Билирик ки, билмәк аздыр вә билдијинә әмәл етмәк мүһүмдүр. Билирик ки, бир ҝүн Малик Әштәр јолдан өтәндә аваранын бири әлиндә оланы она атыр. Маликсә буну һисс етмирмиш кими дүз өтүб кечир. Һәмин авара ешидәндә ки саташдығы адам Малик олуб, горхудан бир башы олур, бир дизи. Амма Маликин бөјүк һәдәфләри варды. Малик туфанлы дәниздә ҝәминин бурнунда дајанмышды санки. Дәнизин күләкдә сычрајыб онун үзүнү ҹырмаглајан дамлаларыны һисс етмир, ја да көјнәјинин голу илә силиб ирәлијә бахырды... Бу ибрәтамиз һадисәни һәр биримиз нәгл едир, амма нөвбә әмәлә чатанда јаддан чыхарырыг. Бәли, билмәк аздыр. Нәһҹүл-Бәлағәнин 164-ҹү хүтбәсиндә Һәзрәт Әлинин (ә) халгы наразы салмыш Османла сөһбәти јер алыб. Һәзрәт (ә) бујурур: “Халг мәни ирәли вериб, өзләри илә сәнин аранда сәфир олараг ҝөндәриб. Анд олсун Аллаһа, билмирәм сәнә нә дејим. Мән елә бир шеј билмирәм ки, сән хәбәрсиз оласан. Сәнә билмәдијин бир шеји төвсијә етмирәм. Мән билдијими сән дә билирсән...” Буну мөвламыз Әли (ә) дөврүн хәлифәси Османа дејир! Осман да билирди, амма...
Әлинин (ә), Маликин билдијини гисмән дә олса һәр биримиз билирик. Дүнјанын синәсиндә Ишғалчы Исраил ағырлыгда бир јара вар. Билән билир ки, планетин нә ағрысы варса, орада сионист бармағы вар. Мәрһум Имам Хомејни (р) мүсәлманлар әл-әлә верәҹәји тәгдирдә бу режимин нәфәс дәрә билмәјәҹәјинә инанырды. Чох чалышды ки, мүсәлман дүнјасыны ојатсын, тәфригәләр кәнара гојулсун, “Маликә атылан дашлара” әһәмијјәт верилмәсин. Инананлар бүтүн иддиалары кәнара гојуб сарылдылар Аллаһын гырылмајан ипинә. Бу ҝүн АБШ, Гәрб, Исраил вә әлалты режимләр тәшвишдәсә, бунун сәбәби бөјүк мүбаризә јолунда кичик иддиалары кәнара гојмуш инсанлардыр. Сән вә мән исә...
Ислам Ингилабынын һәссас ҝүнләриндә Иран Күрдүстанындан гијам хәбәри ҝәлди. АБШ Ислам Ингилабыны боғмаг үчүн бүтүн картлара әл атырды. Имам Раһил (р) Чәмрана гијамы јатырмаг үчүн 24 саат вахт верди. Һәрби вертолјотлар һаваја галхды. Террорчуларын мәркәзләшдији һәрби гәрарҝаһдан аралы Чәмран вертолјота енмәк ҝөстәриши верди. Ингилаба садиг гәһрәман кичик әмәлијјат групу илә јерә енди. Вертолјотлар һавада дөврә вурурдулар. Ашағыда һеч нә ҝөрүнмүрдү. Бир гәдәр өтдү. Чәмран фитнәкарларын гәрарҝаһы үзәринә Ингилаб бајрағыны санҹанда һәлә 24 саат тамам олмамышды! Буну да һамымыз билирик. Амма билмәк бәс етмир. Бу шәр вә бөһтанла силаһланмыш дүшмәнин мејдан суламасы ҝөстәрир ки, биз нәинки Малик дејилик, һәтта Маликә даш атан адама охшарлығымыз вар.
Бизим билдикләримизи дүшмән дә билир. Дүшмән дә билир ки, онун гара ҝүнү мүсәлманлар тәфригәләри кәнара гојуб әл-әлә вердији заман ҝәләҹәк. О, биздән фәргли олараг билдијинә әмәл едир. Мүсәлман ҹәмијјәтини парчаламаға, лидерләри баш-баша гојмаға күлли мигдарда пул јатырыр.
Бүтүн бу сөзләри өзүмә дејирәм, кимсә инҹимәсин. Өзүмә дејирәм ки, сән јахшы мүсәлман дејилсән. Чүнки мәнәм-мәнәмлик, ҹылыз иддиалар варлығыны нәфсинә гул едиб. Бу зүлм дүнјасында Ислам бајрағыны даим һавада сахлајан Чәмранлар, Мүғнијәләр олуб. Сән һара, Чәмран һара?! Сән һара, Мүғнијә һара?! Сән евинә, ҹибинә ҝирән адамы, јолдан өтәндә сөз атан авараны вурарсан, әзәрсән, ганыны ичәрсән. Амма Ислам мүгәддәсликләринә даш атанлара гаршы бөјүк мүбаризәдә јерин јохдур. Чүнки сән Малик кими бөјүк јох, өзүн кими кичиксән! Аллаһ өз рәһмәтинә гәрг етсин иддиасыз шәһидләри, Аллаһ горусун иддиасыз мәһбусларымызы, мүбаризләри, Аллаһ Исламы ҹылызлардан горусун...
“Өлүм алдығыныз ләззәтләри виран гојаҹаг, шәһвәтләринизә көлҝә салаҹаг, мәгсәдләринизи әлчатмаз едәҹәк. Өлүмүн чох арзуланмаз бир ҝөрүшү вар...” – бујурур Тәгвалылар Мөвласы. Өлүм? Һеч јадына дүшүр? Јадына дүшүр ки, бир ҝүн чарәсиз һалда јатаға дүшүб ҹан верәҹәксән? Дејәҹәкләр филанкәс өлдү. Демәјәҹәкләр шәһид олду. Чүнки дүнја истәкләри, шәхси мәнафеләр, мәнәм-мәнәмлик јолунда шәһадәт јохду. Бәлкә үстәлик бир ләнәт дә ҝөндәрдиләр далынҹа!..
Арзу Ејвазов
Диггәт: Хәбәрдән истифадә етдијдә мәнбәјә истинад лазымдыр
