Әһли Бејт -АБНА- хәбәр аҝентлијинин вердији хәбәрә әсасән Ләнкәранын Кичик Базар “Һүсејнијјә” мәсҹидиндәки мүнагишәнин көкү 7-8 ил әввәлә ҝедиб чыхыр. Буну декабрын 5-дә мәсҹиддә баш вермиш һадисә илә бағлы галдырылмыш ҹинајәт иши үзрә полис нәзарәтинә ҝөтүрүлән диндар Ибраһим Азадов, һәм дә Ләнкәран Шәһәр Мәдәнијјәт Мәркәзинин директору, Ләнкәран бәләдијјәсинин үзвү Һафиз Мирзә дејир.
Рәсми мәлумата ҝөрә, декабрын 5-дә мәсҹиддә гаршыдурма баш вериб. Ләнкәран Кичик Базар “Һүсејнијјә” дини иҹмасынын рәһбәри Һәмдулла Әлијевин шикајәти әсасында Ләнкәран Шәһәр Полис Шөбәсиндә факт үзрә ҹинајәт иши ачылыб.
Һәмдулла Әлијев белә бир шикајәт етмәдијини, полис шөбәсиндә тәрәфләрин үмуми разылыға ҝәлдијини десә дә, ДИН-дән алынан хәбәрә ҝөрә, галдырылмыш ҹинајәт иши үзрә артыг бир шәхс – Илкин Әсәдов барәсиндә 2 ајлыг һәбс гәтимкан тәдбири сечилиб, Ибраһим Азадов исә полис нәзарәтинә ҝөтүрүлүб.
Әслиндә Ләнкәранын Кичик Базар “Һүсејнијјә” мәсҹидиндә нә баш верир?
Ибраһим Азадовун сөзләринә ҝөрә, тәхминән 3 ил бундан әввәл мәсҹиддәки наразы дурумла бағлы һәм Гафгаз Мүсәлманлары Идарәсинә, һәм дә Дини Гурумларла Иш үзрә Дөвләт Комитәсинә мүраҹиәт олунуб, лакин һеч бир тәдбир ҝөрүлмәјиб: “Проблеми Гафгаз Мүсәлманлары Идарәсинин ҹәнуб бөлҝәси үзрә нүмајәндәси Гәни Ахундзадә јарадыр. О, ҹамаатын мәсҹидә ҝәлиб ибадәт етмәсини истәмәдији үчүн бурадакы бәзи сәлаһијјәтли шәхсләрин башыны долдурур, һәр кәсин ишинә гарышараг, инсанлара тәсир едир. Бу сәлаһијјәтли адамлардан кимин кәнарда шәхси проблеми варса, буну мәсҹидин ичинә чәкиб ҝәтирир, јерсиз проблемләр јарадыр”.
Ибраһим Азадовун сөзләринә ҝөрә, тәрәфләр арасындакы әсас проблем ҹамаат намазынын гылынмасы заманы гаршыда дуран шәхсин – имамын кимлији илә бағлыдыр: “Гәни Ахундзадә вә диҝәрләри дејирләр ки, биз кими ҹамаатын гаршысында имам гојаҹағыгса, о да имамлыг етмәлидир. Һазырда ахунд Һафиз Ҹәфәровдур. Вә бизим онунла һеч бир проблемимиз јохдур. Амма Һаҹы Һафиз јашлы адам олдуғуна ҝөрә һәрдән намаза ҝәлә билмир вә бизә билдирди ки, өз араныздан кими истәсәниз имам сечә биләрсиниз. Бу сөһбәтләрдән сонра Һәмдулла Әлијев өз наразылығыны билдирмәјә башлады, әсәби һалда етиразлар етди, һәтта мәсҹидин ичәрисиндә сөјүш сөјмәкдән чәкинмәди”.
Һәмдулла Әлијев декабрын 12-дә “Медиа форум” сајтына ачыгламасында демишди ки, гаршы тәрәф “Һүсејнијјә” мәсҹидинә тәјин олунан бүтүн ахундлардан, имамлардан наразылыг едиб, онларын фәалијјәтинә мане олуб, һәтта тәһгир етмәкдән чәкинмәјиб. Бу фикрә Ибраһим Азадов ҹаваб вериб: “Һаҹы Һафизә гәдәр мәсҹидә 11 ил әрзиндә Әлиаға Ахундов ахундлуг етмишди вә онунла бағлы бизим һеч бир проблемимиз јох иди. Кәнарлашдырыларкән үздә белә сәбәб ҝәтирдиләр ки, ҝуја о, аттестасијадан кечмәјиб. Амма бу ҝүн дә бизә шүбһәли ҝәлир ки, 11 ил әрзиндә мәсҹидә ахундлуг едән бир шәхс неҹә аттестасијадан кечә билмәсин. Мәним билдијим гәдәр исә әслиндә Һаҹы Әлиаға артыг Гәни Ахундзадәнин сөзүнә бахмадығына, онун дедикләринә әмәл етмәдијинә ҝөрә мәсҹиддән “аттестасијадан кечмәди” бәһанәси илә кәнарлашдырылыб. Даһа сонра исә Һаҹы Һафиз ахунд ҝәлди вә бизим бу адамла һеч бир проблемимиз јохдур”.
Декабрын 5-дә баш вермиш һадисәјә ҝәлинҹә, Ибраһим Азадов гејд едиб ки, һәмин ҝүн намаз гылмаг үчүн “Һүсејнијјә”јә ҝәләркән мәсҹиддә тәсәррүфат ишләринә бахан Һәмдулла Әлијевин гышгырдығыны, әсәби-әсәби данышдығыны ҝөрүб: “О әсәби-әсәби нәсә дејиб дүз мәним үстүмә ҝәлди вә мәни вурмаг истәди. Елә бу заман мәни мүдафиә едәнләрлә онун арасында мүбаһисә дүшдү. Бу арада кимсә мәни бычагла вурду. Ара чох гарышдығындан мәни вуран адамын кимлијини дәгиг ҝөрә билмәдим. Гарын наһијәмдән бычагланмышам. Зәдә дәринә нүфуз етмишди, тәхминән 3 сантиметр гарын бошлуғуна дүшүб. Дахили ганахма баш вермишди. Ләнкәран Диагностика Мәркәзиндә әмәлијјат олундум. Мүалиҹәм амбулатор шәраитдә давам едир”.
Ибраһим Азадов әлавә едиб ки, ону бычаглајан адамы дәгиг ҝөрмәдијинә ҝөрә шикајәт едә билмәјиб: “Әвәзиндә исә декабрын 12-дә бизи – Илкин Әсәдову, Сәбуһи Ҹаббаров, Һамлет Ҹаббарлы, Ҹавид Ахундзадә, Илгар Фәтуллаоғлу вә диҝәрләрини Ләнкәран Шәһәр Полис Шөбәсинә чағырдылар вә бизим һәр биримиздән изаһат алдылар. Һалбуки декабрын 5-дә јалныз мәнимлә Илкин мәсҹиддә олуб, диҝәр чағырыланлар мәсҹиддә олмајыблар. Полис мәндән изаһат алды вә даһа сонра гәрар чыхарылды ки, полис нәзарәтинә ҝөтүрүлүрәм. Нә үчүн? Һалбуки һадисә нәтиҹәсиндә бычагланан, зәдә алан мәнәм, амма мәним барәмдә ҹинајәт иши башланыб. Һәмдулла Әлијевә орда киминсә бармағы да тохунмајыб. Һәмин ҝүн мәсҹиддә дава дүшәркән Һәмдулла өзү илә ҝәтирдији адамлара дејирди ки, дөјүн бунлары, пулум вар, сизи гуртараҹам. Бу адамлар өзләрини неҹә диндар елан едирләр ки, Аллаһын евиндә бычагла ҝәзир, адам һәдәләјир, ган төкүрләр”.
Ибраһим Азадовун фикринҹә, полис дә јаранмыш вәзијјәтдән истифадә едир: “Чүнки һәлә Мәһәррәм ајы башламамыш мәсҹидә даим ҝәлиб-ҝедән диндарларын әксәри полис шөбәсинә чағырылмыш вә онлара хәбәрдарлыг едилмишди ки, Ашура ҝүнү һеч бир әзадарлыг едилмәсин, һеч кимин сәси чыхмасын. Амма биз бу хәбәрдарлыға әһәмијјәт вермәјәрәк әввәлки илләрдә Ашура тәдбирләрини неҹә кечирмишдиксә, инди дә о ҹүр тәдбирләр тәшкил еләдик. Һазырда Һәмдулла Әлијевин шикајәт әризәси бизи ҹәзаландырмаг үчүн полисин әлинә дүшмүш ән јахшы бәһанәдир”.
Декабрын 5-дә баш вермиш һадисәјә ҝөрә Ләнкәран Шәһәр Полис Шөбәсиндә изаһат верән Сәбуһи Ҹаббаров һәмин ҝүн мәсҹиддә олмадығыны дејиб. О, Ибраһим Азадовун фикирләри илә разылашдығыны, әсас проблемин Гәни Ахундзадә вә Һәмдулла Әлијевдә олдуғуну билдириб: “Һәмин һадисәдән сонра Һәмдулла Әлијев артыг мәсҹидә ҝәлмир. Мәсҹидә исә Һаҹы Мөһүббәт адлы шәхс тәјин едилиб. Һаҹы Һафиз дә өз вәзифәсини иҹра едәҹәк. Инди һамы Һаҹы Мөһүббәтлә разылашыр, онунла бирҝә ибадәт едир, һеч кимин һеч бир наразылығы, проблеми јохдур. Чүнки Һәмдулла Әлијев мәсҹидә ҝәлмир вә проблем јарадан да јохдур”.
Ләнкәран бәләдијјәсинин үзвү Һафиз Мирзә ејни заманда Гафгаз Мүсәлманлары Идарәсинин ҹәнуб бөлҝәси үзрә нүмајәндәси Гәни Ахундзадәнин мәтбуат мәсәләләри үзрә јардымчысы олдуғуну билдириб: “Сон 10 илдә “Һүсејнијјә” мәсҹидинә 6-7 ахунд тәјин едилиб. Бурада Ирана бағлы јерли диндарлар јалныз өз адамларынын ахунд сечилмәсини истәјирләр. Она ҝөрә дә башга ахундлар һәмин шәхсләрин әлиндән мәсҹиди тәрк едир. Һәмдулла Әлијев дини иҹманын рәһбәри олмагла бәрабәр мәсҹидин дини ишләр мүдири тәјин едилиб. Кичикбазарлы олдуғуна ҝөрә Һәмдулла Әлијевә гаршы оланлар она тәсир ҝөстәрә билмирләр. Буна ҝөрә дә мәсҹиддә тез-тез мүбаһисә јараныр. Гәни Ахундзадәнин мәсҹидә бирбаша аидијјәти јохдур. О, Бөјүк Базар мәсҹидинин, ејни заманда Ләнкәранын баш ахундудур. Һәм дә Гафгаз Мүсәлманлары Идарәсинин ҹәнуб бөлҝәси үзрә нүмајәндәси олдуғуна ҝөрә мәсҹидләрә нәзарәт едир”.
Һафиз Мирзә гејд едиб ки, барәләриндә ҹинајәт иши галдырылан шәхсләр мәсҹиддә Һәмдулла Әлијеви дөјүбләр: “Онун оғлу да һәмин ҝүн мәсҹиддә олдуғуна ҝөрә һадисәләрә мүдахилә едиб. Сонра мүбаһисә дәниз кәнарында давам едиб, әлбәјаха олублар. Мүнагишә битиб, һамы полисә апарылыб, амма шөбәдә оларкән Һәмдулла Әлијев һеч кимин адыны вермәјиб. Һәмин мәһәлләнин чох гәрибә хүсусијјәти вар. Бу мәһәлләнин өз ганун-гајдасы вар, полисә ады верәнә “сатгын” дамғасы гојулур. Һәмдулла да буну билдијинә ҝөрә һеч кәсин адыны вермәјиб”.
Һафиз Мирзә Кичик Базар “Һүсејнијјә” мәсҹидиндә дәфәләрлә наразылыг салан, ахундлары јола вермәјән адамлары Иранын хүсуси хидмәт органлары илә әмәкдашлыг етмәкдә ҝүнаһландырыб. Бу фикрә ҝәлмәјини исә белә әсасландырыб: “Һәмин шәхсләрин Иранла бизнес әлагәләри вар. Ајдындыр ки, Иран да һеч кәслә тәмәннасыз бизнес әлагәси јаратмыр. Һәмин шәхсләр мәсҹидә ҝәлиб ибадәтини јеринә јетирмәк әвәзинә, өзләринә аид олмајан, дини иҹманын сәлаһијјәтләринә мүдахилә едирләр”.
Ибраһим Азадов өзүнүн вә диҝәр кичикбазарлыларын Иранла әмәкдашлыгда ҝүнаһландырылмасына гәти шәкилдә етираз едиб: “Һафиз Мирзәјә, Һәмдулла Әлијевә, Гәни Ахундзадәјә ким сәлаһијјәт вериб ки, диҝәрләрини аҝент олмагда, сатгынлыгда ҝүнаһландырсынлар? Белә бир ихтијарлары вармы? Дөвләтин һүгуг мүһафизә органы јохдурму? Онда белә чыхыр ки, дөвләт елә бу адамлардыр вә дөвләтин әвәзинә иши онлар ҝөтүрүр? Мән бу иттиһамлары тамамилә рәдд едирәм, биз Азәрбајҹан вәтәндашыјыг вә өз өлкәмизи, өз дөвләтимизи чох севир, онун јолунда ҹанымыздан да кечмәјә һазырыг. Галды бизнес әлагәләринә, мәним Иранла һеч бир әлагәм јохдур. Јалныз 3 ај бундан әввәл сәһһәтимлә бағлы Иранда олмушам вә индијә кими орадакы һәкимләрин јаздығы дәрманлары гәбул едирәм”.
Диггәт: Хәбәрдән истифадә етдикдә мәнбәјә истинад лазымдыр
