Әһли Бејт -АБНА- хәбәр аҝентлијинин вердији хәбәрә әсасән Медиада Азәрбајҹан Ислам Партијасынын Лерик рајон комитә сәдринин истефа вермәси илә бағлы мәлумат јајылыб. Мәлуматда билдирилир ки, рајон тәшкилатынын рәһбәрлији вә үзвләри сон заманлар партијанын фәалијјәтини, сијаси курсуну вә Ирандан сифаришләр алдығыны әсас ҝәтирәрәк партијаны бурахмаг гәрарына ҝәлибләр.
Јајылан мәлуматла бағлы FaktXeber.com-а ачыглама верән АИП-ин сәдр мүавини Акиф Һејдәрли, партијанын үмумијјәтлә Лерик рајон комитәсинин олмадығыны билдирди: “Бир нечә ил бундан өнҹә Лерик рајон комитәси Нурәддин адлы бир шәхсин сәдрлији илә фәалијјәт ҝөстәрирди. Лакин сәдр башга јерә көчдүкдән сонра комитәнин фәалијјәти тамамилә бағланыб. Артыг 10 илә јахындыр ки, Лерик рајон комитәси ләғв едилиб.”
Бу ҹүр сәвијјәсиз тәхрибатларла ислам партијасынын фәалијјәтинә сүни манијәләр јаратмаг истәдикләрини гејд едән АИП функсионери, бунунла һеч бир шејә наил ола билмәјәҹәкләрини вурғулады: “Шүбһәсиз ки, партија өз фәалијјәтини давам етдирир. Артыг сон 1 ил әрзиндә 6 рајон комитәси јарадылыб. Һазырда да 8 рајонда да партијанын конфранслары кечирилир. Һәр ҝүн партијанын фәалијјәти вә инсанларын партијаја ахыны даһа да ҝүҹләнир.”
Диггәт: Хәбәрдән истифадә етдикдә мәнбәјә истинад лазымдыр
