Әһли Бејт -АБНА- хәбәр аҝентлијинин вердији хәбәрә әсасән ачыгламада дејилир ки, Иран Ислам Республикасынын Хариҹи Ишләр Назирлијинин сөзчүсү Рамин Меһманпәрәст мајын 29-да кечирдији брифингдә “Арија” информасија аҝентлијинин суалыны ҹавабландыраркән Азәрбајҹандан данышыб.
“Арија” әмәкдашы суалы белә гојуб: “Бакы дөвләти Иран сәфирлијинин етираз бәјанатына бахмајараг мүгәддәсләримизи тәһгир едән үнсүрләри писләмәкдән чәкинди вә мајын 28-дә али рәһбәрин нүмајәндәсинин бу өлкәјә дахил олмасына иҹазә вермәди. Хариҹи Ишләр Назирлијинин буна реаксијасы неҹәдир?”.
Меһманпәрәст дејиб: “Бундан өнҹә дә билдирмишик ки, ола биләр, Ислам дүнјасына гаршы чыханлар, еләҹә дә сионист режими вә фитнә саланлар реҝион дөвләтләри арасында хош мүнасибәтләрин олмасыны һеч бир вәҹһлә истәмирләр. Бу сәбәбдән баш верән фитнәләр гаршысында ајыг олмаға вә мүдриклик ҝөстәрмәјә еһтијаҹ вар.
Биз Азәрбајҹан Республикасы рәсмиләриндән тәләб етмишик ки, бу тәхрибатларла әлагәдар ағыллы мөвге сәрҝиләсинләр, ики өлкә арасында мөвҹуд атмосферин вә халгларын һисс вә дујғуларынын бизи бу гаршылыглы хош атмосфердән, тарихи вә мәдәни бағлылыгдан фајдаланмаг имканындан мәһрум едә биләҹәк бир истигамәтә јөнәлмәсинә иҹазә вермәсинләр.
Бүтүн реҝион өлкәләри буҝүнкү һәссас шәраити нәзәрә алмалыдыр. Дәјишикликләр далғасы инкишафдадыр вә мүстәгиллијинә говушмаг арзусунда олан өлкәләр бу просесләри јашамагдадыр. Белә бир шәраитдә сионист режимин вә онларын Гәрбдән олан һимајәдарларынын јеҝанә хилас јолу фитнә вә тәхрибатлар төрәтмәклә бу режимин хиласы үчүн имкан јаратмагдан ибарәтдир. Бизим төвсијәмиз будур ки, фәрдләрин һүгуглары вә меһрибан гоншулуг әлагәләри чәрчивәсиндә елә һәрәкәт едәк ки, инсанларын һиссләринә тохунмајаг. Мүгәддәсләрә һөрмәтсизлик етмәјә кимсәјә әсла иҹазә вермәјәҹәјик. Бакы дөвләти максимум сәј ҝөстәрмәли, белә һәрәкәтләрә кәскин мүнасибәт бәсләмәли вә онун сәбәбкарларыны мүһакимә етмәлидир.
Азәрбајҹан Республикасы рәсмиләриндән истәјирик ки, бу өлкәдә баш вермиш сон һадисәләри диггәтлә арашдырараг дини мүгәддәсләрә һөрмәтсизлик едәнләрә гаршы тәдбирләр ҝөрсүнләр вә реҝионун иҹтимаи рәјиндә мөвҹуд олан атмосферин бу һәрәкәтләр нәтиҹәсиндә мәнфијә доғру дәјишмәсинә имкан вермәсинләр”.
Диггәт: Хәбәрдән истифадә етдикдә мәнбәјә истинад лазымдыр
