Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Ҝүләш Мәркәзиндә Јунан-Рома ҝүләши үзрә милли команданын ачыг мәшгиндә јығмаја јени тәјин олунмуш мәшгчиләр иҹтимаијјәтә тәгдим олунуб.
Азәрбајҹан миллисинин баш мәшгчиси вәзифәсинә Иран Ислам Республикасындан мүтәхәссис Ҹәмшид Хејрәбади ҝәтирилиб. Она һәмвәтәнләри Насир Нурбахыш (бөјүк мәшгчи) вә Незафат Дост Ҹәфәр (мәшгчи) көмәк едирләр.
Мәшг просесиндә команданын баш мәшгчиси Ҹәмшид Хејрәбади ағыр чәкидә чатышмазлыг олдуғуну билдириб:
"Бу проблеми арадан галдырмаг үчүн дә миллијә јени леҝионер ҝәтирәҹәјик. Анҹаг онун адыны ачыгламајаҹағам. Буна сәбәб тәрәфләр арасында данышыгларын ҝетмәјидир. О, дүнја чемпионудур, өзүнү сүбут етмиш, чох перспективли ҝүләшчидир. Инанырам ки, Азәрбајҹан јығмасына фајдалы олаҹаг".
Иран Ислам Республикасындан ҝәтиздирилмиш мүтәхәссис, һәмчинин һазырлыг просесиндә јениликләрин олаҹағыны вә јығманын јени системдә мәшг едәҹәјини сөјләјиб. Команда әввәл һәфтәдә 3-4 дәфә мәшг едирдисә, бундан сонра һәр ҝүн чалышаҹаг.
"Јығмада мәшгләрин сајы артырылараг, ҝүндә 2 дәфә олаҹаг. Бунун саат 10:30-да вә 17:30-да олмағы нәзәрдә тутулуб. Әсас мәгсәд Азәрбајҹаны дүнјада 1 нөмрә етмәкдир. Азәрбајҹан ҝүләши дүнјада парлајан улдуз сәвијјәсинә галхаҹаг" - дејә, тәҹрүбәли мәшгчи вурғулајыб.
Диггәт: Хәбәрдән истифадә етдикдә мәнбәјә истинад лазымдыр
