Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Ләнкәранын Кичик Базар Һүсејнијјә Мәсҹидиндә өтән ил декабрын 5-дә баш верән инсидентлә бағлы апарылан “истинтаг” јекунлашыб. Ишә Ләнкәран Рајон Мәһкәмәсиндә бахылаҹаг.
Вәкил Рүстәм Зүлфүгаров мартын 29-да дејиб ки, иттиһам акты узағы беш ҝүнә тәсдиг едилиб мәһкәмәјә ҝөндәриләҹәк: “Иш Ҹинајәт Мәҹәлләсинин 221.2.1-ҹи маддәси илә (бир груп шәхс тәрәфиндән хулиганлыг) башламышды, мәһкәмәјә дә о формада ҝедир. Илкин Әсәдов вә Ибраһим Азадов ејни маддә илә тәгсирләндирилир. Фәрг ондадыр ки, Илкин Әсәдов барәсиндә һәбс гәтимкан тәдбири сечилиб. Ибраһим Азадов исә инсидент заманы бычагландығына ҝөрә ондан башга јерә ҝетмәмәк һагда илтизам алыныб”.
Вәкил вердикләри вәсатәтләрә бахылмадығыны билдириб: “Ибраһим Азадов бычагланыб, хәсарәт алыб. Истинтаг органы индијә кими һеч бир тәдбир ҝөрмәјиб. Һалбуки истинтаг органына тәгдим етдијимиз видеода шикајәтчи Һәмдулла Әлијевин оғлу Пәрвиз Әлијев Ибраһим Азадову бычагладығыны етираф едир. Видеоја бахыш кечирилиб, бычаглајан адам да диндирилиб. Хәсарәт јетирәнин чыхышындан ајдын ҝөрүнүр ки, бу, гурама ишдир. Дејир бир нечә фәал диндары тутмалы идиләр, мән бу һәрәкәтләри етдим ки, сизи тутмасынлар. Ҝүлүнҹ бир фикир сөјләјиб. Белә чыхыр ки, о, Илкинин, Ибраһимин вә Ләнкәранда мәсҹидә ҝедән бир нечә шәхсин тутулаҹағыны әввәлҹәдән билирмиш. Һәмдулла Әлијев сөјүлүб тәһгир олундуғуну дејир. Һадисә шаһидләри факты тәсдиг етмир. Амма истинтаг органы белә мәгамларда шаһид гисминдә өзүнә мүнасиб адамлар тапыр вә истифадә едир”.
Рәсми мәлумата ҝөрә, 2012-ҹи ил декабрын 5-дә Ләнкәранын Кичик Базар Һүсејнијјә Мәсҹидиндә баш вермиш инсидентдән сонра шәһәр сакини, еләҹә дә ејниадлы дини иҹманын рәһбәри Һәмдулла Әлијев полисә шикајәтчи олуб. О, шикајәтдә ҝөстәриб ки, Илкин Әсәдов, Ибраһим Азадов вә диҝәрләри ону дөјәрәк хәсарәт јетирибләр.
Диггәт: Хәбәрдән истифадә етдикдә мәнбәјә истинад лазымдыр
