Азәрбајҹан Мүбариз Руһаниләр Ҹәмијјәтинин (МРҸ) сәдри, илаһијјатчы Тоһид Ибраһимбәјлинин Түркијәнин Кудүс ТВ шәбәкәсинин “Азәрбајҹан Һиҹаб Тутсаклары” програмында јајымланан чыхышы:
Бисмиллаһир-Рәһманир-Рәһим
Әввәлҹә сизә, студијада олан гонаглара миннәтдарлығымы билдирирәм ки, гардаш өлкә олараг өз азәрбајҹанлы баҹы-гардашларынызын сәсинә сәс вермисиз. Иншааллаһ, Аллаһ гаршысында вәзифәнизи јеринә јетириб, биз мүсәлманларын чағырышына ләббејк демисиниз. Аллаһ сизи һифз етсин!
Үз тутурам һәм Азәрбајҹан, һәм Түркијә ҹәмијјәтинә, һәм дә бүтүн башга мүсәлман халглара. Мәлумдур ки, Советләр Бирлији дағыландан сонра мүсәлман өлкәләр үчүн мәкрли лајиһәләр һазырланды. АБШ, Исраил, Гәрбдәки анти-ислам чеврәләр мүсәлман өлкәләриндән ислами һүрријјәт, дини етигадлары алмаг истигамәтиндә фәалијјәтә башлады. Азәрбајҹан да бу өлкәләрдән биридир. Бу лајиһәләр 15-20 илдир иҹра олунур. Мәгсәд бундан ибарәтдир ки, дини символлар, дини атрибутлар өлкәмиздә ләғв олунсун.
Әлијевләр режиминин реаксијасы нә олду? Режим бу лајиһәләрә хејир-дуа верди. Хәјанәткар лајиһәләрин иҹрасы Азәрбајҹанын стратеҝијасына чеврилди. Јәни бу план һәм мүһарибә вахты, һәм јохсуллуг дөнәминдә, ән критик заманларда иҹра олунмалыдыр!
Авропа Бакы-Ҹејһан нефт кәмәринин һашијәсиндә Һејдәр Әлијевдән дини атрибутларын, дини символларын арадан ҝөтүрүлмәсини истәјиб. Бу ҝүн ҝөрүрүк ки, динимиз, һиҹаб, намус-гејрәтимиз үчүн тәһлүкә вар, бу програмлашдырылмыш вә лајиһәләшдирилмиш бир ишдир вә Әлијевләр өз ағаларына бунунла бағлы сөз верибләр.
Әҝәр биз суссаг, мүбаризә хәттиндән чәкинсәк, әмин олун ки, онлар аддымларыны даһа да сүрәтләндирәҹәк, Азәрбајҹаны дүнјанын ән бөјүк фәсад мәркәзләриндән биринә чевирәҹәкләр. Буна ҝөрәдир ки, Еуровисион вә ҝеј-парад Азәрбајҹана салыныб.
Нечә һәфтәдир ки, Азәрбајҹанда, өлкәнин ајры-ајры бөлҝәләриндә режим нүмајәндәләри ағсаггалларла, нүфузлу адамларла ҝөрүшләр кечирилир вә инсанлары инандырмаға чалышырлар ки, Еуровисионун Азәрбајҹана чох хејри вар, Азәрбајҹан дүнјада танынаҹаг. Һомосексуалларын парадыны исә инкар едирләр. Амма бир дәфә ҹүрәт едиб рәсми шәкилдә телеканалларда, информасија аҝентликләриндә ҝеј-парадла бағлы тәкзиб вермәјибләр. Бунлар халгы алдатмаг истәјирләр. Мәһз буна ҝөрә бизим гардашларымыз, мүбариз руһаниләримиз, ҹан-ҹијәрләримиз һәбсдәдир. Онларын һәбси һәбс сајылмыр, гардашларымыз һәгиги азадлыгдадырлар. Бу ҝүн биз, бајырда оланлар һәбсдәјик.
Аллаһ-Таала Һаҹы Мөвсүм кими инсаны Азәрбајҹана әманәт вериб вә ону әманәт олараг һәбсдә сахлајыр. Аллаһ-Таала ки, Азәрбајҹанда бөјүк зәһмәтләр чәкмиш Һаҹы Абҝүл кими мүбариз гардашымызы әманәт сахлајыр һәбсдә. Бу һәбсләр Аллаһ-Таала тәрәфиндән бизә һәдијјә вә мәрһәмәтдир. Залымын ич үзү бу һәбсләрлә ачылыб вә ачылыр. Һаҹы Мөвсүмүн чыхышындан бир ил өтүб. Бу бир илдә Азәрбајҹанда нәләр баш вериб! Ҹәмијјәт зүлмә гаршы мүбаризәдә нә гәдәр маарифләниб. Бир ил габаг тәкҹә исламчылар галхарды, исламчыларын сәси чыхарды. Амма бу ҝүн бүтүн Азәрбајҹан зүлмә етираз едир. Евләр сөкүлүр, халг етираз едир, коррупсија вә рүшвәтхорлуға етираз олунур, башга мәсәләләрә етираз едилир. Бунлар һамысы халгын етигадыны формалашдырды. Бу Һаҹы Мөвсүмүн тарихи вә ихласла чыхышынын нәтиҹәсидир.
Нурәддин Ширин гардашмызын сөзләринин тәсдиги олараг Һәзрәт Мәһәммәд пејғәмбәрдән (с) вә онун әһли-бејтиндән бир нечә һәдисә ишарә етмәк истәјирәм. Пејғәмбәр (с) бујурду: “Еј мәним үммәтим! Дөврүн дин алимләри јер үзүндә бизим нүмајәндәләримиз, әманәт саһибләримиздир. Һадисәләрлә үзләшәндә онлара мүраҹиәт един - о вахта гәдәр ки, о алимләр дүнјаја дахил олмајыблар!” Әсһаб суал верир: “Ја Рәсуләллаһ, алимләрин дүнјаја дахил олмасы неҹә олур?” Һәзрәт бујурур: “Әҝәр бир алим зәманәнин залым һакиминин зүлмүнүн гаршысында сүкут едиб өз етиразыны билдирмәсә, о алим дүнјаја дахил олмушдур (дүнјанын гулуна чеврилмишдир). Белә бир вахтда дининизи ҝөтүрүб гузу ҹанавардан гачдығы кими о алимдән узаглашын!”
Ајры бир һәдисдә Имам Садиг (ә) бујурур: “Мәлундур, мәлундур о алим ки, Аллаһын дини тәһлүкәдә олан вахтда сусуб өз етиразыны билдирмир!”
Башга бир һәдисдә Имам Һүсејн (ә) бујурур:
“Һеч вахт о аны ҝөрмәк истәмирәм ки, мәним кими бири Језид кими биринин гаршысында бејәт едиб онун әмәлләријлә барышсын.”
Әҝәр өзүмүзү һүсејнчи һесаб едириксә зәманәнин Језид кимиләри илә Имам Һүсејн (ә) кими рәфтар едиб, зүлмүн гаршысында баш әјиб сусмамалыјыг. Әҝәр Әлијевләр режими Језиддән пис олмаса да, ән азы Језид кимидир. (Амма Језид ҝеј-парад кечирмәмишди) Чох мараглыдыр ки, бир груп руһани вә диндар азан сәсинә гадаға гојуланда сусдулар, мәсҹид дағыланда сусдулар, һиҹаба гадаға гојуланда сусдулар, диндарлар һәбс едиләндә сусдулар. Инди дә ҝәлиб гејрәтимизә, намусумуза әл узадырлар. Онларса јенә дә сусур. Адларыны руһани, диндар гојанлар нә вахт дининә јанаҹаг? Һансы вахт етираз сәсләрини галдыраҹаглар? Бундан лап пис вәзијјәт вармы?! Әҝәр инди динимизин јараларына мәлһәм олмасаз, нә вахт олаҹагсыз?
Бу ҝүн һәр кәс ҝүҹү һәддиндә етираз етмәлидир. Ән азы диллә етираз! Һамынын Һаҹы Мөвсүм, Һаҹы Абҝүл гәдәр шүҹаәти ола билмәз. Амма сөзлә етираз едиб, зәрбәнин гаршысыны ки ала биләрик!
Бу һакимијјәт ҝедәҹәк. Бунлар фиронҹығазларды, ҹылыз варлыгларды. Гәлбләриндә Аллаһын горхусу олан инсанлар бир ан бу Әлијевләрә бахса онларын нә гәдәр әскик, ҹылыз олдуғуну дәрк едәрләр. Ҝөз лазымды буну ҝөрсүн. Бу зүлмүн гаршысында сүкут едиб баш әјмәк, гул вә нөкәр олмаг дүнја вә ахирәтдә хәҹаләт сәбәбидир.
Ајылын еј алимләр, еј мөминләр, еј Азәрбајҹан халгы, еј мүсәлманлар! Бу ҝүн бүтүн дүнја зорлулары биз мүсәлманлар үчүн Азәрбајҹанда, Түркијәдә вә башга өлкәләрдә һијлә гуруб. Бу сәссиз мүһарибәдир. Әҝәр мүһарибәдә ганымыз төкүлсәјди бу гәдәр әзаб чәкмәздик. Амма ән бөјүк мүһарибә сәссиз мүһарибәдир. Бу арада досту мунафигдән ајырмаг чәтинди, ихтилаф саланлар һәр ҝүн чохалар. Бу арада дост досту дүшмән, дүшмәни дост һесаб едәр. Буну ајырмаг үчүн ҝәрәк Аллаһдан јардым диләјәк. Биз бәзи вахтлар мүбаризә мејданына атыланда Аллаһдан јардым истәмәјимиз аз олур. Ихласымыз, тәкҹә Аллаһа хатир аддым атмағымыз зәиф олур. Она ҝөрә нәтиҹә әлдә етмирик. Бу ҝүн Һаҹы Мөвсүмүн бир чыхышы Азәрбајҹаны силкәләди. Она ҝөрә ки, Һаҹы Мөвсүмүн бахышы да ибадәт иди, јериши дә. Бир сөзлә, о Исламын һәгиги тәҹәссүмүдүр. Дост, дүшмән Һаҹы Мөвсүмү ҝөрәндә Аллаһ јадына дүшүр. Мәһз белә бир шәхсијјәт Азәрбајҹан Ислам Ојаныш һәрәкатынын рәһбәридир. Үмүд едирәм белә бир шәхсијјәт вә Һаҹы Абҝүл кими гардашлар һәрәкатын өнүндәдир. Биз һәгигәтән гәләбә чалаҹағыг. Аллаһын залымлара хәбәрдарлығы баша чатыб, онларын зәлил олаҹағыны ҝөрәҹәјик. Биз бунун үчүн чалышмалыјыг.
Гаршыда Еуровисион ҝәлир, һомосексуалларын парады ҝәлир, биабырчылыг, бигејрәтлик ҝәлир. Еуровисиона мејдан верәнләрлә мүбаризә апармајан руһани хәјанәткардыр - ән азы өзүнә, намусуна хәјанәт едир! Етиразыны билдирмәјән мөмин ән азы өзүнә хәјанәт едир. Әҝәр биз адымызы Имам Һүсејнчи, Әһли-бејт јолуну ҝедәнләр гојмушугса ҝәрәк чалышаг. Аллаһын әзабы ҝәләндә бахмајаҹаг ким јахшыды, ким писди, етираз етмәјәнләр Аллаһын әзабына дүчар олаҹаглар.
Аллаһ Сиздән разы олсун. Азәрбајҹанда мүсәлманларын гејдинә галан сизин кими инсанлара јардымчы олсун. Аллаһы анд верирәм Һәзрәт Меһдинин (әҹ) еһтирам вә һөрмәтинә, Азәрбајҹанда олан фиронҹығазлары тезликлә мәһв етсин, иншааллаһ.
Вә рәһмәтуллаһи вә бәракатуһ.
Диггәт: Хәбәрдән истифадә етдикдә мәнбәјә истинад лазымдыр
