Әһли Бејт -АБНА- хәбәр аҝентлијинин вердији хәбәрә әсасән бу ҝүн Азәрбајҹан Ислам Партијасында исламчы мәһбус аиләләри илә ҝөрүш кечирилиб. Тәдбирдә чыхыш едән АИП Гадынлар Шурасынын сәдри вә Әсҝәр Аналарына Дәстәк ИБ рәһбәри Нөврәстә Ибраһимова «Төвбә» сурәсиндән ајә охујараг билдирди ки, Аллаһ-Тала мөминләрдән ҹанындан, малындан алды. Һәгигәтән онлар үчүн бу алынанлар Ҹәннәтдир. Бу ҝүн һарамла-һалалын чалхаландығы вахт гибтә еләдијимиз инсанлар вар. Онлар өлүмү јетишәндә билир ки, Аллаһ јолунда дүнјасыны дәјишмәк ән үстүндүр. Аллаһ бизи дә елә бир һөрмәтә наил еләсин.
Даһа сонра Нөврәстә Ибраһимова өлкәмиздәки Ислам шәһидләриндән сөһбәт ачды: «Бизим дүнјамызда Ислам шәһиди чохдур. Вә өлкәмизин дә артыг бу сырада ады һалланыр. Рәһмәтлик Вагиф Абдуллајев өзү мәнә Ислам Партијасынын илк шәһиди Һаҹы Кәбләғанын адыны чәкмишди. Һаҹы Кәбләғанын өзү дејиб ки, Ислам динини јајмалы, һәдијјә вермәли, елмимин зәкаты јохдурса нә гәдәр бәдәнимдә, вар-дөвләтимдә зәкат вар Ислама верәҹәм. Һәјат јолдашы Јеҝанә ханым исә она садиг олараг, зәһмәтини итирмәјәрәк даим Ислам јолунда иш ҝөрмәјә јенә дә һазырдыр.”
Нөврәстә ханым топлантынын әсл сәбәбиндән данышараг билдирди ки, «биз бу ҝүн Рәббинә говушан, тәзә зәввар олан, сијаси мәһбус, һиҹаб шәһиди Вагиф Абдуллајев гардашымызы анмаг үчүн јығышмышыг. Һәгиги мәнада өз ганындан, ҹанындан кечән илк һиҹаб шәһидимиз һәр заман өз аиләсинә төвсијә едирди ки, мәнә бурда һәр шеј ола биләр. Сиз сәбирли олун, тәскинлик тапын, мәнимлә ифтихар етмәји баҹарын».
Сонра чыхыш едән АИП-ин һәбсдә олан сәдри Мөвсүм Сәмәдовун һәјат јолдашы Меһпарә ханым, «биз бу јолда мәһрумијјәтләрлә, чәтинликләрлә үзләшмишик вә бундан ҝилеј-ҝүзарымыз да јохдур. Буну өзүмүзә ифтихар санырыг. Шәһид вә шәһадәт мәгамы бу ҝүн дә милләтләрин талејини һәлл едир. Һәмин бу шәһадәт мәктәби дүшмәнләрин ҹанына хоф салыр, онларын Ислам дәјәрләринә әл узатмагдан мәјус едир. Бүтүн бу дедикләримдә мәгсәд Һаҹы Вагиф гардашымыз вә онун аиләсинин бөјүк бир сәадәтә наил олдуғуну билдирмәкдир. Чүнки бу шәхс һәјатыны паклыгла сүрүб. Ҝөзәл аилә саһиби олуб, өзүндән сонра лајигли өвладлар ирс гојуб. Сон ҝүнләрини дә һагг јолунда зинданда мәзлумҹасына дүнјадан ҝедиб. Ифтира, бөһтанла тутулмағына, она гаршы сүрүлән иддиаларын сүбут олунмамағына бахмајараг, 11 ил јарым мүддәтинә азадлыгдан мәһрум едилиб, зиндана салыныб. Вә нә өлкәдахили, нә дә бәшәри ганунлара сығмајан шәкилдә, хәстә һалда, чох пис шәраитли зиндана салыныр. Һансы ки, онун сәһһәтинә ујғун ҝәлмир. Бу зинданда иҹазә вермәдиләр ки, сон ҝүнләриндә аиләсини ҝөрсүн, вәсијјәтини етсин. Бу инсан ән мәзлум шәраитдә дүнјадан көчүб. Бу шәһадәтин ән јүксәк мәгамыдыр. О ширин шәһадәт шәрбәтини биздән габаг ичиб. Аллаһ-Тәала бизи дә онун давамчыларындан гәрар версин», - дејә билдирди.
Меһпарә ханым сон олараг билдирди ки, «бизә даим месаж ҝөндәрирләр, сөзләр чатдырырлар ки, суссаныз, данышмасаныз даһа јахшы олар, мәһбусларынызын шәраити бир аз јүнҝүлләшдирирләр. Буна бахмајараг демәк истәјирәм ки, сусмаг о шәхс үчүндүр ки, горхур вә ҝүнаһкардыр. Бу месажлар ҝөстәрир ки, һагг јолдајыг».
Тәдбирин сонунда шәһид Кәбләғанын һәјат јолдашы Јеҝанә ханым тәрәфиндән Вагиф Абдуллајевин һәјат јолдашы Ҝүлзар ханыма Ислами Ојаныш вә Гадынлар Конфрансы адындан верилән мүкафат тәгдим олунуб.
Диггәт: Хәбәрдән истифадә етдикдә мәнбәјә истинад лазымдыр
