Әһли Бејт -АБНА- хәбәр аҝентлијинин вердији хәбәрә әсасән Иран Ислам Республикасы вә Бејнәлхалг Атом Енержиси Аҝентлији (БАЕА) арасында гаршыдакы данышыглар сијаси, һүгуги вә техники аспектләрдә ҹәмләнәҹәк. Бу барәдә чәршәнбә ахшамы Тренд-ә Иранын БАЕА-дакы нүмајәндәси Әли Әсҝәр Солтанијә билдириб.
Өтән ҹүмә ҝүнү Солтанијә бәјан етмишди ки, Теһран вә БАЕА арасында нүвә проблеми үзрә данышыгларын јени раунду мајын 13-14-дә Вјанада баш тутаҹаг.
Солтанијәнин сөзләринә ҝөрә, Иран Ислам Республикасынын нүвә фәалијјәти БАЕА-нын нәзарәти алтындадыр. О билдириб ки, Ислам Республикасынын нүвә објектләриндә јохламалар һәфтәдә бир дәфә һеч бир проблем олмадан апарылыр.
"Иран Ислам Республикасындакы Нәтәнз, Фордо нүвә реакторлары вә АЕС-ләрдә бүтүн јохламалар даими әсасда вә проблемсиз апарылыр. Артыг нечә илдир ки, Иран нүвә програмынын һәрби аспектләриндә тәгсирләндирилир, лакин биз дәфәләрлә бунун әксини сүбут едирик", - Солтанијә гејд едиб.
Иран Ислам Республикасынын нүвә програмы илә бағлы өлкәјә гаршы иттиһамларын әсассыз олдуғуну бир даһа билдирән Солтанијә гејд едиб: "БАЕА-нын кечмиш рәһбәри Мәһәммәд әл-Барадеји өз мәрузәсиндә гејд етмишди ки, Ислам Өлкәсинин һәрби објектләри вар, лакин објектләрдә нүвә материалларынын мөвҹудлуғу сүбут едилмәди. Буна бахмајараг, Иран Ислам Республикасы индијәдәк ачыг шәкилдә тәгсирләндирирләр".
Онун сөзләринә ҝөрә, Иран Ислам Республикасы нөвбәти дәфә сүбут етди ки, бу иттиһамлар әсассыздыр: "Биз артыг БАЕА илә данышыгларын ики раундуну кечирдик вә өнәмлидир ки, һәр ики тәрәф өз ролуну билир" – дејә Солтанијә билдириб.
Солтанијә бәјан едиб ки, Иран Ислам Ресубликасы нүвә силаһынын јајылмамасы һаггында мүгавиләдә гејд едилән БАЕА-нын суалларына ҹаваб вермәклә бағлы һеч бир өһдәлијә малик дејил. Онун сөзләринә ҝөрә, бунунла белә, Ислам Дөвләти Иран вә аҝентлик данышыгларын структуру һаггында план гура вә разылаша биләрләр. Бурада мәгсәд Ислам Республикасынын нүвә фәалијјәти илә бағлы бәзи шүбһәләри арадан галдырмагдыр.
"Биз нүвә проблеми илә бағлы гаршыдакы ҝөрүшдә БАЕА-нын директору Јукија Аманонун көмәкчиси Рафаел Гросси, онун мүавини Һерман Накертс вә диҝәр рәсмиләрлә данышыглар апараҹағыг. Үмид едирәм ки, Иран Ислам Республикасынын нүвә програмы илә бағлы проблем тамамилә һәлл едиләҹәк", - Солтанијә дејиб.
Диггәт: Хәбәрдән истифадә етдикдә мәнбәјә истинад лазымдыр
