Әһли Бејт -АБНА- хәбәр аҝентлијинин вердији хәбәрә әсасән Президент Илһам Әлијевин имзаладығы әфв сәрәнҹамы илә декабрын 27-дә азадлыға чыхан мәһбуслардан бири дә журналист Анар Бајрамлыдыр.
Бу барәдә ачыгламасында Анар Бајрамлы дејиб ки, әфв сәрәнҹамынын верилдијини декабрын 26-да ешитсә дә, адынын о сијаһыда олдуғуну декабрын 27-дә билиб: “Бу ҝүн ешитдим ки, мәним дә адым о сијаһыдадыр. Аллаһын мәсләһәтинә шүкүр, һәр шеј јахшыдыр”.
Анар Бајрамлы дејиб ки, өзү вә ја јахынлары Президент јанында Әфв Мәсәләләри Комиссијасына мүраҹиәт етмәјиб: “Нә өзүм әфв үчүн әризә јазмышам, нә дә јахынларымдан кимсә јазыб. Мәнә ирәли сүрүлән иттиһама ҝәлинҹә, о, шәр-бөһтан иди. Мәни шәрләјәрәк һәбс етмишдиләр”.
Журналист адынын Авропа Шурасы Парламент Ассамблејасынын сијаси мәһбуслар үзрә мәрузәчиси Кристофер Штрассерин һазырладығы сијаһыја дүшмәсиндән хәбәрдар олдуғуну сөјләјиб: “Кристофер Штрассерә дә, һүгуг мүдафиәчиләри Лејла Јунис, Зәрдүшт Әлизадә, Арзу Абдуллајеваја вә адыны чәкмәдијим, бәлкә инди ады јадыма дүшмәјән диҝәр шәхсләрә дә өз миннәтдарлығымы билдирирәм”.
Анар Бајрамлы билдириб ки, јерли мәһкәмә инстансијаларына етибары јохдур, она ҝөрә дә үзәриндән мәһкумлуғун ҝөтүрүлмәси үчүн һеч бир мүраҹиәт етмәјәҹәк: “Әслиндә мәним үчүн бунун елә бир әһәмијјәти дә јохдур, онсуз да һәр кәс билир ки, мәнә гаршы ирәли сүрүлән иттиһам гондарма олуб”.
Анар Бајрамлы журналист фәалијјәтини әввәлки иш јериндә давам етдирәҹәјини вурғулајыб: “Әввәлки иш јеримдә - Иран Ислам Республикасынын Радио вә Телевизија Идарәсиндә журналист фәалијјәтими давам етдирәҹәм”.
Диггәт: Хәбәрдән истифадә етдикдә мәнбәјә истинад лазымдыр
