Әһли Бејт -АБНА- хәбәр аҝентлијинин вердији хәбәрә әсасән “Толыши сәдо” гәзетинин һәбсдә олан редактору Һилал Мәммәдовун Һүгугларыны Мүдафиә Комитәси онун азад едилмәси мәгсәдилә иҹтимаи кампанијаны ҝүҹләндирмәк нијјәтиндәдир.
Комитәнин дүнәнки иҹласында мәһбусун гардашы Сәбаһәддин Мәммәдов билдириб ки, сон һәфтәләр иш үзрә һеч бир истинтаг һәрәкәти апарылмыр. Бу, һәм ганунсуз наркотик сахламаг, һәм дә дөвләтә хәјанәт иттиһамлары илә бағлыдыр.
Комитә сәдри Арзу Абдуллајева Мәммәдовун сахландығы андан етибарән һүгугларынын кобуд шәкилдә позулдуғуна диггәт чәкиб. Белә ки, о, физики тәзјигә мәруз галыб, евиндә ахтарыш просессуал нормаларын позунтусу илә һәјата кечирилиб. Тәгсирсизлик презумпсијасы позулуб.
О, бир груп һүгугшүнаса вәкилләрлә бирликдә мүдафиә тактикасы вә Мәммәдовун һүгугларынын тәмин едилмәси үзрә тәдбирләр ишләјиб һазырламағы тәклиф едиб.
Мүстәгил һүгугшүнас Халид Бағыров һесаб едир ки, һакимијјәт Мәммәдовун иши үзрә мәлуматлары ҝизләтмәјә чалышыр. Мәһз буна ҝөрә вәкилләрдән истинтаг сирләрини ачмамаг барәдә илтизам алыныб. “Һүгуг-мүһафизә органлары өзләри итинтаг материаллары һаггында мәлумат јајырса, нијә вәкилләрә бу гадаған едилир? Бу, вәкилләрин игтидарыны әлиндән алмаг үчүн гәсдән едилир", дејә һүгугшүнас билдириб.
Онун фикринҹә, вәкилләр Мәммәдовун иши үзрә мәһкәмәнин гапалы кечирилмәси илә әлагәдар вәсатәтлә чыхыш етмәлидир.
Һүгугшүнаслар Елчин Намазов вә Намизәд Сәфәров да бу фикри дәстәкләјиб.
Туран Информасија Аҝентлијинин директору Меһман Әлијев бејнәлхалг иҹтимаијјәтә Мәммәдовун шәхсијјәти барәдә мәлумат вермәк мәгсәдилә онун һаггында биографик ессе һазырламағы тәклиф едиб.
Политолог Зәрдүшт Әлизадә Мәммәдовун Һүгугларыны Мүдафиә Комитәсинин фәалијјәтини баш редактора бејнәлхалг дәстәк кампанијасы һәјата кечирән Русијалы һүгуг мүдафиәчиси Светлана Ганнушкина илә координасија етмәји тәклиф едиб.
Иҹласын јекунларына ҝөрә, һүгугшүнасларын јахын ҝүнләрдә Мәммәдовун һүгуги мүдафиәси үзрә конкрет тәдбирләр һазырламаг, һабелә она гаршы физики тәзјиг фактларыны арашдырмаг гәрара алыныб.
Диггәт: Хәбәрдән истифадә етдикдә мәнбәјә истинад лазымдыр
