верилмәди. Ҝери гајыдыб ертәси ҝүн ҝәлдиләр, ҝөрүшдүк.
Там мәлуматсызам, тәҹрид едилмишәм, мәни сыхан будур.
- Сизин Гобустан һәбсханасына ҝөндәриләҹәјиниз һагда мәлумат јајылыб. Сәбәб кими низам-интизам гајдаларына риајәт етмәмәјиниз вә мәһбуслар арасында дини тәблиғат апармағыныз ҝөстәрилиб. Мәһбуслар арасында дини тәблиғат апарырсынызмы? Сахландығыныз мүәссисәдә нәзарәтчиләрлә һансыса инсидентиниз олубму?
- Февралын 1-дән – ҹәзачәкмә мүәссисәсинә ҝәлән ҝүндән карсердә сахланырам. Мәнә гаршы мүнасибәт ачыг-ашкар гәрәзлидир. 12 квадратметр саһәси олан гапалы бир отагдыр, мәндән башга бир нәфәр сахланыр. Белә вәзијјәтдә нә тәблиғат апармаг олар? Гондарма, сахта иттиһамларла шәрләниб тутулмушам, бурада да ејни вәзијјәт давам едир.
- Исламчыларын президент сечкисиндә иштиракы илә бағлы нә дүшүнүрсүнүз?
- Азәрбајҹанда индијә гәдәр демократик сечкинин кечирилмәдији һамыја мәлумдур. Сабиг университет ректору Елшад Абдуллајев дә видеолары илә буну сүбут етди. Хариҹә күрү, пул, нефт, газ өтүрмәклә өз һакимијјәтләрини горујурлар. Депутат олмаға ҝөрә бир милјон верилирсә, президент олмаг үчүн милјардлар хәрҹләнир.
Истәнилән һалда сечкидә иштирак етмәк һәр вәтәндашын борҹудур, јалныз бу јолла талејимизи дәјишә биләрик. Һамы әл-әлә вериб сечки сахтакарлығынын гаршысыны алмалы, 10 ил әввәл бурахылмыш сәһвләри тәкрарламамаг үчүн мүбаризә апармалыдыр. Исламчыларын кимә сәс вермәсинә ҝәлинҹә, бу барәдә јалныз намизәдләрлә таныш олдугдан сонра фикир билдирә биләрәм. Амма коррупсија, Һиҹаб Гадағасы, ганунсуз һәбсләр индики игтидара сәс вермәјә јер гојмур. Исламчылар, о ҹүмләдән мән чыхышларымызда һәмишә өлкәдә олан бүтүн ганунсузлуглары, һагсызлыглары, Гарабағ проблемини, наркотиклә халгы алудә етмәни, диҝәр проблемләри өнә чәкирик. Бүтүн ганунсузлуглара гаршы мүбаризә апарырыг вә бу јолу тутан бүтүн тәшкилатларла бир јердә олмаға һазырыг.
- Исламчыларын сечкидә ваһид гүввә кими чыхыш етмәсини тәмин етмәк үчүн нә етмәк лазымдыр?
- Ислам һәрәкатынын ваһид сијаси гүввәјә чеврилмәси үчүн ваһид лидер олмалыдыр. Анҹаг бу ҝүн өзүндә лидер ҝүҹүнү һисс едән бүтүн мөминләр шәрләнәрәк зиндана атылыб. Бу аддым һакимијјәтин горхдуғуну ҝөстәрир. Елә бу һәрәкәтләри илә һөкумәт һәрәкатын ҝеҹ-тез ваһид гүввәјә чеврилмәсинә тәкан верир. Бүтүн лидерләрин һәјатлары зиндандан кечир.
- Мүхалифәтлә бирлик дејәндә конкрет һансы гүввәләри нәзәрдә тутурсунуз? Һансы гүввәләрлә бирлијиниз мүмкүндүр?
- Бу ҝүн мүхалифәт ваһид намизәд әтрафында бирләшсә, исламчылар онларла бир јердә олар.
- Азәрбајҹан диндарларыны бир гајда олараг Иранла ҝизли әлагәләрдә сучлајырлар. Бу шүбһә һарадан гајнагланыр?
- Исламчылары Иранла ҝизли әлагәдә сучламағы һөкүмәт артыг уғурсуз бир аләтә чевириб. Буну даим бир карт кими әлиндә бајраг едир. Амма зиндана тәкҹә исламчылары дејил, Гәрб јөнүмлү шәхсләри дә салырлар. Јәни һөкүмәтин давасы азад фикирли инсанлара гаршыдыр. Һөкүмәт бәзән мүхалифәти әсассыз олараг ермәнипәрәстликдә иттиһам етдији кими бизи дә бу ҹүр ләкәләјир.
Диггәт: Хәбәрдән истифадә етдикдә мәнбәјә истинад лазымдыр
