Әһли Бејт -АБНА- хәбәр аҝентлији- Вәһһабилик 20 илдән артыгдыр ки, Азәрбајҹана ајаг ачыб. Бу исә өлкәмизин мүстәгиллик газандығы вахтлара тәсадүф едир. О вахтлар ән мүхтәлиф дини тәригәтләрин өлкәјә ахыны башламышды. Чох кечмәди ки, дин азадлығындан истифадә едән чохсајлы гејри-әнәнәви дини иҹмалар дөвләт гејдијјатына да алындылар. Доғрудур, вәһһабиләрин гејдә алынмасы барәдә мәлумат верилмәјиб. Амма Дини Гурумларла Иш үзрә Дөвләт Комитәсинин (ДГИДК) бу јахынларда вәзифәсиндән кәнарлашдырылан сабиг сәдри Һидајәт Оруҹовун мәһз вәһһабиләрин гејдијјатыны ҝизләтдији үчүн истефаја ҝөндәрилдији һагда информасија јајылды. Вә бунунла да истәр өлкә әразисиндә, истәрсә дә сәрһәдләримиздән кәнарда хејли террор акты төрәдән вәһһабиләрин дәстәкләнмәси мәнтиги тәсдигини тапды. Ејни заманда мәлум олду ки, әнәнәви динләрин, дини гурумларын фәалијјәтинин мәһдудлашдылылмасы, тәзјигләрлә үзләшмәси илә вәһһабиләрә дәстәк ҝөстәрилмәси арасында әлагә мөвҹуддур.
Мәсәләјә мүнасибәтини ачыглајан Азәрбајҹан Ислам Партијасы (АИП) сәдринин биринҹи мүавини Ингилаб Әһәдли әввәлҹә вәһһабилијин үмуми Ислам дүнјасы, Азәрбајҹан халгы вә дөвләтчилији үчүн һәтта дүшмән Ермәнистандан даһа тәһлүкәли олдуғуну вурғулады. Вә деди ки, ишғалчы ермәниләр бизә дүшмән олдугларыны ачыг шәкилдә бәјан едирләр. Амма ҝизли зәрбә вурдуғу үчүн дин пәрдәси алтында фәалијјәт ҝөстәрән вәһһабилик даһа бөјүк фәлакәтдир: “АИП јарандығы ҝүндән, конкрет десәк, 20 илдир ки, бунунла бағлы һәјәҹан тәбили чалыр. Һәтта бундан өтрү бизи тәгиб вә тәзјигләрә мәруз гојублар. Нәтиҹәдә исә вәһһабиләрин ачыг фәалијјәтинә шәраит јаранды. Ән аҹынаҹаглысы да одур ки, әҝәр белә демәк мүмкүнсә, һәмин тәригәт - әслиндә дин дүшмәни - ордуја да өз тәсирини ҝөстәрди; бир нечә забит вәһһабилији тәблиғ етди. Бакы меринин оғлу, Конститусија Мәһкәмәсинин кечмиш мәсул ишчиси Исфәндијар Абуталыбовун да, Шәки Апеллјасија Мәһкәмәсинин артыг сабиг сәдринин сүрүҹүсүнүн дә һәмин тәригәти дәстәкләдији мәлум олду. Беләләринә о гәдәр сәрбәстлик верилди вә бәзи мәмурлар тәрәфиндән дәстәкләндиләр ки, сонда јүксәк чинли МТН забитини дә гәтлә јетирдиләр, Газах рајонунда бир нечә полиси өлдүрдүләр”.
“Ҝөрүнүр, дөвләт артыг сәһвини – өз дүшмәнини гидаландырдығыны баша дүшүр” дејән Әһәдлинин сөзләринә ҝөрә, вәһһабилијә мејдан верилмәси, онларын фәалијјәтинә шәраит јарадылмасы, Һ.Оруҹовун һәмин тәригәти гејдә алдығы һалда, һесабатда ҝөстәрмәмәси чох мәтләбләрдән хәбәр верир: “О, өз шәхси истәкләрини һәјата кечирмәк үчү бу мәсәләдән суи-истифадә едиб. Амма гурумун илк сәдри Рафиг Әлијевин дөврүндә баш верән просесләр вәһһабиләрин һәлә онун заманында дәстәкләндијини ҝөстәрир. Доғрудур, вәһабиләрин фәалијјәтинин вә онлара дәстәк верәнләрин кимлијинин арашдырылмасы ҝеҹикмиш аддымдыр. Белә ки, артыг вәһһабиләр гудузлашыблар. Амма һәр һалда зијанын јарасындан гајытмаг, онлара дәстәк верәнләрин адларыны ачыгламаг да әһәмијјәтлидир”.
Бәс вәһһабиләрин фәалијјәти, һакимијјәт даирәләри тәрәфиндән дәстәкләнмәси нә кими зәрәр вурду? Саф, мәсум, халгына, дининә, дөвләтчилијә садиг галан иҹтимаи-сијаси хадимләримизин, дин алимләримизин шәрләнәрәк һәбсханалара атылдыгларыны әсас ҝәтирән И.Әһәдли деди ки, вәһһабиләрин ҹинајәтләрининин ҹазасыны Азәрбајҹанын гајмаглары оланадамлар чәкирләр: “Әнәнәви Ислам давамчыларынын тәзјигләрлә үзләшмәси мәһз белә јарарсыз төр-төкүнтүләрә – вәһһабиләрә шәраит јарадыр. Јәни һүгуг-мүһафизә органларынын, бәзи мәмурларын башы гондарма террорчу образы јаратмаға гарышыр, һәгиги террорчулар – вәһһабиләр исә зәрәрли фәалијәтләри илә мәшғулдурлар. Мәсәлән, Азәрбајҹан Ислам Партијасы, еләҹә дә заман-заман өз сөзләрини дејән әнәнәви дини гурумларын фәалијјәтинин мәһдудлашдырылмасынын, јасагланмасынын, саф Исламчыларын һәбсинин архасында вәһһабилијин дәстәкләнмәси дајаныр”.
АИП функсионеринин гәнаәтинә ҝөрә, бәзи гүввәләр Азәрбајҹаны парчаламаг үчүн вәһһаби вирусундан истифадә етмәјә чалышырлар: “Вәһһабилик бүтүн дүнја, о ҹүмләдән Азәрбајҹан үчүн тәһлүкәли вирусдур. Буну һакимијјәт органлары да дәрк едир. Амма әфсуслар олсун ки, дүшмәни әгидәли, мәнәвијјатлы, саф инсанларын ичәрисиндә ахтарырлар”.
Сонда бу тәһлүкәдән јаха гуртармағын јолларына тохунан И.Әһәдли һесаб етдијини билдирди ки, өзүнү Ислам дини ады алтында тәгдим едән вәһһабилијә гаршы мүбаризәни бу саһәдә тәдгигатлары олан дин алимләримиз, руһаниләримиз, бүтөвлүкдә мүсәлман Азәрбајҹан халгы, иҹтимаи-сијаси, дини тәшкилатлар, о ҹүмләдән АИП, ДЕВАММ, “Мәнәви Дәјәрләр” Иҹтимаи Бирлији, ГМИ вә диҝәр чохсајлы гурумлар вәһдәт шәклиндә апармалыдырлар: “Сөзсүз ки, дөвләтин дә бөјүк ролу олмалыдыр. Дөвләт илк нөвбәдә бунун үчүн шәраит јаратмалы, вәһһабиликлә еффектив мүбаризәдән өтрү ҝүнаһсыз һәбс олунан Исламчылары, мөминләри азадлыға бурахмалыдыр. Әҝәр белә бир шәраит јарадылса Азәрбајҹан вәһһабилик вә диҝәр тәһлүкәләрдән хилас олар”.
Диггәт: Хәбәрдән истифадә етдикдә мәнбәјә истинад лазымдыр
