Әһли Бејт -АБНА- хәбәр аҝентлији- Өлкәнин мүхтәлиф бөлҝәләриндә антитеррор әмәлијјатларынын кечирилдији, хүсусилә вәһһаби мәнсәбли инсанларын ҝөз алтына алынмасы фонунда, пајтахт диндарлары арасындакы әһвал-руһијјә диггәтчәкиҹидир. Бунунла әлагәдар, “Бизим Јол” әмәкдашы Бакыда, Јасамал рајону әразисиндә јерләшән “Илһаијјәт факултәси Ҹамиси”нә баш чәкәрәк, сон һадисәләрлә бағлы орадакы аб-һаваны өјрәнмәјә чалышыб.
Дүнән ҹүмә ҝүнү олдуғундан, мәсҹид ифрат гәләбәлик иди. Намаз вахтына 1 саатдан артыг вахт галыб. Мәсҹидин һәјәтиндә артыг 200-ә јахын адам вар. Дәстәмаз алыб, ибадәтә һазырлашырлар. Мәсҹидин һәјәтиндә мүшаһидә етдикләримизи гәләмә алмаздан өнҹә бајыр тәрәфдәки мәнзәрәни тәсвир едәк.
Ибадәт әһли намаза тәләсир. Бу гәләбәликдә сәјјар сатыҹылар да ҝөзә дәјир. Онлар дини китаблар, бәдии вә сәнәдли филимләр, мүхтәлиф нөв дини әшјалар, әтирләр сатырлар. Ајрыҹа, диндарларын истифадә етдикләри, өзләринәмәхсус сулар, әдвијјатлар, колбаса мәһсулларына, әтирли ҹораблара, мүхтәлиф хәстәликләрин дәрманы олан тәбии мәһсуллара да раст ҝәлинир.
Мәсҹидин һәјәтинә дахил олуруг. Ҝириш-чыхышын һәр бириндә диләнчиләрә раст ҝәлинир. Әразидә Пост Патрул Хидмәтинин дәјәнәкли полисләри дә ҝәзишир. Намаз вахты јахынлашыр вә имам-ҹүмә хүтбә демәјә башлајыр. Ики мәртәбәли мәсҹидин ичи адамларла долу олдуғу үчүн, һәјәтә дә халчалар дүзүрләр. Ҝет-ҝедә намаз әһлинин сајы артыр. Кими намаз гылыр, кими дә хүтбәни динләјир.
“Онлар кресло дүшүнүр, бизсә ахирәт”
Мәсҹидин биринҹи мәртәбәсиндә ортадоксал әһли-сүннә тәрәфдарлары, икинҹи гатда исә вәһһиби мәнсәблиләр чохлуг тәшкил едир. Диндарларла һәмсөһбәт олуб фикирләрини өјрәнирик. Онлар рәһимли вә мәрһәмәтли Аллаһын ады илә сөһбәтләринә башлајырлар.
“Аллаһу әкбәр! Өлкәдә хаос, чашгынлыг вар. Биз Аллаһымыза ибадәт едирик. Бурнундан узағы ҝөрмәјәнләр вар. Биз исә һазыркы һәјатымызла јанашы руһун бәдәндән чыхмасындан сонрансыны да дүшүнүрүк. Кимләрсә 5 ҝүнлүк дүнјада стол, кресло дүшүнүр. Ислам һуманистликдир. Бејнәлхалг тәшкилатларын ганунларына диггәт един, орада јазыланларын чоху мүсәлманларын мүгәддәс китабы олан “Гурани-Кәрим”дә вар. Биз өзүмүз олсаг, јахшы оларды. Ислам мүасир диндир, христианлыг вә диҝәр динләр исә бизим еранын әввәлләри вә ерамыздан әввәлки дөврдә јашајан инсанлар үчүндүр... Бизимкиләр өзләрини Гәрбә, Америкаја јахшы ҝөстәрмәк үчүн мүхтәлиф гәбуледилмәз тәдбирләр һәјата кечирирләр. Чох тәәссүф олсун ки, конститутусијамыз позулур. Бурада “дин дөвләтдән ајрыдыр” јазылыб, амма дини сијасәтә гатыблар. Ислам өлкәләринә тәзјиг үчүн дә башлајырлар ибадәт әһли олан инсанлара тәзјиг ҝөстәрмәјә. Диндарларын һәбси әввәлләр дә олуб, һеч нә дәјишмәјиб, ејни тактикадыр. Вә просес давам едир. Јахын илләрдә орта вә али мәктәбләрин бәзиләринә гадынларын һиҹаблы дахил олмасына иҹазә вермирдиләр. Тәһсили рүшвәтдән хилас етмәк лазымдыр, һиҹабын олуб-олмамасынын тәһсилә һеч бир зәрәри јохдур ”, -дејә вәһһаби мәнсубу Әһмәд дејир.
“Һакимијјәт горхур вә горхудур”
Хүтбәдә Ислам пејғәмбәри Һәзрәти Мәһәммәдин (с) һәјатындан данышылыр, Әрәбистанда јаранан динин гыса заманда неҹә Асијаны, Африканы, Авропаны әһатә етмәсиндән сөз ачылыр. Вә намаз вахты јетишир. Мәсҹидин ичиндә вә һәјәтиндә минләрлә диндар ҹәмләшиб. Намаз гыланлар арасында пакистанлылар да вар. Тәләбәләр, вәзифәли шәхсләр дә ҝөзә дәјир.
Ибадәт едәнләр арасында Милли Гуртулуш Партијасынын сәдри, милләт вәкили Фазил Гәзәнфәроғлу да вар. Онун да диндарларын һәбсинә мүнасибәтини өјрәнирик. “Бахын, тәкҹә бу мәсҹиддә издиһамлы митингдә иштирак едәҹәк гәдәр инсан вар. Һакимијјәт ибадәт әһлинин чохлуғундан вә һакимијјәтә тәзјиг имканынын олмасындан еһтијјат едир. Она ҝөрә дә һакимијјәтин мәгсәдинә ујғун олараг мүнасиб заманларда ибадәт әһли олан инсанлар һәбс олунур. Һиҹаблылары тәһсил оҹагларына бурахмырлар. Ибадәт әһлинә едилән тәзјигләр мүхтәлиф мәсәләләрә һесабланыр. Бир сөзлә һакимијјәт горхур вә горхудур”.
“Исламда террор јох, әдаләт наминә ҹиһад вар”
Зөһр намазы битир, милләт вәкилинин шәклини чәкдијимизи ҝөрән Һидајәт адлы бир нәфәр бизә јахынлашыр вә јанында ибадәт едән шәхсин милләт вәкили олмасындан гүрур дујдуғуну дејир: “Нә јахшы ки, Милли Мәҹлисдә белә инсан вар. Дүнјаны јарадан вә мөвҹудлуғуну горујуб сахлајаны - Аллаһы севән шәхс валидејнләринә, гоһумларына, үмумиликдә халгына дәјәр верәр. Белә инсандан һеч кимә зәрәр дәјмәз. Бу сөзләри сидг үрәклә Јарадана ибадәт едән бүтүн шәхсләр барәсиндә демәк олар”.
Фазил Гәзәнфәроғлунун чыхышларына телеканалларда гулаг асдығыны, мәтбуатдан охудуғуну дејән һәмсөһбәтимиз һесаб едир ки, о, диҝәр милләт вәкилләринә нисбәтән халгын һагг сәсинин чарчысыдыр: “Мүсәлманлар гардашдырлар. Өлкәнин икинҹи бөјүк шәһәри олан Ҝәнҹәдә баш верәнләрдән үзүлдүк. Һәгигәтән дә онлар ибадәт әһлидирләрсә, онлар террор етмәзләр. Чүнки, Исламда инсанын инсаны өлдүрүлмәси гәбуледилмәздир. Мән анлаја билмирәм ки, нијә террору Исламла бағлајырлар? Исламда ҹиһад вар, бу исә әдаләт наминә едилир, јәни позулмуш әдаләтин бәрпасы үчүн”.
Рамид ИБРАҺИМОВ
Диггәт: Хәбәрдән истифадә етдикдә мәнбәјә истинад лазымдыр
