Әһли Бејт -АБНА- хәбәр аҝентлијинин вердији хәбәрә әсасән Һүгуг вә Азадлыгларын Мүдафиәси Институтунун (ҺАМИ) Газах Реҝионал Офисинин рәһбәри Ҹавид Ширәлијев һәдәләрә мәруз галыб. Бу барәдә вәкил Елчин Намазов мәлумат вериб.
Мәлуматда гејд олунур ки, һәдәләмә Дөвләт Ҝөмрүк Комитәсинин Товуз Ҝөмрүк Идарәсинин рәиси Вәзир Һүсејновун адындан едилиб. Бу барәдә мәлуматда билдирилир: “23 декабр 2012-ҹи илдә “Гырмызы Көрпү” Сәрһәд Кечид Мәнтәгәсиндә шаир Бәхтијар Һидајәтә гаршы едилән зоракылыг һәрәкәтләри барәдә ҺАМИ-нин Газах Реҝионал Офисинә мүраҹиәт едилмишдир. Бундан сонра реҝионал офисимизин рәһбәри Ҹавид Ширәлијев фактла бағлы бир сыра һәрәкәтләр етмишдир. Беләки, Бәхтијар Һидајәтә гаршы едилән зоракылыг һәрәкәтләри барәдә өлкә иҹтимаијјәтини мәлуматландырмыш, һәмчинин бир сыра КИВ-дә бу барәдә информасија верилмәсини тәмин етмишдир. Бундан хејли сонра Товуз Ҝөмрүк Идарәсинин 3 нәфәр әмәкдашы ҺАМИ-нин Газах Реҝионал Офисинә ҝәләрәк, Ҹавид Ширәлијеви һәдәләмишдир. Товуз Ҝөмрүк Идарәсинин рәиси Вәзир Һүсејновун ҝөстәриши илә ҝәлдикләрини билдирән шәхсләр һүгуг мүдафиәчиси илә етик гајдалара зидд давранмыш, офисин рәһбәрини тәһгир етмишләр. Билдирмишләр ки, Бәхтијар Һидајәтлә бағлы һәрәкәтләрини давам етдирәҹәји тәгдирдә ону машынын архасына бағлајараг, Газахдан Товузадәк сүрүјәҹәкләр”.
ҺАМИ баш верәнләрлә бағлы јерли вә бејнәлхалг тәшкилатлары мәлуматландырмышдыр. Һәмчинин бу ҝүн Баш Прокурорлуға вә Инсан Һаглары үзрә Мүвәккилә рәсмән мүраҹиәт олунаҹаг.
Мәлумат үчүн билдирәк ки, Товуз Ҝөмрүк Идарәсинин рәиси Вәзир Һүсејнов өлкә президентинин мүһафизә хидмәтинин рәиси Бәјләр Әјјубовун әмиси оғлудур.
Диггәт: Хәбәрдән истифадә етдикдә мәнбәјә истинад лазымдыр
