Әһли Бејт -АБНА- хәбәр аҝентлијинин вердији хәбәрә әсасән бу ҝүн Бакыда такси сүрүҹүләринин етираз аксијасы кечириләҹәк. Буна сәбәб исә Нәглијјат Назирлијинин совет истеһсалы олан машынларын такси кими хидмәт ҝөстәрмәсинә гадаға гојмасыдыр. Нәглијјат Назирлијинин мүфәттишләри бу ҹүр автомобилләрин сүрүҹүләрини сахлајараг, ҹәримәләјир, тәһгир едир, һәтта физики хәсарәт јетирир. Әксәр һалларда исә сүрүҹүләрин сәнәдләри әлләриндән алыныр вә гајтарылмыр.
Аиләсинә чөрәк пулуну шәхси автомобилиндән такси кими истифадә етмәклә апаран сүрүҹүләрин сајы исә минләрләдир. Нәглијјат Назирлијинин бу гадағасы һәмин аиләләри чөрәксиз гојмаг анламына ҝәлир. Чөрәкпулундан да мәһрум едилән сүрүҹүләр апрелин 1-дә аксија кечирмәк гәрарына ҝәлибләр.
Бу һагда “Азадлыг”а мәлумат верән сүрүҹүләр билдирибләр ки, әввәлҹә метронун “20 јанвар” стансијасынын јахынлығындан јүрүшә башлајараглар: “Әҝәр мане олсалар, ”Азнефт" даирәсиндән Нәглијјат Назирлијинә доғру һәрәкәт едәҹәјик. Әҝәр полисләр гаршымызы алмаг истәсәләр, о заман бирбаша таксиләрлә назирлијин өнүнә ҝәләҹәјик. Аксија саат 15.00-да олаҹаг. Бүтүн сүрүҹүләри аксијаја дәвәт едирик".
Сүрүҹүләр нәглијјат назири Зија Мәммәдов ҝөрүшмәк истәјирләр: “Биринҹи тәләбимиз назирлә ҝөрүшмәкдир. Изаһ еләмәлијик ки, бу јолла көрпәләримизи аҹындан өлдүрүрсүз. Икинҹи тәләбимиз дә тәбии ки, гадағанын арадан галдырылмасыдыр. Назирлијин әмәкдашлары бизә гаршы ачыг саваша кечибләр. Биз бу өзбашыналыға сон гојулмасыны тәләб едирик”.
Сүрүҹүләр дејир ки, сона гәдәр мүбаризә апармаг фикриндәдирләр: “Аиләмиз аҹындан өләндән сонра итирәҹәјимиз нә галыр ки?..”
Диггәт: Хәбәрдән истифадә етдикдә мәнбәјә истинад лазымдыр
