Әһли Бејт -АБНА- хәбәр аҝентлијинин вердији хәбәрә әсасән бу ҝүн 28 Декабр 2012 тарихдә Иран Ислам Республикасы Ордусу, дәниз гүввәләринин тактики вә әмәлијјат баҹарығынын јүксәлдилмәси мәгсәдилә “Вилајәт 91” һәрби дәниз тәлимләринә башлајыб.
Ислам Ордусу Дәниз Гүввәләри Команданы Контр-Адмирал Һәбибуллаһ Сәјјари ҹүмә ҝүнү сәһәр “Вилајәт 91” һәрби тәлимләрин башланмасы әмрини “Ја Һүсејн” (әлејһис сәлам) рәмзи илә вердикдән сонра журналистләрә дејиб: “Бу 6 ҝүнлүк һәрби тәлимләр Иран Ислам Республикасынын ҹәнубунда Һөрмүз боғазы, ИИР-ын ҹәнуб-шәргиндә Оман дәнизи, Һинд океанынын шималы, Әдән көрфәзи вә Бабул-Мәндәб боғазы әразисини еһтива едир”.
Ордунун дәниз гүввәләри команданы “Вилајәт 91” һәрби дәниз тәлимләринин илк ҝүнүнүн програмларына мүнасибәт билдириб: “Бу ҝүн дәниздә јерләшдирмәк үчүн дәниз үстү вә суалты гүввәләрин әмәлијјаты кечириләҹәк”.
Контр-адмирал Вилајәт 91 дәниз тәлимләринин кечирилмәси мәгсәдләрини садалајараг дејиб: Реҝионда давамлы тәһлүкәсизлијин бәргәрар олунмасы вә гоншу өлкәләрә достлуг вә сүлһ мүраҹиәтинин верилмәси истигамәтиндә Иран Ислам Республикасынын су сәрһәдләри вә мәнафејини мүдафиә етмәк үчүн ордунун дәниз гүввәләринин баҹарығыны нүмајиш етдирмәк бу һәрби тәлимләрин мәгсәдләриндәндир.
Бу арада Ислам Республикасы ордусу дәниз гүввәләри команданынын координасија мәсәләләри үзрә мүавини контр-адмирал Рәстҝари “Вилајәт 91” һәрби тәлимләрин хүсусијјәтләрини ачыглајараг бу маневрин дүшмәнләр үчүн Иран Ислам Республикасынын бүтүн саһәләрдә, хүсусилә дә бејнәлхалг суларда өз әсаслы еһтијатлары вә мәнафејинин мүдафиәсиндә ҹидди олмасы мүраҹиәтини дашыдығыны билдириб.
Диггәт: Хәбәрдән истифадә етдикдә мәнбәјә истинад лазымдыр
