Әһли Бејт -АБНА- хәбәр аҝентлијинин вердији хәбәрә әсасән Губа һадисәләринә ҝөрә һәбс едилмиш журналист Заур Гулијев "Инсан Һаглары Уғрунда" Иҹтимаи Бирлијинә мүраҹиәт ҝөндәриб. Мүраҹиәтиндә журналист Дахили Ишләр Назирлијинин Баш Мүтәшәккил Ҹинајәткарлыгла Мүбаризә Идарәсинин тәҹридханасында ишҝәнҹәләрә мәруз галдығыны билдириб. Бирлијин сәдри Ејнулла Фәтуллајев дахили ишләр назири Рамил Усубова һәмин тәҹридханада сахлама шәраитинин јохланмасы хаһиши илә мүраҹиәт етсә дә, ҹаваб алмајыб.
Журналистин мүраҹиәтинин бир сурәти дөвләт башчысына да үнванланыб.
Мартын 1-дә Губада иҹра һакимијјәтинин башчысы Рауф Һәбибовун истефасы тәләби илә етираз аксијасы кечирилиб. Аксијачылар Рауф Һәбибовун өтән ил нојабрын 22-дә сосиал мәсәләләрин мүзакирәсинә һәср олунмуш мүшавирәдә сәсләндирдији бәзи фикирләри губалылара һөрмәтсизлик кими гәбул етдикләрини вурғулајыблар. Һадисәләрдән бир нечә ҝүн өнҹә интернетдә Рауф Һәбибовун һәмин мүшавирәдәки чыхышынын 1 дәгигә 18 санијәлик видеосу јајылыб.
Һазырда Республика Прокурорлуғунун Ағыр Ҹинајәтләрә Даир Ишләр үзрә Истинтаг Идарәси Губада баш верәнләрин истинтагыны апарыр. Истинтаг просесинин ҝедишиндә “Хәјал” телевизијасынын иҹрачы директору Вүгар Гонагов вә баш редактор Заур Гулијев барәсиндә һәбс гәтимкан тәдбири сечилиб. Журналистләр Губанын иҹра башчысы Рауф Һәбибовун чыхышынын гысалдылмыш вариантыны һазырламагда иттиһам олунурлар. Онлара Ҹинајәт Мәҹәлләсинин 233-ҹү (иҹтимаи гајданын позулмасына сәбәб олан һәрәкәтләри тәшкил етмә вә јә бу ҹүр һәрәкәтләрдә фәал иштирак етмә) вә 309-ҹу (вәзифә сәлаһијјәтләрини ашма) маддәләри илә иш ачылыб.
"Инсан Һаглары Уғрунда" Иҹтимаи Бирлијиндән верилән мәлумата ҝөрә, Заур Гулијев мүраҹиәтиндә гејд едиб ки, о, мартын 13-дә сәһәр “Хәјал” телевизијасынын иҹрачы директору Вүгар Гонагов вә телевизијанын мүхбири Јусиф Лазымовла бирликдә Губа Рајон Прокурорлуғуна ҝәтирилиб, бурада диндирилән вахт психоложи тәзјигләрә мәруз галыб.
Заур Гулијевин сөзләринә ҝөрә, о, мәдә хәстәлијиндән әзијјәт чәкир, Губа прокурорлуғунда сахландығы мүддәтдә исә она јемәк вермәјибләр, илыг су вә дәрмана еһтијаҹы олдуғуну билдирсә, буна мәһәл гојулмајыб.
Заур Гулијев мартын 14-нә кечән ҝеҹә Вүгар Гонагов вә Јусиф Лазымовла бирликдә Губа прокурорлуғундан пајон полис идарәсинә, мартын 14-дә сәһәр исә орадан Бакыја – Дахили Ишләр Назирлијинин Баш Мүтәшәккил Ҹинајәткарлыгла Мүбаризә Идарәсинә ҝәтирилдијини билдирир: “Бизи һәмин идарәнин зирзәмисиндә јерләшән мүвәггәти сахлама тәҹридханасына апардылар. Үстүмүзә гышгырыр, зәрбә илә итәләјирдиләр вә шәхсијјәтимизи алчалдырдылар. Тәҹридханаја чатанда бизи тамамилә лүт сојундурдулар. Сонра бизи дәһлизлә ҝәтирдиләр вә 2 сајлы камераја (“хата”ја) салдылар. Бурада башга, танымадығым дустаг вар иди. Камераја ҝирдикдән сонра палтарымы вердиләр. Үзәримдә олан бүтүн әшјаларымы ҝөтүрмүшдүләр.
Камера һәддән артыг сојуг иди. Јатаглар чох чиркли иди, ичәридән үфунәт ији ҝәлирди. Һавасызлыг иди. Онлара хәстә олдуғуму, дәрманлара вә илыг суја еһтијаҹымын олдуғуну дедим. Мәним сөзләримә һеч бир әһәмијјәт верилмирди. Суткада ҹәми ики дәфә јемәк, бир дәфә чај верирдиләр. Мәдә ағрыларыны сакитләшдирмәк үчүн крандан сојуг су ичмәјә мәҹбур олурдум. Бу, мәдәмдән ган ҝәтирирди, сифәтим иринләмишди. Отагдакы адамлары тез-тез дәјишдирирдиләр вә дүшүнүлмүш шәкилдә јаныма ағыр ҹинајәтдә тәгсирләндириләнләри вә мәһкумлары салырдылар. Кичик бир “фортушка” вар иди нәфәс алмаг үчүн, ағзымы һәмин “фортушкаја” дирәјирдим. Ичәри һәддән артыг рүтубәт иди. Сүмүкләрим дә бәрк ағрыјырды”.
Диндирмәләр заманы һәм прокурорлуг, һәм дә дахили ишләр органлары нүмајәндәләринин тәзјигләринә мәруз галдығыны вурғулајан Заур Гулијевин билдирдијинә ҝөрә, дөвләт һесабына тәјин едилән вәкил ону нәинки мүдафиә етмәјиб, һәтта вәкил мүстәнтигләрин тәрәфини тутуб: “Мартын 17-дә мәни мәһкәмәјә ҝәтирдиләр. Мәнә һеч бир сәнәд вермәдиләр вә һансыса мәзмунуну билмәдијим сәнәдләрә имза атдырдылар”.
Заур Гулијев апрелин 4-дә Бакы Истинтаг Тәҹридханасына көчүрүлүб.
Мүраҹиәтиндә о, сәһһәтиндәки проблемләрин галдығыны гејд етсә дә, вурғулајыр ки, јеҝанә горхусу јенидән мәни Баш Мүтәшәккил Ҹинајәткарлыгла Мүбаризә Идарәсинә апарылмасыдыр.
Диггәт: Хәбәрдән истифадә етдикдә мәнбәјә истинад лазымдыр
