Әһли Бејт -АБНА- хәбәр аҝентлијинин вердији хәбәрә әсасән мартын 1-дә сәһәр саатларында Губада башлајан халг етиразы дүнја медиасынын баш хәбәрләриндән бири олуб. Губа ҹамаатынын иҹра башчысынын евини јандырдығыны, шәһәрдә етиразы әкс етдирән фотолар, видеоҝөрүнтүләр хариҹи сајтларда јајымланыб.
Губа аксијасы һаггында мәлумат бөјүк британијанын CNN телеканалында, “www.i4u.com” хәбәр сајтында, “Азадлыг” радиосунун рус вә инҝилис дилли хидмәтләриндә, Русијанын "Дожд" телеканалында, “The voice of Russia”, “Вестник Кавказа”, “Newsru.com”, Украјнанын “Korrespondent.net” вә диҝәр порталларда, “Regnum”, “Bloomberg”, “AFP” кими мәшһур хәбәр аҝентликләриндә, Канада хәбәрләриндә, Түркијә медиасынын "Haberx", “Һабертурк”, “Дүнјабүлтени” вә башга нүфузлу хәбәр сајтларында, NTV кими танынмыш телеканалында вә б. өз әксини тапыб.
Түркијәнин NTV телеканалы:
Түркијәнин “Haberx” интернет гәзети маншетдән вердији “Азәрбајҹанда халг үсјан етди" башлыглы хәбәриндә билдирир:
"Азәрбајҹанын Губа рајонунда бу ҝүн сәһәр саатларында бир халг үсјаны башлады вә ҝүн бојунҹа давам едән үсјанда, рајон иҹра башчысынын вилласы јандырлыды.
Халгын гаршысыны алмаға јетәрли олмајан полисә көмәк үчүн рајона ҝәтирилән һәрби гүввәләрин мүдахиләси дә үсјаны јатыра билмәди вә халг рајону тамамилә әлә кечирди.
Бакыја гачан иҹра башчысы Рауф Һәбибов ҹаныны гуртараркән, Бакыдан дәрһал Губаја ҝедән нәглијјат назири Зија Мәммәдовун халгдан үзр истәдији хәбәр верилир.
Бундан башга, рајонун ики милләт вәкили дә "халгын һаглы, иҹра башчысынын исә һагсыз олдуғу" истигамәтиндә бәјанат верди.
Ахшам саатларына јахын халгын јенидән һәрәкәтләндији, рајон мәркәзини нәзарәтә ҝөтүрдүјү, халгын бир һиссәсинин исә рајон мәркәзинә јахын бир кәнддә иҹра башчысына мәхсус вилланы јандырмаг үчүн о кәндә доғру һәрәкәт етдији билдирилир.
Диҝәр тәрәфдән исә Бакыдан Губаја ҝедән јолу полисин тамамилә бағладығы, Бакыдан чыхан јүксәк сәвијјәли сәлаһијјәтлиләрин ичиндә олдуғу бир кортежин дә тәһлүкәсизлик ҝүҹләринин нәзарәти алтында Губаја доғру јол алдығы дејилир”.
“Һабертүрк” Губа һадисәләрини “Азәрбајҹанда үсјан, халг иҹра башчысынын евини јандырды” башлығы илә тәгдим едиб.
“Дүнјабүлтени” сајтында исә “Азәрбајҹанын Губа шәһәриндә халг тәһгирә ҹаваб верди, иҹра башчысынын евини јандырды”, - дејә билдирилиб.
***
CNN телевизијасы:
***
“tvrain.ru” сајты:
“Азәрбајҹанын Губа шәһәриндә баш верән һадисәләрдән сонра өлкә рәһбәрлији ора зиреһли техника ҝөндәрмәјә башлајыб. Артыг Азәрбајҹанда икинҹи Жанаозен һадисәләри башлајыб”. Хатырладаг ки, бир гәдәр әввәл Газахыстанын Жанаозен шәһәриндә халг јерли иҹра структурларына вә сосиал вәзијјәтә етираз олараг, күтләви аксијалар кечирмишди.
Хәбәрдә дејилир ки, сәһәр тездән јүзләрлә аксијачы иҹра һакимијјәтинин гаршысына јығышараг рајон иҹра башчысынын истефасыны тәләб едиб: “Сонрадан онларын сајы 10 мини кечиб. Вәзијјәт о јерә чатыб ки, һадисәләрин башга реҝионлара јајылмамасы вә аксијаны информасија блокадасында сахламаг үчүн Губада вә гоншу рајонларда интернет кәсилиб. Телефонларын ишләмәсиндә фасиләләр јараныб”.
Сајтын јаздығына ҝөрә, Дахили Гошунларын әсҝәрләри, јерли полислә тоггушмалар баш вериб: “Амма онлар күтләнин гаршысында ҝери чәкилмәли олублар. Бундан сонра јерли администрасијанын бинасы вә иҹра башчысынын еви јандырылыб. Гејри-рәсми хәбәрләрә ҝөрә, 200 нәфәр сахланылыб. Амма бу рәгәм өз тәсдигини тапмыр”.
***
Русијанын "Дожд" телеканалы:
“INTERFAX.RU” хәбәр сајты:
Аксијанын мигјасы о гәдәр бөјүк олуб ки, полис ҝөзјашардыҹы газдан вә сувуран машынлардан истифадә едиб. Сумгајыт шәһәриндән тутмуш, Губаја гәдәр јоллар полис нәзарәтиндәдир. Онларла машында шимал зонасына әсҝәр апарылыр.
“Ведомости” гәзети исә баш верәнләри белә тәгдим едиб:
“Губада иҹра башчысынын еви күлә дөндү. Гәзәбләнмиш күтлә иҹра һакимијјәтинин бинасыны да јандырды. Јанғынсөндүрәнләр бинанын там јанмасынын гаршысыны ҝүҹлә алыблар”.
“lenta.ru” хәбәр сајты:
“Азәрбајҹанын Губа шәһәриндә 10 мин нәфәрин јерли иҹра башчысынын истефасы тәләбилә башладығы етираз аксијасы елә онун истефасыјла да нәтиҹәләнди. Иҹра һакмијјәтинин бинасы вә иҹра башчысы Рауф Һәбибовун еви јандырылды. Инсанлар она мәхсус објектләри дә јерлә-јексан етдиләр”.
“Репортјор”:
“Илһам Әлијев һадисәләрдән дәрһал сонра Бакынын ”Ҝәнҹлик" адлы һиссәсиндәки тгамәтҝаһындан Президент Администрасијасына ҝәлиб. Бөјүк еһтималла Губа һадисәләрилә бағлы топланты кечириләҹәк".
“Голос России”:
“Узун мүзакирәләрдән сонра рајонун иҹра башчысы Рауф Һәбибов вәзифәсиндән кәнарлашдырылды. Ону орада сахламаг јени аксијалара сәбәб ола биләрди”.
***
Ҝүрҹүстанын “Ҝеорҝиан Тимес” аҝентлији:
“Аксија иштиракчыларыны гәзәбләндирән Һәбибовун тәһгирләри вә рајону таламасыдыр. О, өзүнә вә гајынанасына виллалар тикдириб. Горки күчәсиндәки үчмәртәбәли вилла, Олимпија Мәркәзинин јанындакы еви, һабелә, Ҝәләдүз кәндиндә чај кәнарындакы виллаларынын мөвҹудлуғундан Губада һамы хәбәрдар иди. Бүтүн бу виллалар вә онун објектләри јерлә-јексан едилди. Бундан башга, иҹра башчысы Һәбибов дөвләт бүдҹәсиндән Губа рајонунда тикинти ишләринә ајрылан 800 мин манаты (тәхминән 1 милјон доллар) мәнимсәмәкдә иттиһам олунур”.
***
“Newsru.com” хәбәр порталы Губада баш верәнләри “Азәрбајҹанын шималында халг үсјан галдырды” башлығы илә тәгдим едиб. Јазыда иҹра башчысы Рауф Һәбибовун јерли әһалини тәһгир етмәси вә бундан гәзәбләнән губалыларын һеч нәдән горхмадан рајон рәһбрәрлији үзәринә һүҹума кечдији вурғуланыр.
Диггәт: Хәбәрдән истифадә етдикдә мәнбәјә истинад лазымдыр
