Һикмәт Һаҹызадә
Азәрбајҹанда бәзи кишиләрин, истәр чалыб-охујан, истәр елм, истәр дә иш адамы олсун, өлкәдәки дәрәбәјликдән сөһбәт дүшәндә "сијасәтлә марагланмырам" демәсинин јәгин ки, шаһиди олмусунуз. Гадынлары баша дүшмәк олар, мүсәлман дүнјасыдыр, ушаға бахмаг вар, әрин назы илә ојнамаг вар, палтар-палаз јумаг, хөрәк биширмәк, банка бағламаг вә саир ишләрин чохлуғундан әксәр ханымлар сијасәтә мараг ҝөстәрмир. Кишинин јашадығы ҹәмијјәтдә ҹәрәјан едән просесләрә биҝанәлик нүмајиш етдирмәси бир аз гәрибә ҝөрүнүр.
Әввәла ону дејим ки, сијасәтлә марагланмаг ҹанлылар аләминдә јалныз инсанлара нәсиб олуб. Нәдән ки, инсанын башында АҒЫЛ адланан бир нәсә вар. Сөһбәт дәрк етмәк, дүшүнмәк игтидарында олан БАШ-дан ҝедир, үзр исәјирәм, ешшәкдә вә ја гојунда олан башдан јох. О башдан ки, инсаны јарадыҹылыгла мәшғул олмаға, гуруб-јаратмаға, һуманистлијә, ҝәләҹәји дүшүнмәјә вадар едир.
Инди бәзи кишиләр дејәндә ки, "мән сијасәтлә марагланмырам", адам истәр-истәмәз БАШ һаггында дүшүнмәк мәҹбуријјәтиндә галыр. Вә ики нәтиҹә һасил олур. Ја о кәсләрин башы ејнән ешшәјин вә гојунун башы кими ишләјир, ја да мал-мүлкүнү вә бәзи анатомик органларыны сығорталамаг үчүн сијасәтлә марагланмадыгларыны изһар едирләр.
Икинҹи нәтиҹәни даһа дүзҝүн һесаб етсәм дә, БУ МӘМЛӘКӘТДӘ БАШЫ ЕЈНӘН ЕШШӘЈИН вә ја ГОЈУНУН БАШЫ КИМИ чалышан чох сајда АДАМҸЫГларын да варлығыны инкар етмәк әдаләтсизлик олар. Һәр бириниз јахындан вә узагдан таныдыгларынызы ағылын сүзҝәҹиндән кечирин вә бахын-ҝөрүн "Еуровисион-2012"-јә ев саһиблији едәҹәк Бакы шәһәриндә нә гәдәр ешшәјә вә гојуна тај икиајаглы мәхлуг вар вә бу ајры бир јазынын мөвзусудур.
Разылашын, бу ҝүн Азәрбајҹанда сијасәтин баш вурмадығы ев јохдур. Вә ишсиз дә, сәрҝәрдан да, алим дә, һәким дә, мүәллим дә, кәсәси, ҹүмлә вәтәндашларымыз режимин јүрүтдүјү сијасәтин бурулғанындадыр.
Зијалынын маашы һәр ил бир кило гојун әтинин еквивалентиндә артырылыр, әманәтләр 10:1 нисбәтиндә гајтарылыр, пенсијалар мәдәнин проблемини зорла өдәјир, мәмурлара рәва билинән мааш кишинин башыны ашағы едир, вәтәндашларын евләри дағыдылыр, һаггы дејәнин башына мин мүсибәтләр ачылыр, ишғалдакы вәтән торпаглары фәрјад едир вә паралел олараг дөвләт башчысынын аилә үзвләри, гоһумлары, јүксәк вәзифәдә оланларын варидатлары һаггында дүнјанын нүфузлу мәтбуат органлары јазыр.
Белә бир дурумда һансы һагла, һансы мәнәвијјатла демәк олар ки, мән сијасәтлә марагланмырам. Бәс нә илә марагланырсан, ај адамҹыг? Гарнынламы? О заман сәнин һејвандан нә фәргин олду ки.
Сән нәдән ИНСАН олдуғуну анламырсан?
Нәдән анламырсан ки, КИШИ әјилмәмәлидир, әјләндирмәмәлидир, гүрурла јашамалыдыр, һаггын тәрәфиндә дурмалыдыр.
Кишинин КИШИЛИЈИ мәҝәр нәсил артырмагла, шәһвәт сөндүрмәклә, вилла тикдирмәклә, објект ачмагла, мәшугәјә машын һәдијјә етмәклә өлчүлүр?
Кишилик ҹәмијјәтдә түғјан едән һагсызлыға, әдаләтсизлијә, ријакарлыға, јалтаглыға, ҹинајәткарлыға гаршы КИШИ сәсини галдырмагдыр, КИШИ сөзүнү демәкдир, сәсини галдыран, сөзүнү дејән кишиләрин сырасында дурмагдыр.
Бу өлкәдә әмәкдарлар бир тәрәфә, сајы-һесабы билинмәјән "халг шаири", "халг јазычысы", "халг артисти", "халг рәссамы" адыны дашыјан кишиләр вар. Бир-икисини чыхмаг шәрти илә, јердә галанлары халгын мүбтәла олдуғу бәлалара там биҝанәдир. Диндирән кими "мәним сијасәтлә ишим јохдур" ҹавабыны верир. Әҹәба, бунлар һансы халгын шаири, јазычысы, артисти, рәссамыдыр ки, Азәрбајҹан халгынын башына ачылан мүсибәтләри ҝөрмүрләр?..
Күтбејин мәмурлар Азәрбајҹанын дөрд тәрәфини ҝуја мәрһум Һејдәр Әлијевә мәхсус мәнасыз афоризмләрлә бәзәјиб. О афоризмләрин иҹра башчылары, јахуд диҝәр дөвләт јеткилиләринин тәхәјјүл мәһсулу олдуғуну иддиа едәнләр вар. Фәгәт Һејдәр Әлијевә мәхсус бир афоризми шәхсән мән тәгдир едирәм. "Кишинин мөвгеји олар" дејиминин мүәллифи Һејдәр Әлијев олуб. Ҝерчәкдән кишинин мөвгеји олмалыдыр. Затән бу халг та гәдимдән белә мөвгесизә КИШИ демәјиб. Һеч бундан сонра да демәјәҹәк.
Илһам Һәсәнов
Диггәт: Хәбәрдән истифадә етдикдә мәнбәјә истинад лазымдыр
