Әзиз Әвәз бәј! Мәскунлашдығымыз Бакы Истинтаг Тәҹридханасынын гоншу корпусундан сәни саламлајырам!
Бу ҝүнләрдә тәҹридханаја ҝәлән АТӘТ нүмајәндәләри илә ҝөрүш заманы заһириндә ачыг-ашкар нәзәрә чарпан хәстә һалыны ҝөрүб хејли нараһат олдум. Ахы һәр тәсадүфи ҝөрүшләримиздә сәни һәмишә руһән вә ҹисмән ҝүмраһ ҝөрмүшдүм. “Биз лап јахын вахтларда һаггын гәләбәсинә наил олаҹағыг” кими месажларын мүбаризә әзмимизи даһа да мөһкәмләндирирди...
Әзиз гардашым! Инан ки, өз дәрди-сәрими вә мәнә јүкләдикләри, бири-бирини тәкзиб едән о 3 ағыр гондарма иттиһамы белә унудуб бу пәришан һалына аҹыјыр вә сәнә Аллаһдан тезликлә шәфа диләјирәм... Билирәм ки, бу ҹисмани хәстәлијиндә, үзләшдијин сајсыз-һесабсыз һагсызлыгларын мәнәви сарсынтылары да аз рол ојнамыр... Доғрудан да бу ҝүн биз диҝәр виҹдан мәһбуслары вә сијаси дустагларла бирҝә чох чәтин сынаг имтаһаны гаршысындајыг: өлкәдә баш алыб ҝедән һагсызлыглар, истинтаг вә мәһкәмә просесләринин сифаришли гәрарлары; сечкили органларын, о ҹүмләдән Милли Мәҹлисин сифаришчиләрин бармаглары (пулту) илә сечилмәси вә идарә олунмасы; инсанларын бөјүк бир гисминин бу һагсызлыглара бојун әјмәси; азлыгда галан диҝәр фәдаи гисминин исә һәдсиз тәгиб вә тәзјигләр шәраитиндә фәалијјәт ҝөстәрмәси; азад мәтбуатын (о ҹүмләдән сизин рәһбәрлик етдијин “Хурал”ын) боғулмасы; аиләләримизин, гоһум-әгрәбамызын вә мүдафиәчиләримизин бизә ҝөрә мин бир әзаб-әзијјәтә гатлашмасы бизи нараһат етмәјә билмәз! Амма өзүмүзү әлә алмаға ҹәһд етмәли вә Халигин бу сынаг имтаһанындан да шәрәф вә ләјагәтлә чыхмаға борҹлујуг.
Әзиз гардашым! Сәнә нәгл едәҹәкләримдән сонра өзүн гәрара ҝәләрсән: хәстәләнмәјә һаггымыз вармы?!
Бир нечә ҝүн өнҹә нөвбәти мәһкәмә просесинә ҝедәркән боксда – чарпајыда узанмыш Фәрид Әлијев адлы бир әлиллә растлашдым. “Санчаст”да јатыр. Ону “55”ә (Зығдаки нарколожи диспансерә анализә) ҝөндәрдиләр. Ики чәликлә белә һәрәкәт едә билмирди – јалныз хүсуси чарпајыда дашына биләрди. Амма мәһбуслар ону әлләриндә Пенитенсиар Хидмәтин машынына апардылар. Јәни бу вәзијјәтдә онун “55”ә зорла апармаг ваҹиб идими?!
Фәридлә ики-үч дәгигәлик үнсијјәт заманы өјрәндим ки, Гарабағ әлилидир, дөјүшдә һәр ики ајағы шикәст олуб, контузија алыб вә һәлә дә бәдәниндә бир нечә ҝүллә галығы дурур, она һәдсиз әзијјәт верир. Әфсус ки, ады јадымда галмады, онда мүәјјән сүмүк хәстәлији дә вармыш – һәр һансы кичик бир зәдәдән сонра һәмин јер дә сағалмаз вәзијјәтә дүшүрмүш... Азадлыгда 40-50 манат пенсија алдығыны, амма мүалиҹәсинә ајда 200-300 манатлыг дәрман сәрф етдијини (гоһумларынын дәстәји илә) билдирди. Һеч бир хәстәханада пулсуз мүалиҹә едилмәдијини ҝөрән Фәрид бу ағрыларыны азалмаг наминә ҹүзи мигдарда наркотикдән истифадә етмәји гәрара алыр вә гыса мүддәт әрзиндә дә 234.1-ҹи маддә илә тәгсирли билинәрәк һәбс едилир...
Әвәз бәј, Шүвәландан Күрдәханыја көчдүјүм ҝүн дә боксда белә бир әлиллә растлашмышдым: о, мәнимлә јашыд оларды, Әфганыстанда хидмәт етмиш, сонра исә көнүллү олараг Гарабағ мүһарибәсинә ҝетмиш, орада бир ајағыны итирмиш вә контузија алмышды... О да Фәрид кими ағрыларыны азалтмагдан өтрү ҹүзи мигдарда наркотик истифадәсинә гәрар вермиш вә 234.1-лә ҝәлмишди зиндана... Әфсус ки, ады јадымда галмајыб, амма Масаллынын Маһмудавар кәндиндән иди. Фәрид кими о да ејни дәрддә иди – ҹүзи пенсија алдығыны, пулунун исә дәрманлара белә чатмадығыны билдирди...
Әзиз гардашым, демә, бу 234 бизим зинданларын “бәзәји” имиш, бәлкә дә һәр камерада ән азы бир-ики нәфәр бу маддә илә һәбс едилиб. Һәтта “үмуммилли маддә” статусуну алыб... Азадлыгда икән мән наркотикин јахын ҝәләҹәкдә милләтимизи, хүсусән ҝәнҹләримизи неҹә мәһв едәҹәјини јазмыш, бу барәдә тәҹили дөвләт програмынын һазырланмасы, наркобизнесин архасында дуранларын ифша едилмәси тәләби илә чыхыш етмишдим. Ҝүман едирәм ки, 21 ијун 2012-дә ҹибләримә күллү мигдарда наркотик атылыб, 234.4.3-лә “мүкафатланмағым” тәсадүфи олмајыб, бу ҹинајәтин архасында дуранларын мәндән бир гисасы иди...
Әвәз бәј, бу јахынларда вәкилханаја ҝәләркән јолда бир јарашыглы ҝәнҹ гызла (17-18 јашлы) растлашдым. Нәзарәтчимдән онун нә үчүн тутулдуғуну сорушанда “нә олар ки, 234.1-дир дә...” ешидәндә дәһшәтә ҝәлдим... Мәним “һардандыр” суалыма “Сәнин јерлиндир, Астарадан...” ешидәндә лап ајагларым гуруду... О гызын, һәтта јахын бир кәнддән олдуғуну билиб аз гала һөнкүрәҹәкдим ки, өзүмү зорла сахладым... Сән демә, һәлә нечә диҝәр ханым вә гызларымыз да вармыш бурада...
Өлкәдә дәһшәтли јанғындыр Әвәз бәј, дәһшәтли јанғын: өлкә, милләт әлдән ҝедир... Сағал достум, сағал... Бизим хәстәләнмәјә мәнәви һаггымыз јохдур...
Диггәт: Хәбәрдән истифадә етдикдә мәнбәјә истинад лазымдыр
