Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Британија шаһзадәси Ендрју буҝүнләрдә Бакыда кечирилән Үмумдүнја Игтисади Форумунда иштирака вә хүсусән, Илһам Әлијевлә ејни маса архасында шам етдијинә ҝөрә өлкәсиндә тәнгид атәшинә тутулуб. Британијалы депутатлар, һүгуг мүдафиәчиләри “гәддар диктаторла ҝөрүшә ҝөрә” һөкумәтдән изаһат тәләб едир. Сон бир нечә ҝүндә Британијанын бир сыра медиа органлары бу һагда суалларла Букинҝем сарајына мүраҹиәт едиб.
Әлијевлә ҝөрүшә ҝөрә шаһзадәнин кәскин тәнгид олундуғу мәгаләләрдән бири дә Британијанын нүфузлу “Даилј Маил” гәзетиндә јајымланыб. Мүәллифләр Һик Крејвн вә Уилл Стјуартын гәләмә алдығы “Шаһзадә Ендрју деспотун наһар масасына гајытды...” башлыглы мәгаләнин тәрҹүмәсини тәгдим едирик:
Коррупсијалашмыш режимин башчысы илә ејни маса архасында...
Јорк Һерсогу өз аддымы илә јени дипломатик галмагал јаратмаға риск едиб. Һәрчәнд, гәддар диктаторун тәшкил етдији зәнҝин шам сүфрәсинә гонаг олмасыјла бағлы бундан әввәл иттиһамлар ортаја чыханда о, иддиа едирди ки, һәмин маса архасында әјләшмәклә садәҹә, Бөјүк Британијаны тәмсил едиб.
Британијанын рәсми тиҹарәт нүмајәндәси вәзифәсиндән мәҹбури истефа верәндән тәхминән ики ил сонра шаһзадә Ендрју кечмиш совет өлкәси олан Азәрбајҹанда бир тәдбирдә иштирак етди. Һәмин тәдбирдә һөкумәт рәһбәрләри, сијасәтчиләр, банкирләр вә нефт ширкәтләринин рәһбәрләри дә иштирак едирди.
Өтән һәфтә кечирилән тәдбирдә о, Мәркәзи Асијанын игтисади перспективилә бағлы фикирләрини бөлүшдү. Бахмајараг ки, онун белә бир ачыглама вермәк үчүн һеч бир рәсми сәлаһијјәти јохдур.
Сијаси рәгибләрини һәбс еләтдирән, өлкәсиндәки фәал инсанлара ишҝәнҹә вердирән, сечкиләри сахталашдыран, коррупсијалашмыш режимин башчысы Илһам Әлијевлә бир маса архасында әјләшмәсини депутатлар, һүгуг мүдафиәчиләри дә кәскин тәнгид етдиләр.
Шам сүфрәсиндән сонра Ендрју гыса чыхышыјла маса әтрафындакылара белә мүраҹиәт етди: “Ҹәнаб президент, ханымлар вә ҹәнаблар! Сизләр бу ҝеҹәдән зөвг алырсыныз. Мәним Бөјүк Британијадан башга тәмсил едәҹәјим кимсә јохдур”.
Шаһзадәнин истефа сәбәбләриндән бири дә Әлијев олуб...
Ендрјунун үнванына сәсләнән иттиһамларла әлагәдар Букинҝем сарајы шаһзадәнин мүдафиәсинә галхыб. Билдирилиб ки, Ендрју Бакыдакы тәдбирдә иштиракла Британијанын тиҹарәт, хүсусән нефт саһәсилә бағлы марагларыны тәмсил едиб.
Бу, шаһзадә Ендрјунун сон једди илдә Илһам Әлијевлә 10-ҹу ҝөрүшүдүр. Јери ҝәлмишкән, 2011-ҹи илдә ачыгланан рәгәмләр ҝөстәрди ки, Ендрјунун тиҹарәт сәфири кими, он илдә 76 хариҹи өлкәјә етдији сәфәр верҝи өдәјиҹиләринә (бүдҹәјә) 4 милјон фунт-стерлингә баша ҝәлиб. Һәлә, мүһафизәчиләрә верилән вәсаит бу рәгәмә дахил дејил.
“Даилј Маил” гәзети Ендрјунун 2009-ҹу илдә Бакыја үч ҝүнлүк сәфәр үчүн шәхси тәјјарәјә дөвләтин 60 мин фунт-стерлингини хәрҹләмәсиндән јазмышды.
Ендрјунун 2011-ҹи илин ијулунда Британијанын тиҹарәт сәфири постундан истефа вермәк мәҹбуријјәтиндә галмасынын сәбәбләриндән бири дә онун Әлијевлә достлуг мүнасибәтләринин јаратдығы нараһатлыг вә бу мөвзуда үнванына сәсләнән иттиһамлар иди. Диҝәр бир сәбәб исә онун АБШ-дан олан малијјәчи, сексуал ҹинајәткар Ҹеффри Епштејнлә достлуғујла бағлы галмагал иди.
Амма ҝөрүнүр, шаһзадә истәнилән һалда, бу иши давам етдирир.
Букинҝем сарајындакы мәнбә дејир: “Шаһзадә Ендрјунун Бакыја сәфәриндән һөкумәтин хәбәри варды. Лакин о, орада Бөјүк Британијаны тәмсил етмәјиб. Јох, әҝәр о, Британијаны тәмсил етдијини иддиа едирсә, артыг бу барәдә суал Букинҝем сарајына үнванланмалыдыр”.
Букинҝем сарајы исә Ендрјунун өтән һәфтә Бакыда кечирилән Үмумдүнја Игтисади Форумунда иштиракыны вә бу мәгсәдлә Бакыја ики ҝүнлүк сәфәринин шәхси мәнбәләр һесабына малијјәләшдирилдијини десә дә, сәфәр вә отел хәрҹләринин Әлијев тәрәфиндән малијјәләшдирилдијини тәсдигләмәкдән имтина едиб.
Анти-демократик, сечки сахтакары Әлијев...
Беш улдузлу “Фоур Сеасон” отелиндә шаһзадә Ендрјунун Илһам Әлијевлә шам масасында, онун гызы, 24 јашлы Арзу Әлијева вә ханымы да иштирак едиб.
Илһам Әлијев рәгибләринә гаршы тәзјигләри артырмагда иттиһам олундуғу бир вахтда Ендрјунун онунла ҝөрүшмәсини депутатлар, һүгуг мүдафиәчиләри кәскин тәнгид едир. Мәсәлән, “Амнестј Интернатионал” бејнәлхалг һүгуг-мүдафиә тәшкилатынын Азәрбајҹан үзрә експерти Макс Такер дејир: “Ендрјунун президент Әлијевлә бирликдә шам етмәси инанылмаз дәрәҹәдә јерсиз, замансыз аддымдыр. Бу өлкәдә октјабрда кечириләҹәк президент сечкиси өнҹәси Әлијев режими сон ајларда сөз азадлығынын боғулмасына јөнәлик аддымлары артырыб. Биз Јорк Һерсогуна чағырыш едирик ки, о, Әлијевә бу ҹүр һәбсләр далғасынын дајандырылмасы үчүн ачыг месаж версин”.
Һәлә өтән илин нојабрында “шаһзадә Ендрју һансы сәбәбдән адамы дәһшәтә ҝәтирән, анти-демократик, сечки сахтакары Әлијеви зијарәт едиб?”, суалына ҹаваб ахтаран лејборист Пол Флинн бу дәфә әлавә едир: “Ендрјунун өзүнүн шаһзадә статусундан суи-истифадә едәрәк, халгына зүлм едән шәхси дәстәкләмәси вә буну Бөјүк Британијаны тәмсил етмәк кими гәләмә вермәси өзбашыналыгдыр”.
Ендрју бу сәфәрләрлә Британијаја милјонлар газандырыб
Шаһзадәни мүдафиә едән Букинҝем сарајынын диҝәр бир аргументи беләдир: “Һерсог Британија бизнесинин гајғысына галыр. БП-нин Азәрбајҹанда чох бөјүк инвестисијалары вар. Мәһз бу сәбәбдән илк дәфә 2005-ҹи илдә һөкумәт ондан Азәрбајҹана сәфәр етмәји хаһиш етмишди. Онун Азәрбајҹанла бағлы шәхси бизнес мараглары јохдур”.
Шаһзадәјә јахын бир мәнбә исә әлавә едир: “Чох тәәссүф ки, Ендрју хариҹи сәфәрләри васитәсилә Инҝилтәрәјә ҝәтирдији фајдадан данышмыр. О, Британијаја милјонлар газандырыб”.
Диггәт: Хәбәрдән истифадә етдикдә мәнбәјә истинад лазымдыр
