Әһли Бејт -АБНА- хәбәр аҝентлији- "Мәркәзи Асијанын нефт баронлары, мода илаһәләри вә һаким аиләләрилә таныш олун". Бу сөзләр Американын "Foreign Policy" журналында дәрҹ олунан мәгаләдәндир. Мәгаләдә Азәрбајҹан, Өзбәкистан, Газахыстан вә Гырғызыстанда өлкәни идарә едән "варлы һаким аиләләр" һаггында јазылыр. Мүәллиф Кетрин Макалекдир. "ББС Азәрбајҹанҹа" јазыдан Азәрбајҹан һаггында һиссәни гыса ихтисарла тәгдим едиб.
"Азәрбајҹанда президентин аиләси өз вар-дөвләтини өлкәнин ҝәлирли нефт саһәсиндән әлдә едир. 1993-ҹү илдә һакимијјәти әлә кечирмиш кечмиш "КГБ" ҝенералы Һејдәр Әлијевин дөврүндә онун оғлу Илһам дөвләт нефт ширкәтинин витсе-президенти иди. АРДНШ инди өлкәнин 7 милјард барел нефт еһтијатларына нәзарәт едир.
2003-ҹү илдә Һејдәр Әлијев өләндә президентлик ҝүҹлү нәзарәт алтында кечирилән сечкиләр васитәсилә Илһама кечди. АРДНШ дөвләтин ширкәтидир... Азәрбајҹанын нефт ҝәлирләринин дахил олдуғу нефт фонду исә президентин нәзарәти алтындадыр.
Азәрбајҹан ганунлары һөкумәт рәсмиләринин, о ҹүмләдән президентин бизнесә саһиб олмасыны јасаглајыр, амма аилә үзвләринә белә мәһдудијјәтләр гојулмур", - дејә журнал јазыр.
Әлијевин ушагларынын хариҹдә ширкәтләри вә дәбдәбәли евләри вар
Мүәллиф "Азадлыг" радиосунун тәһгигатларына истинад едәрәк јазыр ки, Илһам Әлијевин ушагларынын адына хариҹдә ширкәтләр вә дәбдәбәли евләрин олдуғу ашкарланыб: "Мәсәлән, онун гызлары Лејла Әлијева (27 јаш) вә Арзу Әлијева (23 јаш) гызыл мәдәнләринин үзәриндә отурублар. 2007-ҹи илдә режим Азәрбајҹан Бејнәлхалг Минерал Ресурсларын Әмәлијјат Ширкәтинә (AİMROC) Човдар кәнди јахынлығындакы гызыл јатагларында 70 фаизлик пај вериб. Галан 30 фаиз исә һөкумәтә мәхсусдур. Човдар јатағы 44 тон гызыл вә 164 тон ҝүмүш еһтијатларына маликдир вә онларын дәјәри 2.5 милјард доллардыр. AİMROC дөрд ширкәтин бирләшмәсидир. Онлардан бири - Британијада јерләшән "Ҝлобех Интернатионал" 200 милјон доллар дәјәриндә 11 фаизлик паја саһибдир, бу ширкәтин саһиби исә Панамада гејдијјатдан кечмиш үч һолдинг ширкәтидир, онларын баш менеҹерләри Әлијев баҹыларыдыр.
Диҝәр тәһгигатларда да башга сәнаје саһәләриндә охшар структурлар ашкар олунуб. Панама сәнәдләриндә Лејла вә Арзу Әлијева үч һолдинг ширкәтин баш иҹрачылары кими гејдијјатдадыр: Һуҝһсон Манаҝемент, Ҝриннелл Манаҝемент вә Ҝладwин Манаҝемент.
Мәлумата ҝөрә, Һуҝһсон Азәрбајҹанын ән бөјүк конгломераты АТА Һолдингдә 51 фаиз паја мәхсусдур. Бундан башга Һуҝһсон, Ҝриннелл вә Ҝладwин Азерфон телекоммуникасија ширкәтиндә 24 фаиз паја маликдир.
Арзу һәмчинин Silk Way ширкәтләр групунда бөјүк паја саһибдир. Бу һолдинг һава јоллары сәнајеси монополијасыдыр вә АЗАЛ дөвләт һава јоллары ширкәтинин өзәлләшдирилмәси васитәсилә јарадылыб"
Мүхалифәтә һүҹумлар вә журналистләри һәбсә атмагла корланан имиҹ
Мүәллиф "Washington Post" гәзетиндә 2010-ҹу илдә дәрҹ олунмуш јазыја да истинад едәрәк хатырладыр ки, президентин ушаглары илә адлары вә јашы үст-үстә дүшән шәхсләр Дубајда 75 милјон долларлыг евләрә саһибдирләр: "Дашынмаз әмлак рәсмиләри дејибләр ки, евләрин бәзиләри үчүн пулу президент аиләсинин нүмајәндәси өдәјиб".
Мәгаләдә даһа сонра јазылыр: "Лејла аиләсинин мүхалифәтә һүҹумларла, блоггер вә журналистләри һәбсә атмагла корланан имиҹини јахшылашдырмаг үчүн хејријјә ишләри ҝөрүр. О, Һејдәр Әлијев Фондунун витсе-президентидир. Фонд Лејланын анасы, биринҹи леди Меһрибан Әлијева тәрәфиндән јарадылыб. Онун веб сајтында јазылыб ки, фонд Азәбајҹан Тәһсил Назирлијиндән даһа чох мәктәбләр, Сәһијјә Назирлијиндән даһа чох хәстәханалар тикир вә Мәдәнијјәт Назирлијиндән даһа чох тәдбирләр кечирир.
Лејла бу јахынларда "Бакы" адлы мәдәнијјәт вә мода журналы ачыб вә о, Москвада нәшр олунур. Онун һәјат јолдашы, поп улдуз Емин Ағаларова Бакыда кечирилән 2012-ҹи ил Еуровисион маһны мүсабигәсиндә хүсуси чыхыш имтијазы верилмишди.
Бир нечә ил әввәл Арзу Азәрбајҹанын туризм симасы олмушду. Онун чәкилдији реклам видеосу бир нечә дүнја шәбәкәсиндә, о ҹүмләдән СНН-дә ҝөстәрилмишди. 46 санијәлик клипдә сарышын Арзу гламур мүһитдә, дәбдәбәли машынларын, маликанәләрин вә дәниз саһили курортларын әһатәсиндә ҝөрүнүрдү".
Диггәт: Хәбәрдән истифадә етдијдә мәнбәјә истинад лазымдыр
