Әһли Бејт -АБНА- хәбәр аҝентлијинин вердији хәбәрә әсасән “Гарабағ Әлилләри вә Ветеранлары Ҹәмијјәти” Иҹтимаи Бирлијинин Бакы шәһәр Нәсими рајон шөбәсинин сәдри Әһмәд Рәһманов “Азадлыг”а белә бир мәлумат ҝөндәриб: “Бизә СОҸАР-ын табелијиндә олан ”Азәригаз" Истеһсалат Бирлијиндә ишләјән әлилләрдән чохлу шикајәтләр дахил олмагдадыр. Шикајәтләрдә ҝөстәрилир ки, “Азәригаз”ын сәдри Әкбәр Һаҹыјев гурумун ајры-ајры идарә рәһбәрләринә ҝөндәрдији 27.07.2012 тарихли 817 сајлы “Бирлијин структур бөлмәләриндә ишләјән әлилләр һаггында” мәктубдан сонра әлилләрә гаршы һүгугпозмалар башлајыб.
Мәктубда әлилләрин сосиал дурумујла бағлы ганунлара истинад едиләрәк, идарә рәһбәрләринә табеликләриндә олан әлилләрин иш шәраитинин јахшылашдырылмасы, онларла бағланмыш әмәк мүгавиләләринә јенидән бахылмасы тапшырылыр. Идарә рәһбәрләри дә өз нөвбәләриндә бу мәктубу әсас ҝөтүрәрәк, ҝуја, әлилләрә ујғун јүнҝүл ишләр олмадығындан әлилләри ишдән азад едир..."
О билдирир ки, бу барәдә дөвләт органларына да мүраҹиәт едибләр.
Рәһманов иддиа едир ки, адычәкилән тәшкилатларын һәрәкәти ҹидди ганун позунтусудур: “Ҝәлин бахаг ҝөрәк ки, о тәшкилатлар өз ишчиләринә Әмәк Мәҹәлләсинин 159-ҹу маддәсинә әсасән ағыр иш әмсалы өдәјирми? Һәлә ”Азәригаз" Дөвләт Нефт Ширкәтинин табелијинә кечәндә артыг әлилләрин һүгуглары, еләҹә дә Әмәк Мәҹәлләсинин 47-ҹи маддәсинин Б бәнди, 63, 66, 78, 159, 215-ҹи маддәләри кобудҹасына позулмушду. Әлилләрин иш шәраитини јахшылашдыра билмәјән вә ја буну етмәк истәмәјән идарә рәһбәрләринин сон аддымлары исә артыг јухарыда ҝөстәрилән ганун позунтуларына әлавә олараг, “Әлиллијин вә ушагларын сағламлыг мәһдудлуғунун гаршысынын алынмасы, әлилләрин вә сағламлыг имканлары мәһдуд ушагларын реабилитасијасы вә сосиал мудафиәси һаггында” ганунун 25 вә 29-ҹу маддәләринин дә позулмасы демәкдир".
Диггәт: Хәбәрдән истифадә етдикдә мәнбәјә истинад лазымдыр
