Әһли Бејт -АБНА- хәбәр аҝентлијинин вердији хәбәрә әсасән Алманијанын нүфузлу медиа гурумларындан бири “Дер Таҝесзеитунҝ” гәзетиндә Азәрбајҹан һакимијјәти барәдә нөвбәти ифшаедиҹи мәгалә јајымланыб. “Азәрбајҹан - Аиләнин мүлкү олан нефтократија” адлы мәгаләдә Азәрбајҹан һакимијјәтинин коррупсионер вә антидемократик режим олдуғу вурғуланыр. Гәзет Азәрбајҹанда инсан һаглары вә сөз азадлығынын дурумунун бәрбад олдуғуну, һаким аилә вә она јахын елитанын өлкәнин бүтүн ҝәлир мәнбәләрини өз нәзарәтинә ҝөтүрдүјүнү јазыб.
“Бу өлкәдә инсан һагларындан данышмаға дәјмәз...”
“Нефтлә зәнҝин өлкә олан Азәрбајҹан антидемократик вә коррупсионер Әлијев кланы вә она јахын елита тәрәфиндән идарә олунур. Өлкәдә инсан һагларынын дурумундан данышмаға исә дәјмәз. Тәнгидчи медиа сусдурулур. Евинин сөкүлмәсинә етираз едән журналист Идрак Аббасов Дөвләт Нефт Ширкәтинин әмәкдашлары тәрәфиндән дөјүлүб. О, евинин булдозерләрлә дағыдылмасынын шаһиди олуб”, - дејә мәгаләдә билдирилир.
“Дер Таҝесзеитунҝ” даһа сонра јазыр ки, Бакы “Еуровисион” јарышмасына ев саһиблији едир. Јарышмаја һазырлыг үзүндән консерт залынын тикилдији јерә јахын евләр сөкүлдү. Һөкумәт компенсасија өдәсә дә, сакинләр верилән пулун базар гијмәтләриндән ашағы олдуғуну билдирир. Евләрини тәрк етмәк истәмәјән сакинләр исә тәһлүкәсизлик гүввәләри вә мәмурлар тәрәфиндән зоракылыгла үзләшир. Онлар дөјүләрәк евләриндән чыхарылырлар.
“Әлијев кланы һагда ифшаедиҹи мәлумат јајыланда шантаж вә тәһдид башланыр”
Гәзет әлавә едир ки, Азәрбајҹанда мүстәгил журналистләр вә тәнгиди фикир сөјләјәнләр тәһлүкәсизлик гурумларынын “гара сыјаһысындадыр: ”Журналист Хәдиҹә Исмајылова Илһам Әлијев режими тәрәфиндән тәһдид вә шантаж олунду. Ондан апардығы арашдырмалары дајандырмаг тәләб олунурду. Исмајылова Азәрбајҹанда коррупсија арашдырмаларынын мүәллифи кими таныныр. Мәлуматлара ҝөрә, Илһам Әлијев кланы һагда ифшаедиҹи хәбәрләр јајыланда белә һаллар баш верир. Әлијев кланы “Еуровисион” финалынын кечириләҹәји “Crystal Hall”ун тикинтисини һәјата кечирән “Аzenco” ширкәтинин дә саһибидир. Залын тикинтиси үчүн пулларын дөвләт пенсија фондундан ҝөтүрүлдүјүнә даир хәбәрләр јајылыб".
Бундан әввәл диҝәр нүфузлу медиа гурумларынын јаздығы кими, “Der Tageszeitung” гәзети дә гејд едир ки, Азәрбајҹанын авторитар режими “Еуровисион” мусиги јарышмасындан өз имиҹини мүсбәт мәнада формалашдырмаг, мүасир ҝөрүнмәк үчүн истифадә етмәјә чалышыр. Гәзетин јаздығына ҝөрә, Әлијев кланы, назирләр вә олигархлар өзләрини тәһлүкәсиз шәраитдә һисс едәрәк, истәдикләрини еләјирләр. Онлар индијә гәдәр нефт вә газдан ҝәлән ҝәлирләрә нәзарәти әлә кечирибләр. Азәрбајҹан сон он илләр әрзиндә тәбии еһтијатлардан ҝәлән ҝәлирләр һесабына инкишаф етсә дә, нефт ҝәлирләри халга чатмыр. Јашајыш сәвијјәсиндә артым һисс олунмур. Ишсизлијә гаршы мүбаризә апарылмыр.
“Азәрбајҹан һакимијјәти нефт-газа миннәтдар олмалыдыр”
“Азәрбајҹан типик нефт өлкәсидир. Һаким елита игтисадијјатын бүтүн саһәләрини өз нәзарәтинә ҝөтүрүб. Ҝәлирләр клан үзвләри арасында пајлашдырылыр. Бу коррупсионер елита игтисадијјатын шахәләндирилмәсиндә мараглы дејил. Һәмчинин сијаси системин демократикләшмәсиндә дә. Чүнки бунлар режиминин мәғлубијјәти олар. Онлар енержи секторуна нәзарәти итирә биләрләр. Илһам Әлијев 2003-ҹү илдә атасындан һакимијјәти тәһвил алыб. Онун режими атасынын режиминдән даһа авторитардыр. Илһам Әлијевлә мүгајисәдә онун атасынын һакимијјәти илләрини ”гызыл әср" адландырмаг олар. Һејдәр Әлијев заманында етираз аксијаларына иҹазә верилирди, мүхалиф партијалар парламентдә тәмсил олунурду. Анҹаг сон 6 илдә өлкәдә етираз аксијаларынын кечирилмәсинә гадаға гојулуб. 2010-ҹу ил парламент сечкиләриндә реал мүхалифәт тәмсилчиләриндән һеч ким мандат ала билмәди. Илһам Әлијев 2009-ҹу илдә референдум кечирәрәк президентлик мүддәтинә гојулан мәһдудијјәти арадан галдырды. Гәрб Азәрбајҹана јетәринҹә тәзјиг ҝөстәрмир. Рәсми Бакы буна ҝөрә нефт вә газа миннәтдар олмалыдыр", - дејә гәзет јазыр.
Мәгаләнин сонунда о да вурғуланыб ки, Азәрбајҹанда вәтәндаш ҹәмијјәти фәалларынын күтләви етираз аксијаларына һаким аилә гејри-рәсми гадаға гојуб. Һәтта өлкәнин биринҹи ханымы Меһрибан Әлијева ачыгламаларынын бириндә буну тәсдигләјиб: “Биз ”Еуровисион" мусиги јарышмасы әрәфәсиндә бајрам әһвал-руһијјәсинин позулмасына имкан вермәјәҹәјик".
Диггәт: Хәбәрдән истифадә етдикдә мәнбәјә истинад лазымдыр
