Әһли Бејт -АБНА- хәбәр аҝентлијинин вердији хәбәрә әсасән назир јени тәјинат вә гаршыдан ҝәлән әламәтдар бајрамлар мүнасибәтилә ону тәбрик едиб, өлкәмиздәки дипломатик фәалијјәтиндә уғурлар арзулајыб.
Назир мүстәгиллијин илк илләриндә гаршылашдығымыз проблемләр, Ермәнистанын тәҹавүзү нәтиҹәсиндә әрази бүтөвлүјүмүзүн позулмасы, торпагларымызын ишғалы, ҹәмијјәтин бүтүн саһәләриндә, о ҹүмләдән дахили ишләр органларында апарылан ислаһатлар, гәбул едилмиш јени ганунлар барәдә мәлумат вериб, ҹинајәткарлыгла мүбаризә вә иҹтимаи асајишин горунмасы саһәсиндә әлдә едилмиш нәтиҹәләрдән данышыб. Гејд олунуб ки, криминоҝен дурумун там нәзарәтә ҝөтүрүлмәси, сабитлијин бәрпасы өлкәмиздәки әҹнәбиләрин, о ҹүмләдән ИИР вәтәндашларынын да тәһлүкәсиз, әмин-аманлыг шәраитиндә јашајыб фәалијјәт ҝөстәрмәләринә, күлли мигдарда хариҹи сәрмајәнин Азәрбајҹан игтисадијјатына гојулмасына әлверишли шәраит јарадыб.
Мүстәгиллијимизи илк таныјан өлкәләрдән биринин бу гоншу дөвләт олдуғуну хатырладан дахили ишләр назири ИИР-Азәрбајҹан мүнасибәтләринин гурулмасына бөјүк өнәм вердијини, гәдим тарихә вә мәдәнијјәтә малик халгларымыз арасында бүтүн саһәләрдә мүнасибәтләрин даһа да ҝенишләндијини диггәтә чатдырыб.
Глобал характер алмыш трансмилли мүтәшәккил ҹинајәткарлығын тәһлүкәли нөвләринә, хүсусән наркотикләрин ганунсуз дөвријјәсинә вә гачагмалчылығына гаршы мүбаризәнин актуаллығыны нәзәрә чатдыран Рамил Усубов әмәкдашлығын бөјүк имканлара малик олдуғуну, јени истигамәтләрин мүәјјәнләшдирилмәсинин вә бирҝә сәјләрин зәрурилијини гејд едиб.
Мөһсүн Пакајин сәмими гәбула вә әтрафлы мәлумата ҝөрә назирә миннәтдарлығыны билдириб, дөвләтләримизин мүвафиг структурлары арасында әлагәләрин даһа да ҝенишләндирилмәсинә чалышаҹағыны вурғулајыб. Сәфир тәмсил етдији өлкәнин дахили ишләр назири Мустафа Мәһәммәд Нәҹҹарын дәвәтини бир даһа ҝенерал-полковник Рамил Усубовун диггәтинә чатдырыб.
Ишҝүзарлыг шәраитиндә кечән ҝөрүшдә тәрәфләри марагландыран бир сыра диҝәр мәсәләләр дә мүзакирә едилиб.
Диггәт: Хәбәрдән истифадә етдикдә мәнбәјә истинад лазымдыр
