Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Мартын 13-дә Нәриманов Рајон Мәһкәмәси 2012-ҹи илин 5 октјабр аксијасына ҝөрә тутуланларын мүһакимәсини давам етдириб. Һәбс олунан Рөвшән Аллаһвердијевин вәкили Мәнсум Бајрамов дејиб ки, просесдә вәсатәт галдырылдығына ҝөрә зәрәрчәкәнләр тәкрар диндирилиб: “Онлары тәкрар диндирмәклә видеојазылардакы зиддијјәтләри арашдырмаг истәдик. Зәрәрчәкмиш Сејмур Әмировун ҝөзүнә тоз дүшүб. Она ҝөрә дә ону вуранын ким олдуғуну билмәјиб. Садәҹә шәкилләр, видеолар үзрә Рөвшән Аллаһвердијевин вурдуғуну еһтимал едиб. Амма шәкилләрдә вә видеоларда Рөвшән Аллаһвердијевин кимисә вурдуғу өз тәсдигини тапмыр”.
Вәкил тәкрар диндирмә илә зиддијјәтләрин арадан ҝөтүрүлдүјүнү һесаб едир: “Иттиһам едән тәрәфә сүбут олунду ки, аксијада провокаторлар, даһа агрессив иштиракчылар олуб. Мәһз онлар кимәсә әл галдырыб, кимисә вурублар. Бу о демәк дејил ки, онларын әмәлинә ҝөрә иштиракчыларын һамысы ҹәзаландырылмалыдыр. Ҹинајәт әмәлинә фәрди јанашылдығы кими ҹәзалар да төрәдилән әмәлә ҝөрә тәтбиг едилмәлидир. Мүдафиә етдијим шәхс үчүн нәинки 315-ҹи, һәтта 233-ҹү маддә дә чохдур. Мән Рөвшән Аллаһвердијевә бәраәт истәјирәм”.
Вәкилин дедијинә ҝөрә, мартын 18-дә просесдә дөвләт иттиһамчысы чыхыш едәҹәк.
Өтән ил октјабрын 5-и Бакыда, Тәһсил Назирлијинин бинасы гаршысында кечирилмиш “Һиҹаба азадлыг” аксијасында полислә кәскин гаршыдурма олуб. Һадисәјә ҝөрә 36 нәфәр һәбс едилиб. Аксијада баш верәнләр Ҹинајәт Мәҹәлләсинин 315.2 (һакимијјәт нүмајәндәсинә гаршы мүгавимәт ҝөстәрмә вә ја зор тәтбиг етмә) вә 233-ҹү (иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә) маддәләри илә арашдырылыб.
Диггәт: Хәбәрдән истифадә етдикдә мәнбәјә истинад лазымдыр
