Әһли Бејт -АБНА- хәбәр аҝентлијинин вердији хәбәрә әсасән өтән ил декабр ајынын 2-дә (мәһәррәм ајынын 6-да) ҹүмә хүтбәсиндә Һаҹы Илгар Ибраһимоғлу өлкәдә Ашуранын гејри-иш ҝүнү олмасынын зәрурилијини вә бунун артыг вахтынын ҝәлиб чатдығыны вурғуламышды. Һаҹы Илгар бу мүнасибәтлә демишди: “Биз бу гәнаәтдәјик ки, халгын өзүнүн тәбии олараг гејд еләдији, јашатдығы, һәтта совет дөнәминдә дә горујуб сахладығы бу ҝүнүн матәм ҝүнү кими гејд олунараг, гејри-иш ҝүнү олмасы зәрурәтдир. Чүнки белә олмамасы бөјүк чәтинликләр јарадыр. Бәзи мәмурлар инсанларын матәм мәрасимләриндә иштиракы илә бағлы мүәјјән манеәләр ортаја чыхарыр. Бу, халг матәмидир, халгын ичиндән ҝәлән бир матәмдир. Неҹә ки, Новруз бајрамы, Новруз шәнлији халгын ичиндән ҝәлән бир бајрамдыр вә бу амил, бајрамы рәсми гејд еләмәк үчүн имкан јарадыр. Бунунла бағлы өлкәмизин бүтүн иҹтимаи кәсими илә мүзакирәләр апараҹағыг. Һесаб едирик ки, Азәрбајҹанда бунун һәјата кечмәси үчүн јетәринҹә зәмин мөвҹуддур вә бу, һәм дә советләрдән хилас олмағын бир нүмунәсидир. Бир даһа Аллаһдан тофигат диләјирик ки, бу нәҹиб ишдә халгымызын өз матәмини јашатмасы үчүн даһа да бөјүк имканларынын јаранмасыны нәсиб етсин, иншааллаһ”.
Ардынҹа сабиг баш назир Пәнаһ Һүсејн 2011-ҹи ил (өтән ил) декабр ајынын 3-дә Иҹтимаи Палатанын сессијасында белә бир тәклифдә булунмушду.
Бундан сонра өлкәнин бир чох илаһијјатчылары, иҹтимаи хадимләри, дини кәсимин фәаллары бу тәшәббүсә дәстәк вермишдирләр. Бунларын арасында “Тәкамүл” Тәрҹүмә вә Елми Арашдырмалар Мәркәзинин рәһбәри, илаһијјатчы Һаҹы Ҹејһун Ҹәфәров, “Гуран Еви Дәрнәји”нин рәһбәри Фәрид Абдуллаһ, философ, илаһијјат елмләри үзрә тәдгигатчы Фүзули Шәфијев, милләт вәкили Игбал Ағазадә, “Һәзрәт Рәһимә ханым (с.ә.)” хејријјә ҹәмијјәтинин рәһбәри Кәрбәлаји Натиг Кәримов, тәдгигатчы Рза Әзизоғлу, “Мәнәви Сафлыға Дәвәт” иҹтимаи бирлијинин сәдри, фәлсәфә доктору Һаҹы Елшән Мустафаоғлу, илаһијјатчы Һаҹы Намиг Бабахан, Хәзәр Университетинин мүәллими, фәлсәфә доктору Маил Јагуб, Азәрбајҹан Бирлик Тәшкилатынын сәдри, шәргшүнас Һаҹы Вүсал Һәтәмов вә диҝәр танынмыш сималар вар иди.
“Бу тәшәббүсдән өтән мүддәт әрзиндә вәзијјәти неҹә дәјәрләндирирсиниз” суалына Һаҹы Илгар Ибраһимоғлу “Јени Мүсават”а бунлары билдирди: “Һесаб едирик ки, мөвзунун актуаллығы бу мүддәт әрзиндә хејли артыб. Ашуранын гејри-иш ҝүнү олмасы илә бағлы мүзакирәләр бу ил даһа да актуалдыр. Өтән дөвр ҝөстәрди ки, инанҹла бағлы конструктив давраныш консепсијасынын олмамасы Ашураја мүәјјән дәрәҹәдә өзҝәлик мөвгејинин галарлығында да тәзаһүр етдирилир. Тәәссүф ки, динлә вә диндарларла бағлы советләрә хас јанашма тәрзи һәләлик доминантлыг тәшкил едир. Бир ону демәк кифајәтдир ки, халгымыз өз күтләви зијарәтләри илә, мисилсиз әзадарлыг ҹошгусу илә бу ҝүнүн гејри-иш ҝүнү олмасы илә бағлы мөвгејини билдирир. Һесаб едирик ки, һөкумәт бу мөвгејә һөрмәтлә јанашмалы, ҹәмијјәтдахили консенсуса рәваҹ верән бу кими тәшәббүсләри реал аддымларла тәсдигләмәлидир. Бу, һәм дөвләтчилијин мөһкәмләндирилмәсинә, һәм һүгуг вә азадлыгларын ҝерчәк сурәтдә тәмининә хидмәт едәр”.
Диггәт: Хәбәрдән истифадә етдикдә мәнбәјә истинад лазымдыр
