Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән инанҹлы кәсимин танынмыш нүмајәндәси һәбсханадан “Јени Мүсават”а мәгалә ҝөндәриб
Инанҹлы кәсимин танынмыш нүмајәндәси, Ислам Партијасынын сабиг сәдри Һаҹы Меһди Шамилли һәбсханадан редаксијамыза мәктуб ҝөндәриб. О, мәктубда неҹә һәбс едилмәсинә вә иҹтимаијјәтә бәлли олмајан бәзи ҝизли мәгамлара ајдынлыг ҝәтириб. Һаҹы Меһди јазыр:
“Вәкилләримин вә диҝәр јахын адамларын ”мәсләһәти" илә тутулмағым һагда јазмамаг мәсләһәт олдуғундан 6 ај бу һагда јазмадым. Инди исә јазмаг гәрарына ҝәлдим. Сонунҹу дәфә 2006-ҹы илдә Бакы кәндләринин торпаг ислаһатларынын дүзҝүн апарылмамасына етираз аксијаларынын тәшкилатчысы кими Сабунчу Рајон Иҹра Һакимијјәти башчысынын мүавини Гәзәнфәр Һәсәновун әризәси вә 8 нәфәр дөвләт ишчисинин шаһидлији илә һәбс олундум. Һүгуг мүдафиәчиләринин, иҹтимаи тәшкилатларын фәаллығы вә сүбутларын олмамасы сәбәби илә тезликлә һәбсдән азад олундум.
Лакин мәнә гаршы тәзјигләр давам едирди. Адыны чәкмәк истәмәдијим ҝүҹ структурларындан биринә чағырыб “мәдәни шәкилдә” мәнә баша салдылар ки, әҝәр Азәрбајҹанда галарамса, тәзәдән һәбс олунаҹағам. Арамызда разылыг әлдә олунду ки, Азәрбајҹаны тәрк едим. Ара-сыра вәтәнә ҝәлсәм дә 2-3 ҝүндән чох гала билмирдим. Әҝәр чох галырдымса, јенә чағырылыб јазылы илтизам алынырды ки, мән шәһәрә чыхмајым вә сијаси тәшкилатларла ҝөрүшмәјим. Дәфәләрлә анамын хәстәлији илә бағлы Тәбризә ҝетмәли олурдум. Галан вахтлары Русијада ишләјирдим.
Ахырынҹы дәфә оруҹлуг вахтында евә ҝәләркән 50 јашым тамам олдуғундан шәхсијјәт вәсигәсини дәјишмәк лазым олду. Сонра истинтаг материалларында јазылдығы кими, шөбәјә “оператив” мәлумат дахил олуб ки, ҝуја үзәримдә силаһ вә наркотик вар. Лакин нәдәнсә ахшам вахты мәнимлә гардашымы сәһв салыб ону һәбс едибләр. Буну баша дүшән кими гардашымдан үзр истәјиб бурахдылар. Сабаһысы ҝүн - августун 6-да ахшам ифтардан сонра мәсҹидә ҹамаат намазына ҝетмәјә һазырлашырдым ки, телефонума зәнҝ ҝәлди. Фикирләшдим, достлардан кимсә ад ҝүнүмү тәбрик етмәк истәјир. “Һаҹы Меһдиди?” - дејә телефондан мәнә таныш олмајан сәс ҝәлди:
- Бәли, мәнәм. Кимдир?
- Сизин саһәнин тәзә мүвәккилијәм. Дүнән сәһвән сәнин гардашыны башгасынын јеринә тутмушдуг, сонра үзр истәјиб бурахдыг. Сиз исә биздән шикајәт етмисиниз.
- Гардаш, сән тәзә ҝәлмисән, дејәсән, бизи танымырсан, әҝәр сөзүмүз олса дејәрдик, биз һеч вахт һеч кимә шикајәт етмәмишик.
- Бизә дә сизин барәдә белә дејибләр, амма кимсә 102-јә зәнҝ едиб шикајәт едиб биздән. Сән күчәјә чых, буну ајдынлашдыраг.
Гардашымы ҝөтүрүб гапыја чыхдым. Бир гәдәр ҝөзләдик, һеч ким ҝәлмәди. Јенидән зәнҝ вурулду. “Гапыја чых да, нијә чыхмырсан? Биз гапыныздајыг”. Нәсә шүбһәләндим. “Биз өз гапымыздајыг, сән киминләсә бизим гапыны сәһв салмысан” дедим. Баша дүшдүм ки, бунлар мәни евдән, гапыдан узаглашдырмаг истәјирләр. Нәсә, 2 машын бизә јанашыб сахлады. 7-8 адам дүшүб бизә сары ҝәлди, голуму буруб машына отуртмаг истәдиләр. “Мән ки, мүгавимәт ҝөстәрмирәм, нијә әлими бурурсунуз, бир дә өзүнүзү тәгдим един ҝөрәк, кимсиниз?” - сорушдум.
Һеч бир сәнәд ҝөстәрмәдән мәни машына отуртдулар. Сонралар мәһкәмәдә бунларын һәлә полис бөлмәсинә гәдәр чохлу ганун позунтусу олдуғуну һакимин нәзәринә чатдырсам да нәтиҹә олмады. Ганун позунтусунун биринҹиси о иди ки, ҝәлән адамлар һеч бир сәнәд ҝөстәриб өзләрини тәгдим етмәди. Икинҹиси, әҝәр үзәримдә силаһ вә наркотик мәлуматы вар идисә, нијә үстүмү орада јох, һәтта бөлмәдә дә јохламадылар? Протоколда тутулан үнван Әзизбәјов күчәси ҝөстәрилсә дә бизим күчә там башгадыр - С.Ҹәфәров күчәси. Вә мәһкәмәдә дөвләт иттиһамчысы вә һакимә дә дедим ки, әҝәр полисләр сәни чағырырларса, ағыллы адам үзәриндә силаһ вә наркотиклә онларын габағына чыхармы. Суал вә телефонларла әлагәдар верилән вәсатәт дә тәмин олунмады.
Полис бөлмәсиндә исә ахтарыш вә сорғу-суал олунмадан физики тәзјигләр башлады. Һансыса сәнәдә гол чәкмәк тәклиф олунса да бундан имтина етдим. Сәһәрәдәк тәзјигләрин бир фајда вермәдијини ҝөрдүкдә мәни машына отурдуб башга јерә апардылар. Бурада јенидән сорғу-суал едәндән сонра һансыса рәисин јанына ҝәтирдиләр: “Нијә протоколлара гол чәкмирсән?” - дејә о гышгырды. “Сән вәтән хаинисән, силаһларын јерини де!” - јенә гышгырды. Инди мәнә мәлум олду ки, бунларын мәгсәди мәни нәјин баһасына олурса-олсун һәбс етмәкдир:
- Тәки вәтән хаинләри һамысы мәним кими олсун. Баша дүшә билмирәм, ахы нә етмишәм...
- Сән наркотикә гол чәк, сонра биләрсән.
- Ахы мән сигарет дә чәкмирәм, неҹә наркотикә гол чәкмәлијәм? Әҝәр мәни сијаси сифариш олдуғуна ҝөрә тутурсунузса, онда ҝәтирин силаһа гол чәким.
- Јох, сән наркотикә гол чәкәҹәксән, силаһла сәнин гардашларын тутулаҹаг.
Сөһбәтин артыг олдуғуну ҝөрүб “нә билирсиниз един” дедим. Јенидән башга отаға апарыб тәзјигләрә башладылар. Бир дәфә тәҹили јардым машыны ҝәлиб ијнә вә дәрман вериб ҝедәндән сонра мәни камерада јерләшдирдиләр. Сәһәр јенә протокола гол чәкмәк тәклиф олунса да јенә ејни ҹавабы вердим. Сонралар иттиһамнамәләр тәҹридханада вериләркән мәлум олду ки, полис бөлмәсиндә ҝуја үзәримдә ахтарыш заманы 6,69 грам марихуана тапылыб. Силаһ үчүн исә мән орда галан мүддәтдә јенә дә гануна зидд олараг ахтарыш ордери олмадан евимдә ахтарыш апарылыб вә силаһ олмаса да бәзи фотошәкилләр, дискләр, 1997-ҹи илдә кечирдијимиз гурултајын касетләри, китаблар ҝөтүрүлүб. Мәндән тәзјигләр барәдә протокол јазаркән онлара дедим ки, һеч кими танымырам вә танысам да ад чәкмәрәм. Лакин бу шикајәти етмәкдә мәгсәд о иди ки, ҹаван, јашлы инсанлара ҝәләҹәкдә ишҝәнҹәләр алтында бојунларына етмәдикләри ҹинајәтләри гојуб бәдбәхт етмәсинләр. Билсәләр ки буна ҝөрә ҹәзаландырылаҹаглар, бу ҹүр ишләр ҝөрмәсинләр.
Јенә камераја салындым. Ертәси ҝүн мәни јенидән чыхарыб бир отаға ҝәтирдиләр. Бурада танымадығым бир нечә мүлки ҝејимдә адамлар вар иди. Нечә ҝүндән бәри илк дәфә мәнимлә ишҝәнҹә вә тәзјигләрсиз, сакит шәкилдә сорғу-суал апарылды. Сонра үст-башымы јохлајыб јенидән “воронок”а миндириб Бакы Истинтаг Тәҹридханасына ҝәтирилдим. Түркијәнин сабиг баш назири Нәҹмәддин Әрбаканла олан шәклим вә Русијада һансы олигархларла ҝөрүшдүјүм кими суаллара ҹаваб вердијим бу сорғу-суаллар тәҹридханада да апарылырды. Тәзјигләр омбудсманла ҝөрүшәнәдәк давам етди.
Истидән вә тәзјигләрдән “воронок”дан ҝүҹлә дүшдүм вә јерә јыхылдым, галха билмәдим. Јердә хејли галдыгдан сонра ҝүҹлә галдырыб бокса ҝәтирдиләр. Су ичиб өзүмә ҝәлдим. Ики ҝүн карантин боксда галандан сонра 5-ҹи корпусун 41-ҹи “хата”сына ҝәтирилдим. Тәҹридхана һагда ҝәләҹәк јазыларымда әтрафлы јазаҹағам, амма ону дејим ки, бу һәбсхананын тикилмәсиндә Авропа Шурасына “миннәтдар” олмалыјыг. Амма аталарын бир сөзү вар: “Нејләјирәм гызыл тешти ки, ора ган гусаҹағам?!”
Алты ајлыг мүддәтдә һеч бир әсас олмадан хәстәлијими, евдә ағыр хәстәм олдуғуну, үч азјашлы ушағын, 6 нәфәр аилә үзвүнүн анамын 120 манатлыг тәгаүдү һесабына доланмасыны нәзәрә алмајан мәһкәмә дәфәләрлә ев дустаглығына бурахылмағым һагдакы вәсатәтләрин һеч бирини тәмин етмәди. Дөвләт иттиһамчысы дили топуг вура-вура мәнә нә аз, нә чох - 2 ил 6 ај һәбс истәди. Һалбуки маддә ҹәми 3 илә гәдәр иди. Ахырадәк һеч бир протокола, истинтаг сәнәдинә, мәһкәмәдә ифадә вермәјә, данышмамағыма бахмајараг сон сөз демәк истәдим. Алты ајда нә гәдәр фикирләшиб дөвләтимә вә халгыма гаршы һансы ҹинајәти төрәтдијими тапа билмәдим. Белә гәнаәтә ҝәлдим ки, һәбсимә вәтәними севмәјим, халгыма олан сонсуз бағлылығым, намаз гылыб оруҹ тутмағым, Гарабағ торпагларынын азад олунмасында дөјүшмәјим, коммунист режиминдән гуртулуб азадлыға чыхмағымызда иштиракым, наркоман олмамағым, сигарет чәкмәмәјим, рүшвәтхорлуға вә коррупсијаја гаршы олуб һалал зәһмәтлә мәшғул олмағым, Әрбаканла бирҝә шәклим вә сијасәтлә мәшғул олмағым сәбәб олуб. Чыхышымы тез-тез кәсиб “Инди мәһкәмәдән нә хаһиш едирсән” дејәндә исә сәбир касамын долдуғуну һисс етдим. “Мән хаһиш етмирәм, тәләб едирәм ки, мәни һәбсдән тәҹили азад едәсиниз” - дедим... Биз һеч вахт зүлмә, әдаләтсизлијә баш әјмәрик. Биз Аллаһ тәрәфиндән ҝәлмишик, Аллаһа тәрәф дә гајыдаҹағыг. Вәссаламу әлејкум вә рәһмәтуллаһи бәрәкәтуһ.
Бакы Истинтаг Тәҹридханасы, 5-ҹи корпус, 41-ҹи камера".
Һазырлады: КӘНАН
Диггәт: Хәбәрдән истифадә етдикдә мәнбәјә истинад лазымдыр
