Әһли Бејт -АБНА- хәбәр аҝентлијинин вердији хәбәрә әсасән Губа рајонун иҹра башчысынын губалыларла бағлы мәлум чыхышындан сонра Губада сон илләр әрзиндә өлкәдә кечирилән күтләви аксијаларын ән күтләвиси баш тутду. Мараглы олан будур ки, 2 ај бундан өнҹә иҹра башчысынын губалыларла бағлы етдији чыхышына етираз мәһз 1 мартда баш верди. Нијә мәһз 1 март? Бу аксијаларын 2 ајдан сонра кимләрсә тәрәфиндән мәгсәдјөнлү шәкилдә һәјата кечирилмәси мүмкүндүрмү?
Мөвзу илә бағлы faktxeber.com-а ачыглама верән “Шәрг-Гәрб” Арашдырмалар Мәркәзинин рәһбәри Әрәстун Оруҹлу, бу фактлара истисна етмәдијини билдирди: “Сизин дедијиниз сәбәбләр ола билсин ки, 1,2,3,4-ҹу бир мәсәләләрдир. Губада баш верән һадисәләрин конкрет олараг објектив сәбәбләрдән баш вериб. Артыг һакимијјәт вә реҝионда олан дөвләт рәсмиләри о һәддә чатыблар ки, бунлар артыг халгла һеч бир шәкилдә һесаблашмаг истәмирләр. Онлар халгын истәјини вә тәләбәни истәнилән шәкилдә өз марагларына гаршы ҝөрүрләр. Бунлар һәтта халгын ләјагәтинә вә мәнлијинә һөрмәтлә јанашмаг тәләбини белә јеринә јетирмирләр. Һесаб едирләр ки, халгын ләјагәтини алчалда да биләрләр. Чох тәәссүф ки, бу әнәнә һакимијјәтдә ҝетдикҹә јухары сәвијјәдән ашағы сәвијјәјә гәдәр дәринләшир. Губада баш верән һәмин мәлум чыхыш әнәнәви давранышын бир тәзаһүрү иди.”
Мәсәләјә бир нечә ајдан сонра реаксија верилмәсиндә тәблиғатын хүсуси ролу олдуғуну гејд едән Әрәстун бәј, “видеонун ҹәмијјәтдә јајылмасы мүәјјән стимуллашдырылмыш рол ојнады. Мән бу ҹүр етиразларын архасында һансыса гара гүввәләрин ахтарылмасынын тәрәфдары дејиләм”,-дејә билдирди: “Чүнки бу минвалла истәнилән аксијалара вә инсанларын етиразларына истәнилән ад гоја биләрик. Дејә биләрик ки, бунун архасында Русија дурур, онун архасында Иран дурур вә.с. Һәтта белә бир һәддә чата биләрик ки, өлкәдә баш верә биләҹәк етираз аксијасынын архасында Мозамбикин дајанмасыны иддиа етсинләр. Һесаб едирәм ки, бу абсурд бир иддиадыр.”
Сонра Әрәстун бәј гејд етди ки, әһалинин етираз ҹәһдләринин арха плана кечирмәк ҹәһдләринин јолверилмәздир. “Әҝәр Губада рајонунда гыса мүддәт әрзиндә иҹра башчысы ишләмиш адам өзүнә ики вилла тикирсә вә бу просес торпаг саһәсини 30-40 маната сатан вәтәндашларын гаршысында баш верирсә бунун өзү објектив сәбәбдир. Диҝәр тәрәфдән әҝәр иҹра башчысы мүшавирә кечирәрәк јүзләрлә адамы тәһгир едирсә, буна башга нә ад гојмаг олар.”
Һазырда һәтта дөвләт башчысы сәвијјәсиндә халгын алдадылдығыны гејд едән експерт, рәсмиләр тәрәфиндән иш јерләринин ачылмасы вә јохсуллуғун ашағы сәвијјәјә салынмасы вә диҝәр мәсәләләрлә бағлы сәсләндирилән фикирләрин јалан олдуғуну билдирди: “Әҝәр өлкәдә јохсуллуг ашағы сәвијјәјә дүшүбсә нәјә ҝөрә, бу етиразлар баш верир. Һәлә Губа Азәрбајҹандакы рајонлар ичәрисиндә ән касыбы һесаб едилмир. Әҝәр 50 мин Сабирабад вә Саатлы сакини субасма нәтиҹәсиндә өз евләриндән ајры дүшәрәк, һансыса олигархларын онларын торпаг саһәләринә саһиб чыхмасына ҝөрә де-факто депортасија едиләрәк чөлүн дүзүндә гондарма бир евлә тәмин олунурларса, онда бу инсанлар нә илә јашамалыдырлар. Һәмин сакинләр бүтүн һәјатларыны торпаг үзәриндә гурублар. Инди һәмин сакинләр етираз етсәләр бунун сәбәбинин диҝәр өлкәләрдә ахтармалыјыг.”
Сонда Әрәстун бәј гејд етди ки, истәнилән өлкәләрдә халгын етираз етмәсинин јеҝанә сәбәби һакимијјәтинин етинасыз, јарарсыз дахили сијасәти вә әһалинин марагларынын нәзәрә алмамасындан доғур.”
Диггәт: Хәбәрдән истифадә етдикдә мәнбәјә истинад лазымдыр
