Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән ҹари илин апрел ајынын 10-да, Фатимеји-Зәһра (сәламуллаһи әлејһа) әзадарлығынын фәалларындан бири, Ләнкәран рајон Веләди кәнд сакини, полис тәрәфиндән дөјүләрәк шәһид едилиб.
Фаҹиә илә бағлы, Талыш Ағсаггаллар Шурасы тәрәггипәрвәр бејнәлхалг иҹтимаијјәтә, инсанлыҝы, һаггы, әдаләти итирмәјән Азәрбајҹан вәтәндашларына, иҹтимаи, дини бирликләрә, сијаси тәшкилатлара мүраҹиәт үнванлајыблар. Мүраҹиәти олдуғу кими хидмәтинизә тәгдим едирик:
Талыш Ағсаггаллар Шурасынын
МҮРАҸИӘТИ
Апрелин 10–да, Ләнкәран Рајон Веләди кәнд сакини, үч ушаг атасы 44 јашлы Бабајев Ҹәмил Рајон Полис Шөбәсиндә дөјүләрәк өлүмҹүл һала салынмыш, из итирмәк мәгсәди илә полис бинасынын пәнҹәрәсиндән ашағы тулланылмышдыр. Полис ишчиләри әввәлҹә ону рајондакы Диагностика Мәркәзинә, сонра исә онколожи (?) мәркәзә апарыблар... Лакин онун һәјатыны хилас етмәк мүмкүн олмамышдыр.
Аилә үзвләринин тәкидли ахтарышындан вә тәләбиндән бир ҝүн сонра ағыр вәзијјәтдә Ҹ. Бабајевә мүалиҹә проседурасы апарылмадан, талејин умидинә атылмыш вәзијјәтдә тапыблар. Биз бу һалы һакимијјәтин өз вәтәндашларына гаршы вәһши мүнасибәтин, өзбашыналығын, мәмур ҹинајәтләринин, ганунлара һөрмәтсизлијинин ади һал алмасынын ән бариз нүмунәси кими гијмәтләндиририк. Бу кими вәһшиликләрә истәр Талыш бөлҝәсини тәмсил етмә иддиасында олан, истәрсә дә Республика вә бејнәлхалг сәвијјәдә фәалијјәт ҝөстәрән иҹтимаи, дини, сијаси партија вә бирликләрин, гејри-һөкүмәт тәшкилатларынын бу һагсызлыға биҝанә галмасы тәәссүф доғурур.
Һазырда Азәрбајҹан Республикасында һәр бир инсанын һәјатынын һөкумәт органлары тәрәфиндән тәһлүкәјә мәруз гала билмәси, полисин игтидары халгын гәзәбиндән горумаға хидмәт етмәси бир фактдыр. Бунунла јанашы, вәтәндашларын сәрбәст топлашма кими Конститусија һүгугунун нәинки иҹтимаи јерләрдә, һәтта шәхси мүлкләриндә белә реаллашдырылмасына иҹазә верилмәмәси, кобуд полис мүдахиләси илә дағыдилмасы өлкәдә артыг сырф диктатура вә гејри- рәсми олараг фөвгәладә вәзијјәт режиминин бәргәрар едилмәсинин там тәсдигидир...
Талыш Ағсаггаллар ШурасЫ бүтүн бу һаллара гәти етиразыны билдирмәклә бүтүн һаггсевәр, инамлы, әгидәли инсанлары, бирләшәрәк диктатуранын дајандырылмасын тәләб етмәјә ҹағырыр.
Талыш Ағсаггаллар Шурасы.
Азер Лерикли Талыш
Хәбәрлә бағлы әтрафлы мәлумат алмаг истәјәнләр ашағыдакы линкләрә тыкласынлар:
1 Полис Ләнкәранда Ханым Зәһра (с) Мәҹлисинин фәалыны 4-ҹү мәртәбәдән һәјәтә атды + Видео
2 Ханым Фатимә (с) Әзадарлығынын Азәрбајҹан үзрә илк Шәһиди Ләнкәранда дәфн олунду + Видео
Диггәт: Хәбәрдән истифадә етдикдә мәнбәјә истинад лазымдыр
