Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән 9 ордибеһишт, 1392 (Һиҹри Шәмси) ил, 29 апрел 2013 (Милади Тарихи) илинә тәсадүф едән “Үләма вә Ислам Ојанышы Бејнәлхалг Конфрансы”нда Имам Хаменеи ҹәнабларынын охудуглары бәјанатынын там мәтни.
Бағышлајан вә Меһрибан Аллаһын ады илә
Сиз әзиз гонаглара хошҝәлдин дејирәм. Әзиз вә Рәһмли Аллаһдан диләјирәм ки, бу коллектив фәалијјәтләрә бәрәкәт версин вә ону мүсәлманларын тәрәггисиндә тәсирли аддым бујурсун. Һәгигәтән, О, ешидән вә гәбул едәндир.
Бу иҹласда һаггында данышаҹағыныз Ислам Ојанышы мөвзусу һазырда Ислам дүнјасынын вә Ислам үммәтинин ән актуал мәсәләсидир. Бу бөјүк һадисә Аллаһын изни илә сағлам шәкилдә давам етсә, јахын ҝәләҹәкдә Ислам үммәтинә вә бүтүн бәшәријјәтә Ислам сивилизасијасыны әрмәған едәҹәк.
Бу ҝүн бизим ҝөзләримиз өнүндә баш верән вә һеч бир мәлуматлы инсанын инкар едә билмәдији мәсәлә будур ки, Ислам дүнјанын иҹтимаи вә сијаси һадисәләринә тәсирсиз мөвгедән чыхыб тәјинедиҹи амилләрин мәркәзиндә мүһүм јер тутмушдур вә һәјата, сијасәтә, һакимијјәтә вә иҹтимаи дәјишикликләрә даир јени консепсија тәгдим едир. Коммунизм вә либерализмин ифласындан сонра дәрин елми вә нәзәри бошлуғун јарандығы индики дүнјада бу, әһәмијјәтли вә мәналы феномен сајылыр. Бу, Шимали Африкада вә әрәб реҝионунда баш верән сијаси вә ингилаби һадисәләрин бејнәлхалг мигјасда бурахдығы илк тәсирдир. Вә бунун өзү ҝәләҹәкдә баш верәҹәк даһа бөјүк һадисәләри мүждәләјир.
Һеҝемон вә иртиҹа дүшәрҝәләринин сөзчүләринин һәтта адыны белә сөјләмәкдән чәкиндикләри вә горхдуглары Ислам ојанышынын әламәтләрини тәхминән бүтүн Ислам дүнјасында ҝөрмәк олар. Онун ән ајдын әламәти иҹтимаи рәјин, хүсусән дә ҝәнҹ тәбәгәләрин Исламын әзәмәтинин дирчәлдилмәсинә, бејнәлхалг истисмарчы системин маһијјәтини өјрәнмәјә, ики јүз илдән артыг мүддәтдә мүсәлман вә гејри-мүсәлман шәрги өз ганлы пәнҹәләри арасында сыхан, мәдәнијјәт вә сивилизасија пәрдәси алтында халглары өзүнүн рәһмсиз вә тәҹавүзкар амбисијаларына гурбан верән һөкумәт вә мәркәзләрин һәјасыз, залым вә һеҝемон сималарынын ашкара чыхмасына ҝөстәрдији һәвәсдир.
Бу мүбарәк ојанышын әһатәси ҝенишдир, әсрарәнҝиз шәкилдә давам едир. Шимали Африканын бир нечә өлкәсиндә әлдә едилән наилијјәтләр гәлбләрдә бөјүк нәтиҹәләрә әминлик јарада биләр. Илаһи вәдләрин мөҹүзәли реаллашмасы үмидвериҹи нишанәдир вә гаршыда даһа бөјүк вәдләрдән мүждә верир. Гуранын Мусанын анасына ики вәди һаггында данышдыглары бу илаһи тактиканын нүмунәсидир.
Көрпәнин суја атылмасы әмри верилән ағыр анда илаһи вәд бу олду: “Биз Мусанын анасына: “Ону әмиздир; елә ки ондан өтрү горхдун, ону дәрјаја (Нил чајына) ат. (Ушағын суда боғулаҹағындан) Горхма вә (ајрылығына) кәдәрләнмә. Биз ону сәнә гајтараҹаг, өзүнү дә шәриәт саһиби олан пејғәмбәрләрдән едәҹәјик!” – дејә билдирдик.” (Гәсәс, 7)
Ананы раһатлатмаг үчүн верилән бу кичик вәдин ардынҹа чох бөјүк вә тәбии ки, әзаб-әзијјәт долу, узун мүбаризә вә дөзүмлүлүк тәләб едән рисаләт вәди ҝәлди: “Беләликлә, ҝөзү ајдын олсун, (оғлунун ајрылығына) кәдәрләнмәсин вә Аллаһын вәдинин һагг олдуғуну билсин дејә, (Мусаны) анасына гајтардыг”. (Гәсәс, 13) Бу доғру рисаләт вәди гыса заман сонра ҝерчәкләшди вә тарихин истигамәтини дәјишдирди.
Диҝәр бир нүмунә шәриф евә һүҹум едәнләр гаршысында илаһи гүдрәтин зәфәринин хатырладылмасы иди. Аллаһ инсанлары Бөјүк Пејғәмбәр васитәсилә һәвәсләндирир: “Бу евин Рәббинә ибадәт етсинләр!” (Гурејш, 3); “Мәҝәр (Рәббин) онларын һијләсини боша чыхартмадымы?! ( Фил, 2) Јахуд севимли пејғәмбәрини мәнән ҝүҹләндирмәк вә “Рәббин сәни нә тәрк етди, нә дә сәнә аҹығы тутду” (Зуһа, 3) вәдинә инандырмаг үчүн "Мәҝәр О сәни јетим икән тапыб сығынаҹаг вермәдими?! Сәни шашгын (јахуд: ушаг вахты Мәккә вадисиндә азмыш) вәзијјәтдә тапыб јол ҝөстәрмәдими?!" (Зуһа, 6-7) немәтләрини јада салыр. Гуранда белә нүмунәләр чохдур. Иранда Ислам гәләбә чалыб, Американын вә сионизмин чох һәссас олан бу реҝионун ән һәссас өлкәләриндән бириндә јерләшән галасыны фәтһ едәндә ибрәт вә һикмәт саһибләри билдиләр ки, дөзүм вә аҝаһлыг олан јердә диҝәр зәфәрләр бир-биринин ардынҹа ҝәләҹәк; вә ҝәлди дә.
Ислам Республикасынын дүшмәнләр тәрәфиндән етираф олунан бүтүн парлаг наилијјәтләри илаһи вәдә инамын, дөзүмлүлүјүн, мүгавимәтин вә Аллаһдан јардым истәмәјин сајәсиндә әлдә олунмушдур. Бизим халгымыз ҝәрҝин дурумларда "Артыг јахаландыг" (Шүәра, 61) дејән зәиф инсанларын тәһрики гаршысында "Хејр, Рәббим мәнимләдир. О, мүтләг мәнә јол ҝөстәрәҹәкдир!" (Шүәра, 62) фәрјадыны уҹалтмышдыр.
Бу дәјәрли тәҹрүбә бу ҝүн һеҝемонлуғун вә авториторизмин гаршысында ајаға галхыб Американын фәрманына мүнтәзир дајанан асылы вә фәсадлы режимләри девирмиш, јахуд силкәләтмиш халгларын ихтијарындадыр.
Мүгавимәт, дөзүмлүлүк, аҝаһлыг вә "Аллаһ Она јардым едәнләрә, шүбһәсиз ки, јардым едәр. Һәгигәтән, Аллаһ јенилмәз гүввәт, гүдрәт саһибидир!" вәдинә ҝүвәнмәк Ислам сивилизасијасынын зирвәсинә чатана гәдәр Ислам үммәти үчүн бу шәрәфли јолу ачыг сахлајан амилдир.
Мүхтәлиф Ислам өлкәләринин вә мәзһәбләринин тәмсилчиләри олан үммәт алимләринин топландығы бу мүһүм мәҹлисдә Ислам ојанышына даир бир нечә мәсәләјә тохунмағы лазым билирәм.
Биринҹи мәсәлә будур ки, биринҹи мүстәмләкәчиләрин бу реҝион өлкәләринә ҝәлдији заман бурада илк ојаныш далғалары әксәрән дин алимләри вә дини ислаһатчылар тәрәфиндән јарадылды. Сејид Ҹамаләддин, Мәһәммәд Әбдүһ, Мирзә Ширази, Ахунд Хорасани, Маһмуд әл-Һәсән, Мәһәммәд Әли, Шејх Фәзлуллаһ, Һаҹаға Нуруллаһ, Әбүләла Мөвдуди кими дәјәрли рәһбәр вә шәхсијјәтләрин, һабелә Иран, Мисир, Һиндистан вә Ирагдан олан онларла мәшһур, бөјүк, мүҹаһид вә нүфузлу руһанинин ады тарихин сәһифәләриндә һәмишәлик гејд олунмушдур.
Мүасир дөврдә Бөјүк Имам Хомејнинин парлаг ады Иран Ислам Ингилабынын башы үзәриндә улдуз кими ишыг сачыр. Бундан әлавә, бу ҝүн вә дүнән јүзләрлә мәшһур, минләрлә гејри-мәшһур алим мүхтәлиф өлкәләрдә бөјүк вә кичик ислаһат ишләриндә мүһүм рол ојнамышлар. Һәсән әл-Бәнна вә Игбал Лаһури кими гејри-руһани дин ислаһатчыларынын сијаһысы да узун вә һејрәтамиздир.
Руһани вә дин хадимләри һәр јердә аз-чох халгын дүшүнҹә мәнбәји вә психоложи дајағы олмушлар. Онлар һансы бөјүк һадисәдә рәһбәр вә габагҹыл олмушларса, тәһлүкәләр гаршысында халгын өн сыраларында һәрәкәт етмишләрсә, онларла халг арасындакы дүшүнҹә рабитәси артмыш, инсанлара тәсир ҝүҹләри чохалмышдыр. Бу, Ислам ојанышы һәрәкатына фајдалы олдуғу гәдәр һәм дә үммәтин дүшмәнләринә, Ислама әдавәт бәсләјәнләрә вә Ислам дәјәрләринин һакимијјәтинә гаршы чыханлара проблем јарадыр. Онлар дини мәркәзләрин дүшүнҹә гајнаглығыны алмаға вә онларын әвәзинә јени гүтбләр тәгдим етмәјә чалышырлар. Тәҹрүбәдән билирләр ки, онларла милли принсип вә дәјәрләр үзәриндән асанлыгла базарлыг етмәк олар. Тәгвалы дин алимләри вә өһдәчи дин хадимләри илә исә бу мүмкүн дејил.
Бу, дин алимләринин вәзифәсини даһа ағырлашдырыр. Онлар дүшмәнин һијлә вә фәндләрини өјрәнмәли, чох диггәт вә сајыглыгла тәсир јолуну там бағламалы вә ону накам гојмалыдырлар. Рәнҝарәнҝ дүнја сүфрәләриндә әјләшмәк ән тәһлүкәли мәсәләдир. Пул вә ҝүҹ саһибләринин бәхшишинә булашмаг, еһтирас вә һакимијјәт тағутлары илә дуз-чөрәк кәсмәк халгдан ајыран, онун инам вә етимадыны јох едән ән тәһлүкәли амилдир. Зәиф инсанлары һаким гүввәләрә доғру чағыран мәнәмлик вә вәзифә һәвәси фәсад вә азғынлыға сәбәб олан амилдир. Гуранын бу ајәсини һәмишә јадда сахламалысыныз: "Биз бу ахирәт јурдуну јер үзүндә тәкәббүрлүк етмәјәнләрә вә фитнә-фәсад төрәтмәјәнләрә гисмәт едәрик. (Ән ҝөзәл) агибәт анҹаг тәгвалылара мәхсусдур!" (Гәсәс, 83)
Бу ҝүн үмидвериҹи Ислам ојанышы дөврүндә бәзән бир тәрәфдән Америка вә сионизм муздурларынын етимадсыз дүшүнҹә мәркәзләри јаратмаға даир сәјләрини, диҝәр тәрәфдән дә шәһвәтпәрәст гарунларын диндар вә тәгвалы гүввәләри өзләринин зәһәрли вә чиркин сүфрәләринә отуртмаг ҹәһдләрини ҝөстәрән сәһнәләр мүшаһидә олунур. Дин алимләри вә дин хадимләри бундан чох еһтијатлы олмалыдырлар.
Икинҹи мәсәлә мүсәлман өлкәләриндә Ислам ојанышы үчүн узунмүддәтли мәгсәд тәсвир етмәкдир. Бу, халгларын ојанышына истигамәт вериб онлары сәсләјән уҹа нөгтәдир. Бу мәгсәди таныдыгдан сонра јол хәритәси јазыб орта вә јахын мәгсәдләри мүәјјән етмәк олар.
Бу сон мәгсәд "парлаг Ислам сивилизасијасы јаратмаг"дан кичик бир мәгсәд ола билмәз. Бүтүн Ислам үммәти халг вә өлкәләр форматында Гуранын истәдији сивилизасијаја малик олмалыдыр. Бу сивилизасијанын әсас үмуми сәҹијјәси инсанларын бүтүн мадди вә мәнәви потенсиаллардан истифадә етмәсидир. Аллаһ бу имканлары онларын сәадәти вә инкишафы үчүн тәбиәтдә вә өз вүҹудларында јаратмышдыр. Бу сивилизасијанын заһири ҝөзәллијини халг һакимијјәтиндә, Гурандан алынмыш ганунларда, иҹтиһадда, бәш
