Әһли Бејт -АБНА- хәбәр аҝентлијинин вердији хәбәрә әсасән “Азәрбајҹан Ислам Партијасы мүхалифәтдә тәмсил олан бәзи партијаларла сечки стратеҝијасы илә бағлы мүзакирәләр апараҹаг”. Буну АПА-ја ачыгламасында Азәрбајҹан Ислам Партијасынын (АИП) сәдр мүавини Һаҹы Акиф Һејдәрли дејиб.
Онун сөзләринә ҝөрә, дөвләт гејдијјатына алынмадығы үчүн АИП-ин сечкидә партија шәклиндә иштиракы мүмкүн олмајаҹаг. Партија президент сечкиләриндә иштиракла бағлы гәрар гәбул едәрсә, исламчылар бу просесдә тәшәббүс групу форматында иштирак едәҹәкләр: “Јәни намизәдин ирәли сүрүлмәси мәсәләси бу форматда реаллашаҹаг. Партијанын намизәдинин мүәјјәнләшдирилмәсиндә проблем јохдур. Садәҹә ачыгланмасыны мәгсәдәујғун һесаб етмирик”.
А.Һејдәрли сечкинин бојкот едилмәси мәсәләсинин дә ҝүндәмдә олдуғуну гејд едиб: “Сечки кампанијасынын башланмасына гәдәр бу просеслә бағлы мөвгејимизә даир конкрет гәрарымыз ачыгланмајаҹаг”.
О гејд едиб ки, АИП-ин мүхалифәт бирликләриндә тәмсилчилији мәсәләси мүзакирә мөвзусу олмаса да, дахили интеграсијанын тәрәфдарыдыр: “Бу чәрчивәдә јахын вахтларда Иҹтимаи Палата илә сечкидә әмәкдашлыг мәсәләсинә даир мүзакирәләрә башланаҹаг. Артыг мүзакирәләрин апарылмасы илә бағлы разылашма әлдә олунуб”.
Диггәт: Хәбәрдән истифадә етдикдә мәнбәјә истинад лазымдыр
