Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән бир мүддәт әввәл Исламазери.аз интернет гәзетинин әмәкдашы Азәрбајҹан Ислам Ојаныш Һәракатынын Лидери, Азәрбајҹан Ислам Партијасынын Сәдри, Ҝөркәмли Алим, Илаһијјатчы Доктор Мөвсүм Сәмәдовла ҝөрүшүб.
Ҝөрүш заманы өлкәдәки просесләр вә проблемләрдән сөһбәт ачан Мөвсүм Сәмәдов, Исламазери.аз-а үч өнәмли мәсәлә һагда данышыб.
Доктор Мөвсүм Сәмәдовун өз истәјилә сүзүҝедән мәсәләләри өлкә иҹтимаијјәтинә, һәмчинин диндарларын диггәтинә чатдырылмасы тәкиди олунуб:
1. Инсанлар, хүсусилә мөминләр Аллаһы јанларында билмәлидирләр. Пејғәмбәр вә имамларын онлар һаггында даим дуа етдикләринә әминлик һасил олунмалыдыр. Ливан мүгавимәт һәрәкатынын лидери Сејид Һәсән Нәсруллаһ 2006-ҹы илдә Исраил ишғалчларына галиб олдугдан сонра демишди: “Бу гәләбәни бизә нәсиб едән Аллаһа тәшәккүр едирик. Биз Ајәтуллаһ Беһҹәтин исти нәфәсини, дуасыны һисс едирдик”. Буна ҝөрә дә, мөмин даим билмәлидир ки, истәр фәрди, истәр сијаси, истәр иҹтимаи, истәрсә дә дини мәсәләләрдә өвлијаларын исти нәфәсләри-дуалары онларладыр.
2. Икинҹи мәсәлә диндарларын, хүсусилә руһаниләрин, дин алимләринин һаггындадыр. Һеч кәс елә дүшүнмәсин ки, онлар олмасалар мәсҹидләр, һүсејнијјәләр, мәдрәсәләр вә намазханалар бош галаҹаг вә ја ишләр ҝетмәјәҹәк. Буну билин ки, Аллаһын бизә еһтијаҹы јохдур вә Аллаһ өз ишләрини Өзү апарыр. Јахшы олар ки, руһаниләр әввәлдән дини мәсәләләр һаггында, хүсусилә диндарлар үчүн проблемин чөзүлмәси өнәмли олан мәсәләләрдә ким һансы мөвгедә олмушдуса, о ҹүр дә галсын. Јәни бу ҝүн тәблиғатла мәшғул олмағы өзүнә вәзифә едән гардашлар (Аллаһ онлары да һифз етсин) елә бир аддым атмасынлар ки, дини атрибутларын горунмасы үчүн өз азадлыгларыны гурбан верән руһаниләрин ишләринә манеә јарадалар. Аллаһ еләмәсин һәлә онларын әлејһинә сөз данышмағы демирәм.
Мөминләр вәһдәтә әмәл етсинләр. Хүсусилә дин уғрунда мүбаризә едән мөминләр вәһдәт мәсәләсинә өнәм версинләр. Дүшмәнин истәји вәһдәти арадан апармагдыр.
3. Дин уғрунда, хүсусилә һиҹабын азадлығы уғрунда мүбаризә апаран мөминләрә, хүсусилә руһаниләрә Аллаһдан ҝөзәл әҹр истәјирәм. Мүбариз руһаниләр, хүсусилә зиндана дүшән руһаниләрин һамысына өз тәшәккүрүмү билдирирәм. Лакин тәкҹә Һаҹы Абҝүл Сүлејмановун гаршысында тәзим едирәм. Хаһиш едирәм ки, бу сөзләри олдуғу кими гејд едәсиз: “Һаҹы Абҝүл Сүлејманов зиндандан әввәл неҹә идисә, инди ондан да мәтин вә шүҹаәтли олмасына, мүбаризә вә мүгавимәт һәрәкатында руһ јүксәклији јаратдығына ҝөрә она тәшәккүр едир вә онун гаршысына тәзим едирәм”.
Диггәт: Хәбәрдән истифадә етдикдә мәнбәјә истинад лазымдыр
