Әһли Бејт -АБНА- хәбәр аҝентлијинин вердији хәбәрә әсасән Дини Етигад вә Виҹдан Азадлыгларынын Мүдафиә Мәркәзи Ҝәнҹә шәһәриндә һөкумәт нүмајәндәләринин Ашураја гаршы һәрәкәтләрини писләјән бәјанат јајмышдыр.
Мәркәзин сәдри Һаҹы Илгар Ибраһимоғлунун јајдығы бәјанатда билдирилир: "Ҝәнҹә шәһәриндә Ашура тәдбирләрини әнҝәлләмәклә бағлы нараһатедиҹи хәбәрләр дахил олмагдадыр. Ҝәнҹә полисинин Ашура һејәтләринә гаршы кобудлуғу, мәсҹидләрин бағланмасы, бүдҹә тәшкилаты ишчиләринин ишә чыхмаға мәҹбур едилмәси, мәктәб мүәллимләринә тәзјиг, мәрасимләрин јалныз "Имамзадә" һәрәми илә мәһдудлашдырылмасы, тиҹарәт вә иашә објектләринин ишләмәси илә бағлы саһибкарлара тәзјиг едилмәси - бунлар Ҝәнҹәдә Ашура тәдбирләрини әнҝәлләмәк ҹәһдләри илә бағлы дахил олан хәбәрләрин јалныз бир һиссәсидир.
ДЕВАММ бу һәрәкәтләри гәтијјәтлә писләјир, бунлары инсанларын конститусион һүгуг вә азадлыгларыны позан гејри-һүгуги әмәлләр кими дәјәрләндирир. ДЕВАММ бәјан едир ки, Ашураја гаршы, инанҹа гаршы бу кими кобуд рәфтар инсанлара атеист Совет режиминин ән сәрт вахтларында сәрҝиләнән јанашманы хатырладыр. Бунлар јалныз бөлүҹүлүјә, ҹәмијјәтдахили вәһдәтинин позулмасына, дөвләтчилијин зәифләмәсинә хидмәт едир.
ДЕВАММ бәјан едир ки, бу кими гејри-гануни әмәлләрин фонунда өлкәмиздә толерантлыг аб-һавасынын олмасы барәдә иддиалар хүсусилә јерсиз ҝөрүнүр. Белә ки, милјонларла азәрбајҹанлынын ментал кодуна јазылмыш Ашура еһтирамына, Ашураны јашатмаг әнәнәсинә гаршы бу ҹүр сајғысызлыглар јер алдығы һалда, һансыса фәргли бахышлара гаршы дөзүмлүлүјүн сәмимијјәтинә ким инана биләр?!
ДЕВАММ олараг, вәтәндашларын дини етигад вә виҹдан азадлыгларынын позулмасы һалларына сон гојмагла бағлы, инанҹла бу кими рәфтарлара јол верилмәмәсилә бағлы әлагәдар гурумлар гаршысында мәсәлә галдырырыг.
Ејни заманда өлкә иҹтимаијјәтинә мүраҹиәтлә, виҹдан азадлыгларынын позулмасы һалларына гаршы, о ҹүмләдән, Ашура мәрасимләринин әнҝәлләнмәсинә гаршы принсипиал мөвге сәрҝиләмәјә чағырырыг".
Хәбәр хидмәти
Диггәт: Хәбәрдән истифадә етдикдә мәнбәјә истинад лазымдыр
