Бу илин мајында Гах-Загатала бөлҝәсиндә баш верән зәлзәләдән зәрәр чәкәнләрин евләринин тикинтиси давам едир. 3000-ә јахын белә тикилинин јахын вахтлара кими һазыр олмасы нәзәрдә тутулса да, просесин узанаҹағы ҝөзләнилир. Буна сәбәб мәмурларын пул һәрислији вә ајрылан вәсаитләрин гејри-шәффаф хәрҹләнмәсидир.
Загаталанын Гымыр, Ҝөзбарах вә Чобанкол кәндләриндә исә евләринә зијан дәјән сакинләр наразылыг едирләр. Онларын сөзләринә ҝөрә, һәјәтләриндә һәлә дә чадыр гуруб јашајанлар вар. Чүнки евләрдә тәмир-бәрпа ишләри апарылмыр. Јерли иҹра мәмурлары вә ФҺН-ин јерли комиссијасы әһалинин проблемләри илә марагланмыр. Президент вә фөвгәладә һаллар назиринин бөлҝәјә сәфәриндән сонра ҹамаатын дурумунда һеч нә дәјишмәјиб. Евләрин тикинтиси давам етсә дә, мүәјјән гијмәтә вәтәндашлара сатылмаға башланыб.
Белә ки, ФҺН-ин Загатала үзрә нүмајәндәси зәлзәләдән зәрәр чәкәнләрә мәнзил тикинтисини сатыша чыхарыб. О, тикинти ишләрини ајры-ајры адамлара сатыр. Мәнзилин тикинтиси нечәјә баша ҝәлибсә, онун 15-20 фаизи ФҺН-ин јерли рәһбәрлијинә чатмалыдыр. Кәндләрдә тикилән евләрин чоху исә јерли мәмурлара, бәләдијјә сәдрләринә вә онларын јахынларына мәхсусдур. Евинин тәмирә еһтијаҹы олан садә инсанлара исә јардым ҝөстәрилмир.
Гејд едәк ки, “Күр” Вәтәндаш Ҹәмијјәти Гәрарҝаһынын апардығы арашдырмалар заманы мәлум олуб ки, зәлзәлә бөлҝәсиндә баш верән ганунсузлуглар Күр дашгынлары заманы јол верилән позунтулардан даһа чох вә даһа ағырдыр. Аҹынаҹаглы һалдыр ки, зәлзәләнин нәтиҹәләринин арадан галдырылмасы просесинә ҹәлб олунмуш ширкәтләр Күр дашгынлары заманы фәлакәт бөлҝәсиндә фәалијјәт ҝөстәрән, ФҺН рәһбәрлијиндә тәмсил олунан шәхсләрә јахынлығы илә сечилән, гејри-шәффаф, иҹтимаи рәјдә даһа чох коррупсијалашмыш гурумлар кими танынан, һеч бир тендер, мүсабигә кечирилмәдән бу просесә ҹәлб олунмуш ширкәтләрдир.
Нәтиҹәдә һаваларын сојумасына бахмајараг һәлә дә хејли гисим инсан чадырларда јашајыр вә онларын гаршыдан ҝәлән гышы чадырларда кечирмәјәҹәјинә һеч бир тәминат јохдур.
Диггәт: Хәбәрдән истифадә етдикдә мәнбәјә истинад лазымдыр
