Әһли Бејт -АБНА- хәбәр аҝентлији- “Баш верәнләри бир ҹүмлә илә белә изаһ етмәк мүмкүндүр. Һакимијјәт һәјата кечирдији ејбәҹәрликләри өрт-басдыр етмәк үчүн бу ҹүр тәдбирләрә ҝениш рәваҹ верир.” Бу сөзләри FaktXeber.com-а Азәрбајҹан Зијалылар Бирлијинин сәдри Елдәниз Гулијев мүгәддәс Рамазан ајы әрәфәсиндә јәни 25 ијулда Азәрбајҹанда илк дәфә олараг кечириләҹәк “Мәдәнијјәтләр Ҝөзәли 2012” адлы ҝөзәллик мүсабигәси вә Һәҹҹ мөвсүмүндән өнҹә Ҹенифер Лопезин милјон долларлар һесабына Бакыја ҝәтирилмәсинә мүнасибәт билдирәркән гејд едиб.
Артыг бу ҹүр тенденсијанын нечә илләрдир ки, мүшаһидә едилдијини билдирән Елдәниз бәј, “баш верәнләрин һамысы дүшүнүлмүш шәкилдә милли-мәнәви дәјәрләрин ашыланмасына јөнәлиб”, - дејә билдирди: “Лакин бу тәдбирләрин әвәзиндә халгын ган јаддашыны тәзәләјәҹәк һеч бир иш ҝөрүлмүр. Ејни һалда мәнәви дәјәрләрә гаршы баш галдыран мүгавимәт, мүгавимәтлә ҹавабландырылыр. Белә ки, ҝүн кечдикдә оруҹ тутанларын вә мәнәви дәјәрләрә әмәл едәнләрин сајы артыр. Артыг инсанлар үчүн инанмаға бир шеј галмајыб. Аллаһын әтәјиндән башга тутмаға әтәк галмајыб. Хүсусилә мүгәддәс ајларда бу тип тәдбирләрин кечирилмәси илә һакимијјәт бир даһа сүбут етди ки, мүгәддәс вә мәнәви дәјәрләрә етинасыз јанашыр.”
Елдәниз бәј ону да билдирди ки, бу тәдбирләрин һамысы хүсуси вә дүшүнүлмүш формада тәшкил едилир: “Баш верәнләри фресканын бир һиссәси кими ҝөтүрсәк, мәлум олар ки, бунлар һамысы идарә едилир. Бир нечә ил бундан өнҹә гәзетләрдә пејғәмбәрин тәһгирини, мәсҹидләрин сөкүлмәсини, азан вә һиҹаб гадағасыны, ејни һалда сон заманлар диндарларын шәрләнәрәк күтләви шәкилдә һәбс едилмәсини нәзәрә алсаг, шаһиди оларыг ки, мозајка бир шәкил алыныб вә о шәкилин ады дүшүнүлмүш сијасәтдир.”
Диггәт: Хәбәрдән истифадә етдикдә мәнбәјә истинад лазымдыр
