Әһли Бејт -АБНА- хәбәр аҝентлијинин вердији хәбәрә әсасән әлијев режиминин ШӘРЛӘЈӘРӘК зиндана салдығы Талыш Халгнын зијалысы, философ Һилал Мәммәдов тәҹридханадан Илһам Әлијев режиминә үнванладығы мәктубда бир даһа алиҹәнаблығын нүмајиш етдирди.
Һилал Мәммәдов өз јазысын “Азәрбајҹанын өз елитасы вармы вә јохдурса, формалаша биләрми?” суалы үзәриндә гурарг јазыр:
Истәр совет дөврүнүн, истәрсә дә бу ҝүнүн ән ҝөркәмли мәдәнијјәт вә иҹтимаи-сијаси хадимләриндән олан Рүстәм Ибраһимбәјов сон јүз илдә бәлкә илк дәфә олараг елита мөвзусуну јенидән ҝүндәмә ҝәтирмәклә ҝениш дискуссија аудиторијасы јаратды. Доғрудур, о, мөвзуну әсасән гәдим Бакы (о ҹүмләдән Ширван) әһлинин дәдә-баба јурдларына саһиблијинин итирилмәсинә һәср едиб вә бу сәбәбдән дә тәгиб вә тәзјигләрә мәруз галыб. Әлбәттә, гәлбиндә вәтән, торпаг, дәдә-баба адәт-әнәнәләринин саф севҝиси јох дәрәҹәсиндә олуб, фани дүнја малыны бу мүгәддәс дәјәрләрдән хејли үстүн тутанлар Рүстәм Ибраһимбәјовун бу гәлб јанғысыны дәрк едә билмәздиләр.
Һагсыз һүҹумлара мәруз галан кинорежиссорун кифајәт гәдәр мүдафиәчиси дә тапылды, амма әфсус ки, бу мүдафиә јетәрли дејилди. Одур ки, мөвҹуд шәраити јахшы дәрк едән Рүстәм Ибраһимбәјов бәзи мүсаһибәләриндә мүәјјән маневрләрә ҝетмәјә мәҹбур олду. Чүнки о баша дүшүрдү ки, дүнја мигјасында һәм дә Азәрбајҹан елитасынын бир нүмајәндәси кими танынмасы һеч дә ҹибинә наркотик атылмасыны, сонра да “вәтәнә хәјанәт”дә иттиһам едилмәсини истисна етмир...
Азәрбајҹан елитасы формалаша биләрми?
Бу суала ҹаваб вермәздән өнҹә бир анлыг гајыдаг гәдим маглара вә јунан
философларына. Онлар Јарадан тәрәфиндән сечилмиш (!) хејирхаһ иман саһибләри идиләр – јәни дилләриндән сәсләнән һәр бир сөз вә бир фикир ХЕЈИРли олуб ШӘРин һијлә-фәсадына сөјкәнән мин бир сөз вә фикри дармадағын едирди; онларын һәр бир әмәли ХЕЈИРхаһлыға хидмәт едиб дөврүнүн ән деспот падшаһларыны белә адил вә мәрһәмәтли олмаға вадар едәрди. Онлар һәр һансы формада фани дүнја малынын ләззәтләриндән гачыб, о ӘБӘДИ дүнјанын әбәди сәадәти наминә јашајыб-јарадан фәдаиләр ордусу идиләр...
Елитанын нүмајәндәси олмағын илк вә әсас шәрти – бәндәнин Јарадана иман ҝәтириб бүтүн өмрүнү вә һәјат фәалијјәтини ХЕЈИРИН ШӘР үзәриндә гәләбәсинә һәср етмәсидир: залымын (шәрин) ачыг-ашкар зүлмүнү ҝөрүб сусмаг елә һәмин залыма һәмкар олмаг демәкдир!
Сәтирләримизи охујан атеист руһлу, амма һәр кәлмәсиндә, фикриндә, әмәлиндә адил вә хејирхаһ олмаға ҹәһд едән гардаш-баҹымызы даһа да уҹалараг (!) гәлбләринә бу гәдәр НУР дамлалары чиләјән ХАЛИГә ИМАН ҝәтирмәјә чағырырыг. Бәзи диндар гардаш-баҹыларымыза исә төвсијә едәрдик ки, инсанлары фәргли дин, дил, мәзһәб, тәригәт бахышларына ҝөрә тәнгид етмәмишдән өнҹә өзләринин һәр кәлмә, фикир вә әмәлләрини ХЕЈИРхаһ нијјәтли едиб гәлбләринин НУРландырылмасы илә мәшғул олсунлар. Башга сөзлә десәк, фәргли дүнјаҝөрүшлү бир кимсәни (атеист олса белә) хошаҝәлмәз ағыр бир кәлмә илә јараламаг күфрә ујмагдан башга бир шеј дејил.
Азәрбајҹан елитасынын формалашмасында һансы шәртләр ваҹибдир? Илкин шәрти гејд етдик – хејирхаһ иман саһиби олмаг! Дилиндән, дининдән, иргиндән, мәзһәб вә тәригәтиндән, мәскунлашдығы реҝиондан асылы олмајараг һәр бир вәтәндашына һөрмәт вә еһтирамла јанашан; һәр һансы формада дүнја малы истәјинә галиб ҝәләрәк, үмумхалг мәнафејини шәхси мәнафејиндән үстүн тутан; нәфсини кин-күдурәт, гәрәз, тәкәббүрдән горујан; зүлмлә барышмајан; бәзи ваҹиб мәсәләләрдә сәбирли вә һәр ан әдаләтли олан; дүшмәнлә ләјагәтли мүбаризә апармағы баҹаран; бејнәлхалг аләмдә дә нүфуза малик олуб, мүәјјән просесләрә мүдахилә етмәји баҹаран шәхсләрдән ибарәтдир елита!
Бу ҝүн Азәрбајҹан Зијалылар Форумуну мүәјјән мәнада елитанын илкин формасы һесаб етмәк олар. Бу форумда бирләшән зијалылар доғрудан да бајаг садаладығымыз шәртләрин бөјүк бир гисмини өзләриндә әкс етдирирләр, лакин бу, илк ҹүҹәртиләримиздир, бу јолда гәтијјәтли мүбаризә ҝәрәкдир.
Тәбии ки, азлыгда галан ХЕЈИРХАҺ гүввәләр ШӘР гүввәләрлә мүбаризәдә һәдсиз чәтинликләрлә үзләшмәли олур вә олаҹаглар да... Амма ҝеријә јол јохдур: доғрудан да нијјәтимиз нәинки өлкәмизин вә онун әһлинин, о ҹүмләдән бәшәријјәтин ХИЛАСЫНА доғру истигамәтләнибсә, бүтүн тәгиб, тәзјигләрә сәбирлә дөзәрәк, јолумузу давам етдирмәлијик. Өлүм вә зиндан хофу белә бизи бу ҺАГГ јолумуздан аздырмамалыдыр. (Дини-фәлсәфи бахышларына ҝөрә “СӘРҺӘДСИЗ ДҮНЈА” тәрәфдары олуб, бу истигамәтдә дә һәјат мүбаризәсини гуран, о ҝәләҹәк ӘБӘДИ дүнјаны вәтәни һесаб едән бу сәтирләрин мүәллифини дә чәтин ки, өлүм, ја зиндан хофу горхуда...) Одур ки, гәлбиндә ЈАРАДАНА инам олан һәр бир ХЕЈИРХАҺ бәшәр өвлады јалныз вә јалныз Халигин ипиндән тутараг бәшәријјәтин ШӘРдән хиласы наминә әлиндән ҝәләни әсирҝәмәмәлидир...
Јери ҝәлмишкән, ваҹиб бир мәгама да диггәт јетирмәк ҝәрәкдир: бу ҝүн һакимијјәтдә кифајәт гәдәр сағлам зијалыларымыз да вар ки, онлары да ХЕЈИРХАҺ миссијаја дәвәт етмәк ваҹибдир. Шәхсән өз башымыза ҝәлән хошаҝәлмәз олајларда нәинки кифајәт гәдәр азадфикирли вә гејрәтли вәкилләрлә, һәтта бәзи (бәлкә дә сабаһ хилас ола биләҹәк!) сағлам руһлу мүстәнтиг, ја диҝәр һакимијјәт нүмајәндәләри илә растлашдыг. Инанын ки, онларын да әксәријјәтинин үмидләри бизә иди... Онлар да хилас олмаг истәјирләр...
Беләликлә, бу ҝүн гәлбиндә елита руһуну јашајан һәр кәс һәм өлкәсинин, һәм халгынын, һәм бәшәријјәтин ШӘРдән гуртулмасы наминә әлиндән ҝәләни әсирҝәмәмәлидир! Иншаллаһ, бу просесдә Аллаһ да бизә арха олараг өлкәмизин – Азәрбајҹанын ләјагәтли елитасыны формалашдырар! Ләјагәтли елитасы формалашан халг исә ҝеҹ-тез һаггына саһиб олар!
Күрдәханы тәҹридханасы
Диггәт: Хәбәрдән истифадә етдикдә мәнбәјә истинад лазымдыр
