Әһли Бејт -АБНА- хәбәр аҝентлијинин вердији хәбәрә әсасән Дахили Ишләр Назирлији АХҸП сәдри Әли Кәримлинин јашадығы үнвана полис әмәкдашларынын ҝәлмәси вә онун Бакы шәһәр Баш Полис Идарәсинә чағырылмасына мүнасибәт билдириб.
Назирлијин мәтбуат хидмәтинин рәиси, полис полковники Садиг Ҝөзәлов АПА-ја билдириб ки, өтән ҝүн аксија заманы сахлананлардан бир нечәси өз изаһатларында онлары бу ишә АХҸП сәдри Әли Кәримлинин тәһрик етдијини билдириб:
«Буна ҝөрә Әли Кәримлинин өзүнүн дә полисә чағырылараг изаһат вермәси зәрурәти јараныб. Әли Кәримли телефон зәнҝләринә ҹаваб вермәдијинә ҝөрә, ики полис әмәкдашы дүнән ахшам саатларында онун јашадығы үнвана ҝедәрәк чағырыш вәрәгәси тәгдим етмәк истәјиб. Лакин мәнзилин гапысыны һеч ким ачмајыб. Бу ҝүн сәһәр саатларында ики полис әмәкдашы јенидән бир нечә дәфә һәмин үнвана баш чәкиб, нәһајәт саат 09.40 радәләриндә чағырыш вәрәгәсини она тәгдим едибләр»
С. Ҝөзәлов дејир ки, Ә. Кәримли бу мәсәләни сијасиләшдирәрәк, Азәрбајҹанда олан хариҹи журналистләрин диггәтини өзүнә ҹәлб етмәк истәјир:
«Һазырда Әли Кәримли изаһат вермәк үчүн Бакы Шәһәр Баш Полис Идарәсиндәдир».
ӘЛИ КӘРИМЛИ ПОЛИСДӘ ИФАДӘ ВЕРИР
Мајын 26-сы сәһәр саат 11 радәләриндә АХҸП сәдри Әли Кәримли ифадә вермәк үчүн Бакы шәһәр Баш Полис Идарәсинә ҝәлиб. Ону вәкил Фәхрәддин Меһдијев мүшајиәт едир. Лакин нә Әли Кәримли, нә дә вәкил онун һансы сәбәбдән полисә чағырылдығыны билир. Ә. Кәримли билдириб ки, мајын 25-дән 26-на кечән ҝеҹә бир груп идманчы ҝөркәмли шәхс онун мәнзилинин гапысыны бир саат әрзиндә дајанмадан дөјүб. Партија сәдринин сөзләринә ҝөрә, онлар ҝедәндән сонра исә башга бир груп сәһәрә кими онун евини нәзарәтдә сахлајыб.
Ә. Кәримли журналистләрә ачыгламасында һеч бир ганунсуз һәрәкәт етмәдијини вә буну «һакимијјәтин нөвбәти анти-демократик аддымы» адландырыб.
Мүдафиә тәрәфи еһтимал едир ки, Ә. Кәримлинин инди полисә чағырылмасына сәбәб мајын 26-да «Еуровисион- 2012» маһны мүсабигәсинин финалы ҝүнү мүхалифәтин аксија кечирмәк нијјәтинин гаршысыны алмагдыр. АХҸП, Мүсават партијалары вә бәзи иҹтимаијјәт нүмајәндәләринин бирләшдији Иҹтимаи Палата «Еуровисион» маһны мүсабигәсинин һәм биринҹи, һәм дә икинҹи јарымфиналы ҝүнү аксија кечирмәјә ҹәһд едиб. Полис һәр ики аксијанын гаршысыны алыб, сахлананлар олуб.
Әли Кәримли полисә ҝетмәздән әввәл јашадығы бинанын әтрафына хејли сајда партија үзвләри, јерли вә хариҹи журналист, вәтәндаш ҹәмијјәтин үзвләри, АТӘТ нүмајәндәләри топлашыб.
Диггәт: Хәбәрдән истифадә етдикдә мәнбәјә истинад лазымдыр
